ވަގުތީ ބޯހިޔާވަހިކަމަށް ފައިސާގެ އެހީތެރިކަން ފޯރުކޮށްދޭންވެސް ތައްޔާރު: އެންޑީއެމްއޭ

އަލިފާނުގެ ހާދިސާއާ ގުޅިގެން ފައިސާގެ އެހީ ތެރިކަން ފޯރުކޮށްދޭން ޖެހިއްޖެނަމަ އެކަމަށްވެސް ތައްޔާރުވެގެން ތިބިކަމަށް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާޅުވެއްޖެއެވެ.

ޕީއެސްއެމް ނިއުސްއަށް މަޢުލޫމަތު ދެއްވަމުން އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވީ އަލިފާނުގެ ހާދިސާއާ ގުޅިގެން 50 އަށްވުރެ ގިނަ މީހުންނަށް އހެިތެރިކަން ބޭނުންވާކަމަށް މިހާތަނަށް ފާހަގަކުރެވިފައިވާ ކަމަށެވެ. އަދި އެމީހުންނަށް ބޭނުންވާ ޒަރޫރީ ބައެއްކަންކަން ހަމަޖައްސާދީފައިވާކަމަށާއި ބައެއް މީހުން އެމީހުންގެ އާއިލާގެ ގެތަކަށް ބަދަލުވާން ބޭނުންވުމުން އެކަމުގެ ހުއްދަވެސް ދީފައިވާކަމަށް ހިސާން ވިދާޅުވިއެވެ.

ހިސާން ވިދާޅުވީ އަލިފާން ހިނގި އިމާރާތުގެ ވަށައިގެންވާ އިމާރާތްތަކަށް ވަދެ ސަލާމަތީ ބާރުތަކާއެކު ރެޕިޑް އެސެސްމަންޓު ހެދުމުގެ މަސައްކަތް ކުރިއަށްދާ ކަމަށެވެ. އަދި އެ އިމާރާތްތަކުގެ ތެރެއިން މީހުން ބަދަލުކުރޭ ހާލަތްތަކުގައި ހުރި އިމާރާތްތަކަށް މީހުން ބަދަލުކުރުމުގެ މަސައްކަތް ކުރާނެކަން ހިސާން ފާހަގަކުރެއްވިއެވެ.

"މިތަންތަނަށް ވަދެ މީހުންނަށް ބަދަލުވެވޭނަ ތަންތަންތޯ ބެލުމަށް މަސައްކަތް ކުރަމުންދަނީ ކްލިއަރެންސް ލިބުނީމަ ބަދަލުކުރުމުގެ މަސައްކަތްތައް ކުރާނެކަމަށް." އެންޑީއެމްއޭގެ ޗީފް އެގްޒެކެޓިވް ހިސާން ހަސަން ވިދާޅުވިއެވެ.

ހިސާން ވިދާޅުވީ އެމަޖެންސީ އޮޕަރޭޝަންގެ ތެރެއިން ބޯހިޔާވަހިކަން ފޯރުކޮށްދޭން ޖެހިއްޖެނަމަ މާލީ އެހީތެރިކަންވެސް ފޮރުކޮށްދިނުމަށް ތައްޔާރަށް ތިބިކަމަށެވެ. އަލިފާނުގެ ހާދިސާއާ ގުޅިގެން އެ ސަރަޙައްދުގައި ހުރި 4 ސްކޫލެއްގެ ހެނދުނުގެ ކިޔެވުން ވަނީ މެދުކަނޑާލާފައެވެ. އަދި މެންދުރު ފަހުގެ ސެޝަންތައް ކުރިއަށް ގެންދާނީ ހާލަތު ދެނެގަތުމަށްފަހު ކަމަށްވެސް ހިސާން ފާހަގަކުރެއްވުއެވެ.