ރައްޔިތުންގެ މަޖިލީހުގެ ނޮޅިވަރަމް ދާއިރާގެ މެންބަރު މުޙައްމަދު ރަޝީދުގެ އަނބިކަނބަލުން ނިޔާވެއްޖެއެވެ.
މެންބަރު މުޙައްމަދު ރަޝީދުގެ އަނބިކަނބަލުން ނިޔާވުމާއި ގުޅިގެން ގިނަ ބަޔަކު އަންނަނީ ތައުޒިޔާ ދަންނަވަމުންނެވެ. އެގޮތުން މެންބަރު މުޙައްމަދު ރަޝީދު އަނބިކަނބަލުން ވަސީމާ މުޙައްމަދު ނިޔާވުމުން އެ އާޢިލާއަށް ތަޢުޒިޔާ ވިދާޅުވެ ސޯޝަލް މީޑިއާގައި ކުރެއްވި ޕޯސްޓެއްގައި ނައިބްރައީސް ވިދާޅުވީ ވަސީމާ މުޙައްމަދު ނިޔާވި ޚަބަރު އެހީ ކުއްލި ހައިރާންކަމާއި ފުން ހިތާމައާއިއެކުގައިކަމަށެވެ. އަދި މެންބަރު މުޙައްމަދު ރަޝީދުގެ ޢާއިލާއަށް އިޚްލާޞްތެރިކަމާއެކު ތަޢުޒިޔާ ދަންނަވާކަމަށް ނައިބު ރައީސް ވިދާޅުވިއެވެ. ނައިބްރައީސް ވަނީ އެ މަރްޙޫމާގެ ފުރާނަފުޅަށް ސުވަރުގޭގެ ދާއިމީ ނިޢުމަތްލެއްވުން އެދި ދުޢާ ދަންނަވާފައެވެ.
ނައިބްރައީސްގެ އިތުރުން ރައްޔިތުންގެ މަޖިލީހުންވެސް ވަނީ އެ އާޢިލާއަސް ތަޢުޒިޔާ ކިޔާފައެވެ. އެގޮތުން ރައްޔިތުންގެ މަޖިލީހުގެ ތަޢުޒިޔާގެ މެސެޖްގައި ނޮޅިވަރަމް ދާއިރާގެ މެންބަރު މުޙައްމަދު ރަޝީދުގެ އަނބިކަނބަލުން، ޔާވުމާ ގުޅިގެން، މަޖިލީހުގެ ރައީސް ޢަބްދުއްރަޙީމް ޢަބްދުﷲގެ ނަންފުޅުގައި، އަދި ރައްޔިތުންގެ މަޖިލީހުގެ ހުރިހާ މެންބަރުންގެ ނަންފުޅުގައި، އެމަނިކުފާނުގެ ޢާއިލާއަށް އިޚްލާޞްތެރިކަމާއެކު ތަޢުޒިޔާ ދަންނަވާކަމަށެވެ.