ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ފުވައްމުލައް ސިޓީ ބަލިކޮށް ގްރޫޕުގެ އެއްވަނަ ކ. ގުރައިދޫން ހޯދިއިރު، މި ގްރޫޕުން ދެން ކުއާޓާ ފައިނަލްގެ ޖާގަ ލިބޭ ޓީމެއް ކަނޑައަޅަން ފުވައްމުލަކާއި ތ. ތިމަރަފުށީގެ މެދުގައި ގުރުއަތުލާން ޖެހިއްޖެއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު ގްރޫޕް އީގެ މެޗު ގުރައިދޫން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މި ގްރޫޕުގައި ކުޅުނު ދެ މެޗުންވެސް މޮޅުވެ ހަ ޕޮއިންޓާއެކު ގުރައިދޫ ކުއާޓާއަށް ދަތުރުކޮށްފައިވަނީ އެއްވަނަ ޓީމުގެ ގޮތުގައެވެ. މި ގްރޫޕުގެ ދެވަނަ ޓީމު ގުރުއަތުލުމަކުން ކަނޑައަޅާއިރު، ފުވައްމުލަކާއި ތިމަރަފުށި ވަނީ ހުރިހާ ގޮތަކުން އެއްވަރުވެފައެވެ. އެގޮތުން ދެ ޓީމަށްވެސް ލިބިފައިވަނީ އެންމެ ޕޮއިންޓެކެވެ.
މިރޭ ކުޅުނު މެޗުގައި ފުވައްމުލަކުން ގިނަ ހަމަލާތަކެއް އުފެއްދި ނަމަވެސް، ގުރައިދޫން ވަނީ ރަނގަޅަށް ޑިފެންސްކޮށް، ފުވައްމުލައް ހުއްޓުވާފައެވެ. މި މެޗުގައި ފެނިގެންދިޔަ ހަމައެކަނި ލަނޑު ގުރައިދޫން ކާމިޔާބުކޮށްފައިވަނީ މެޗުގެ 33 ވަނަ މިނެޓުގައެވެ. އޭރިއާ ތެރެއިން ލިބުނު ބޯޅައަކުން މި ލަނޑު ޖަހައިދިނީ އަޙްމަދު ޝުއޫންއެވެ.
މި މުބާރާތުގެ ކުއާޓާގެ ޖާގަތައް މިހާތަނަށް އައިރު ކަށަވަރުކޮށްފައިވަނީ ގުރައިދޫގެ އިތުރުން ބ. އޭދަފުއްޓާއި، ކ. މާފުއްޓާއި، މާލެ ސިޓީ އާއި، ރ. އަލިފުށި އަދި ޅ. ނައިފަރުންނެވެ. މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.