ފުރާވަރުގެ ކުދިންނަށް ޚާއްސަކޮށްގެން ބަންގި ގޮވުމުގެ މުބާރާތެއް އަންނަ ރަމަޟާންމަހު ބާއްވަނީ

އަންނަ ރަމަޟާންމަހަށް ޚާއްސަކޮށްގެން ބަންގި ގޮވުމުގެ މުބާރާތެއް ބޭއްވުމަށް ނިންމާ އެ މުބާރާތުގައި ބައިވެރިވުމުގެ ފުރުޞަތު އިސްލާމީ ކަންތައްތަކާ ބެހޭ ވުޒާރާއިން ހުޅުވާލައިފިއެވެ.

"ނޫރުލް އަޛާން 1446"ގެ ނަމުގައި ބާއްވާ މި މުބާރާތަކީ އިސްލާމީ ކަންތައްތަކާ ބެހޭ ވުޒާރާގެ މިސްކިތްތަކާ ބެހޭ ސެކްޝަނުން އިންތިޒާމުކޮށްގެން ބާއްވާ އެ މުބާރާތެކެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ އަންނަ ރަމަޟާން މަހަށް ޚާއްސަކޮށްގެން ބަންގި ގޮވުމުގެ މުބާރާތް ބޭއްވުމަށް ހަމަޖެހިފައިވަނީ މާލޭގައިކަމަށެވެ. މި މުބާރާތުގައި ބައިވެރިވުމުގެ ފުރުޞަތު މިހާރު ހުޅުވާލާފައިވާއިރު މުބާރާތުގައި ބައިވެރިވެވޭނީ އުމުރުން 15 އަހަރާއި 20 އަހަރާއި ދެމެދުގެ އުމުރުފުރާގެ ކުދިންނަށް ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.

މި މުބާރާތުގައި ބައިވެރިވާން ބޭނުންވާ ކުދިން އެކަމަށް ޚާއްސަ ކޮށްފައިވާ ގޫގުލް ފޯމު ފުރިހަމަކޮށް، މި މަހު 31 ވަނަ ދުވަހުގެ ކުރިން ހުށަހެޅުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ހުޅުވާލާފައެވެ.

މިފަދަ ދީނީ މުހިއްމު ކަންކަމަށް ޒުވާނުން އަހުލުވެރިކުރުވުމަށްޓަކައި އިސްލާމީ ކަންތައްތަކާ ބެހޭ ވުޒާރާއިން އަންނަނީ ގިނަ ޕްރޮގްރާމްތަކެއް ހިންގަމުންނެވެ. އެގޮތުން ޒުވާން ޚަތީބުން ތަމްރީންކުރުމުގެ ޕްރޮގްރާމްތަކުގެ ތެރެއިން ޚުތުބާ ކިޔަން ދަސްކޮށްދިނުން ފަދަ ކަންކަން އަންނަނީ ކުރަމުންނެވެ.