ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) އިން އިންތިޒާމުކޮށްގެން ބޭއްވި މި އަހަރުގެ އިންޓަރ ސްކޫލް ވޮލީބޯޅަ މުބާރާތަކީ ރާއްޖޭގެ ތާރީޚުގައި މިހާތަނަށް ބޭއްވި އެންމެ ފޯރިގަދަ އަދި ކާމިޔާބު އިންޓަރ ސްކޫލް މުބާރާތް ކަމަށް އެ އެސޯސިއޭޝަންގެ ރައީސް މުޙައްމަދު ލަތީފް ވިދާޅުވެއްޖެއެވެ. ލަތީފް މިހެން ވިދާޅުވީ ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަވަމުންނެވެ.
މިދިޔަ ނޮވެމްބަރު މަހުގެ 23 ވަނަ ދުވަހުން ފެށިގެން މި މަހުގެ ހަތްވަނަ ދުވަހުގެ ނިޔަލަށް ކުރިޔަށްދިޔަ މި ފަހަރުގެ އިންޓަރ ސްކޫލް މުބާރާތުގައި މުޅި ރާއްޖެއިން ވަނީ 80 ޓީމު ވާދަކޮށްފައެވެ. އަދި މާލެއިން 31 ޓީމު ވާދަކޮށްފައިވާއިރު، މިއީ މިހާތަނަށް ވޮލީ މުބާރާތެއްގައި މާލެއިން މިހާ ގިނަ އަދަދެއްގެ ޓީމުތައް ބައިވެރިވި ފުރަތަމަ ފަހަރެވެ. މި މުބާރާތް ކުރިޔަށްދިޔައީ ތިން އުމުރުފުރައަކަށް ބަހާލައިގެންނެވެ. އެއީ 14 އަހަރުން ދަށާއި، 16 އަހަރުން ދަށުގެ އިތުރުން 19 އަހަރުން ދަށެވެ. އަދި ކޮންމެ އުމުރުފުރާއަކުންވެސް އަންހެން އަދި ފިރިހެން ޑިވިޝަނުގެ ކުޅުން ވަނީ ކުރިއަށް ގެންގޮސްފައެވެ.
ލަތީފް ވިދާޅުވީ މުބާރާތް ކާމިޔާބުވެގެންދިޔުމުގައި ވަރަށް ތަފާތު ސަބަބުތަކެއް އެކުލެވިގެންދާ ކަމަށެވެ. އެގޮތުން އެންމެ މުހިންމު އެއް ސަބަބަކީ މުބާރާތް ކުޅުނު ފޯމެޓް ކަމަށާއި، އެ ފޯމެޓުގެ ސަބަބުން މުބާރާތަށް ރަނގަޅު އަސަރެއް ކޮށް، ނަތީޖާތަކަށްވެސް ރަނގަޅު އަސަރެއް ކޮށްފައިވާ ކަމަށް ލަތީފް ވަނީ ވިދާޅުވެފައެވެ.
ލަތީފް ވިދާޅުވީ މި ފަހަރުގެ މުބާރާތުގައި ޓީމުތައް ބައިވެރިވި އަދަދަކީވެސް މުބާރާތް ކާމިޔާބުވުމުގެ އެއް ސަބަބު ކަމަށެވެ. އަދި ހުރިހާ ގޮތަކުން ބެލިކަމުގައިވިޔަސް، މި މުބާރާތް ފާހަގަކުރެވެނީ އެންމެ ކާމިޔާބު އަދި އެންމެ ފޯރިގަދަ އެއް މުބާރާތުގެ ގޮތުގައި ކަމަށް ވަނީ ވިދާޅުވެފައެވެ.
"ވަރަށް ފޯރީގައި ކުޅުންތެރިންވެސް އަދި މާލެއިން ބައިވެރިވި ޓީމުތައްވެސް، ދުވާލަކު 25 މެޗު 5 ކޯޓެއްގައި ކުޅެވެމުން ދިޔައީ. އަދި މުބާރާތް ނިންމާލަން އަޅުގަނޑުމެންނަށް އިންޑޯ ލިބިގެންދިޔުމަކީވެސް ކާމިޔާބުވުމުގެ އެއް ސިއްރު." ލަތީފް ވިދާޅުވިއެވެ.
މި ފަހަރުގެ އިންޓަރ ސްކޫލް ވޮލީބޯޅަ މުބާރާތުގެ އެންމެ ކާމިޔާބު އަތޮޅަކީ ފ. އަތޮޅެވެ. އެގޮތުން މި މުބާރާތުގެ 14 އަހަރުން ދަށާއި 16 އަހަރުން ދަށުގެ އަންހެން ޗެމްޕިއަންކަން ހޯދާފައިވަނީ ފާފު އަތޮޅު މަދަރުސާ އިންނެވެ. މިއީ އިންޓަރ ސްކޫލް ވޮލީބޯޅަ މުބާރާތުގެ 14 އަހަރުން ދަށުގެ އަންހެން ބައިގެ ޗެމްޕިއަންކަން ފ. އަތޮޅު މަދަރުސާއިން ޖެހިޖެހިގެން ހޯދި ތިންވަނަ ފަހަރެވެ.
މީގެ އިތުރުން މި މުބާރާތުގެ 14 އަހަރުން ދަށުގެ ފިރިހެން ޑިވިޝަނުގެ ޗެމްޕިއަންކަން މަޑިފުށި ސްކޫލުން ހޯދިއިރު، 16 އަހަރުން ދަށުގެ ފިރިހެން ޗެމްޕިއަން ޓީމަކީ ކުނބުރުދޫ ސްކޫލެވެ. އަދި 19 އަހަރުން ދަށުގެ ފިރިހެން ޗެމްޕިއަންކަން ސީއެޗްއެސްސީ ބަލިކޮށް އިހަވަންދޫ ސްކޫލުން ހޯދިއިރު، 19 އަހަރުން ދަށުގެ އަންހެން ޗެމްޕިއަންކަން ހޯދާފައިވަނީ ފާފު އަތޮޅު ތައުލީމީ މަރުކަޒުންނެވެ.