ޤާނޫނާ ޚިލާފަށް ރާއްޖޭގައި އުޅޭ ފްރާންސް އާޢިލާއެއް ފުރުވާލުމަށް ދަނީ މަސައްކަތްކުރަމުން: ޝަމްޢާން

އިމިގްރޭޝަންގެ ޤާނޫނާ ޚިލާފަށް ރާއްޖޭގައި ދިރިއުޅެމުން އަންނަ ފްރާންސް އާޢިލާއެއް ފުރުވާލުމަށް ކުރަންޖެހޭ މަސައްކަތްތައް ކުރަމުން އަންނަކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަހީދު ވިދާޅުވެއްޖެއެވެ.

ސޯޝަލް މީޑިއާގައި ހިއްސާކުރެއްވި ޕޯސްޓެއްގައި ޝަމްޢާން ވިދާޅުވީ ދިވެހިރާއްޖޭގެ އިމިގްރޭޝަންގެ ޤާނޫނާ ޚިލާފަށް ފްރާންސަށް ނިސްބަތްވާ 6 މީހުންގެ ޢާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތު "އިމިގްރޭޝަން ވޮޗް" މިއަހަރުގެ ޖުލައި މަހުގެ 18 ވަނަ ދުވަހު ލިބިފައިވާކަމަށެވެ. އަދި އެ މައްސަލަ ބެލުމަށްފަހު އޮކްޓޫބަރު މަހުގެ 23 ވަނަ ދުވަހު އެމައްސަލައިގައި ހިމެނޭ އިސްފަރާތް އިމިގްރޭޝަނަށް ހާޒިރުކުރިމަށް ޝަމްޢާން ވިދާޅުވިއެވެ.

ޝަމްޢާން ވިދާޅު ރާއްޖޭގައި އިމިގްރޭޝަންގެ ޤާނޫނާ ޚިލާފަށް ދިރިއުޅެމުން އަންނަ ފްރާންސްގެ އެ އާޢިލާގެ މެންބަރުންގެ ޕާސްޕޯޓުގެ މުއްދަތު ހަމަވެފައިވާތީ، ރާއްޖޭން ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް ދާޚިލީ ވުޒާރާއާ ގުޅިގެން ކުރަމުންއަންނަކަމަށާއި ޓްރެވަލް ޑޮކިއުމަންޓް ލިބުނުހާ އަވަހަކަށް އެމީހުން ފުރުވާލުމަށް ހަމަޖެހިފައިވާކަމަށެވެ.

ޝަމްޢާން ވަނީ އިމިގްރޭޝަންގެ ޤާނޫނާ ޚިލާފަށް ދިވެހިރާއްޖޭގައި އުޅުމަށް އެއްވެސް ފަރާތަކަށް ފުރުސަތެއް ނުދޭނެކަމަށް ވިދާޅުވާ ވިދާޅުވުން ތަކުރާރުކުރައްވާފައެވެ.

ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ޙައްލުކުރުމަށްވެސް ސަރުކާރުން ގެންދަވަނީ މަސައްކަތްކުރައްވަމުންނެވެ. އެގޮތުން މިމަސައްކަތުގެ ތެރެއިން މިހާތަނަށް ގަވާއިދާ ޚިލާފަށް އުޅުނު ފަސް ހާހަށްވުރެ ގިނަ ބިދޭސީން ޑީޕޯޓްކޮށްލާފައިވާ ކަމަށް މޯލްޑިވްސް އިމިގްރޭޝަނުން ވަނީ ވިދާޅުވެފައެވެ.