ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ރ. އަލިފުއްޓާއި މާލެ ސިޓީ ބައްދަލުކުރަން އޮތް މެޗު މާދަމާ ހަވީރަށް ފަސްކޮށްފިއެވެ.
މިއަދު ހަވީރު ކުޅެން އޮތް މެޗު ފަސްކޮށްފައިވަނީ މިދިޔަ ބުރާސްފަތި ދުވަހުގެރޭ ޅ. ކުރެންދުއާ ދެކޮޅަށް ކުޅުނު މެޗުގައި މާލެ ސިޓީއަށް ނިސްބަތްނުވާ ދެ ކުޅުންތެރިއަކު ލައްވާ ކުޅުވާފައިވާ މައްސަލައާ ގުޅިގެންނެވެ. މި މެޗު ފަސްކޮށްފައިވަނީ މެޗު ކުޅުމަށް ކުޅުންތެރިން ދަނޑަށް އެރުމަށް ވަގުތު ކުޑަތަންވެފައިވަނިކޮށެވެ.
މާލެ ސިޓީގެ ސްކޮޑުގައި ހިމެނޭ އަޙްމަދު މާއިޝް ރަޝީދާއި, އަޙްމަދު ނާހިލް އިބްރާހީމްގެ އައި.ޑީ ކާޑުގައިވާ ގޮތުން އެ ދެ ކުޅުންތެރިންގެ ރަޖިސްޓަރީ އޮންނަނީ ދ. ހުޅުދެލީގައެވެ. އެއާއެކު ކުރެންދޫން ވަނީ އެ މައްސަލަ މުބާރާތް އިންތިޒާމުކުރާ ފަރާތް ކަމަށްވާ ނައިންޓީ ޕްލަސްއަށް ހުށަހަޅާފައެވެ. ކުރެންދުއާ ދެކޮޅަށް ކުޅުނު މެޗުން 1-0 ގެ ނަތީޖާއަކުން މާލެ ސިޓީ މޮޅުވި ނަމަވެސް، އެ މައްސަލަ ބެލުމަށްފަހު މުބާރާތް އިންތިޒާމުކުރާ ފަރާތުން މިއަދު ނިންމާފައިވަނީ އެ މެޗުން ކުރެންދޫ މޮޅުވީ ކަމަށެވެ. އެއާއެކު މިއަދުގެ މެޗު ފަސްކުރަން ޖެހުނުއިރު، މާލެ ސިޓީން މިހާރު ވަނީ އެ މައްސަލަ އިސްތިއުނާފަށް ހުށަހަޅާފައެވެ.
މިއަދުގެ މެޗު ކުޅުމަށް ދެ ޓީމުންވެސް ހާޒިރުވެފައިވަނިކޮށް, މި މައްސަލަ ފެންމަތިވެ، މެޗު ކޮމިޝަނަރާއި އޮފިޝަލުންނާއި ދެމެދު ވަނީ މަޝްވަރާތަކެއް ކުރިއަށް ގެންގޮސްފައެވެ. އަދި ދެ ޓީމުގެ ކޯޗުންނާ މަޝްވަރާ ކުރުމަށްފަހު، މިހާރު އެ މެޗު ވަނީ މާދަމާ ހަވީރަށް ފަސްކޮށްފައެވެ.