އޮސްޓްރޭލިޔާގެ ހައިކޮމިޝަނުން ލައްކައަކަށްވުރެ ގިނަ ފޮތް ރާއްޖޭގެ ސްކޫލްތަކަށާއި ލައިބްރަރީތަކަށް

އޮސްޓްރޭލިޔާގެ ހައި ކޮމިޝަނުން ލައްކައަކަށްވުރެ ގިނަ ފޮތް ރާއްޖޭގެ ސްކޫލްތަކަށާއި ލައިބްރަރީތަކަށް ހަދިޔާކޮށްފިއެވެ.

ޕީއެސްއެމް ނިއުސްއަށް މަޢުލޫމާތު ދެއްވަމުން އޮސްޓްރޭލިޔާގެ ހައި ކޮމިޝަނުން ވިދާޅުވީ 15 އަތޮޅެއްގެ 29 ސްކޫލަށާއި ޕަބްލިކް ލައިބްރަރީއަށް ލައްކައަކަށްވުރެ ގިނަ ފޮތް ހަދިޔާކޮށްފައިވާ ކަމަށެވެ. އަދި ފޮތް ހަދިޔާކުރުމުގެ ޕްރޮގުރާމަށް އޮސްޓްރޭލިޔާގެ ބައެއް ކުންފުނިތަކަކުން އެހީދީފައިވާކަން އެ ކޮމިޝަނުން ފާހަގަކުރެއްވިއެވެ.

އޮސްޓްރޭލިޔާގެ ހައި ކޮމިޝަނުން ވިދާޅުވީ ހަދިޔާކޮށްފައިވާ ފޮތްތަކުގެ ތެރޭގައި ކުޑަކުދިންނާ ގުޅުންހުރި ފޮތްތަކާއި މަޢުލޫމާތު ހިމެނޭ ފޮތްތައް ހިމެނެއެވެ. އަދި ކިޔެވުމުގައި ބޭނުންކުރާ ސްޓޭޝަނަރީވެސް ހަދިޔާކޮށްފައިވެއެވެ.

ސްކޫލްތަކަށް ފޮތް ބަހައި، ލައިބްރަރީތަކަށް އެކަށޭނަ ފޮތްތައް ކަނޑައެޅުމުގައި ހިލޭ ސާބަހަށް މަސައްކަތްކުރާ ރާއްޖޭގެ ޖަމިއްޔާއެއްކަމަށްވާ "ދި ރީޑިން ރޫމް"އިން ވަނީ ހައި ކޮމިޝަނަށް އެހީތެރިކަން ފޯރުކޮށްދީފައެވެ.

ހައި ކޮމިޝަނުން ވިދާޅުވީ ފޮތްތަކުގެ ލޮޖިސްޓިކްސް ހަމަޖައްސާފައިވަނީ ސްކޫލްތަކުން ކަމަށެވެ. އަދި ރަށްރަށަށް ފޮތްތައް ގެންގޮސްދިނުމުގައި ބޯޓުފަހަރުންވެސް އެހީ ލިބުނުކަމަށް ހައި ކޮމިޝަނުން ވިދާޅުވިއެވެ.

މީގެ ކުރިންވެސް އޮސްޓްރޭލިޔާގެ ހައި ކޮމިޝަނުން ވަނީ ފޮތް ހަދިޔާކުރުމުގެ ޕްރޮގުރާމްތައް ރާއްޖޭގައި ކުރިއަށް ގެންގޮސްފައެވެ. އެގޮތުން ކުޅުދުށްފުށި ޕަބްލިކް ލައިބްރަރީއަށާއި ތ. ގުރައިދޫ ސްކޫލަށް 500 ފޮތް ހަދިޔާކޮށްފައިވެއެވެ.