މަސްވެރިންނަށް ގިނަ ފައިދާތަކެއް ކުރާގޮތަށް އެކުލަވާލާފައިވާ މަސްވެރިކަމުގެ ދަފުތަރާ ގުޅޭ ޤަވާއިދު ގެޒެޓްކޮށްފި

މަސްވެރިންނަށް ގިނަ ފައިދާތަކެއް ކުރާގޮތަށް އެކުލަވާލާފައިވާ މަސްވެރިކަމުގެ ދަފުތަރާ ގުޅޭ ޤަވާއިދު ގެޒެޓްކުރައްވައިފިއެވެ.

މަސްވެރިންގެ ޤައުމީ ދަފްތަރު އެކުލަވާލެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ ވަޢުދެކެވެ. މި މަސައްކަތުގެ ދަށުން މިއަދު ވަނީ މަސްވެރިކަމުގެ ދަފުތަރާ ގުޅޭ ގަވާއިދު ގެޒެޓްކޮށްފައެވެ.

މަސްވެރިކަމުގެ ދަފުތަރާ ގުޅޭ ގަވާއިދުގެ މަޤްޞަދަކީ މަސްވެރިންނާއ،ި ފަޅުވެރިންނާއި، އޮޑިވެރިންނާއި އޮޑިދޯނިފަހަރުގެ މަޢުލޫމާތު ހިމެނޭގޮތުން އެކުލަވާލާފައިވާ ދަފުތަރު މެދުވެރިކޮށް، އެ ފަރާތްތަކަށް އިޖުތިމާޢީ ރައްކައުތެރިކަން ކަށަވަރުކޮށްދ،ީ އެ ފަރާތްތަކަކީ ދައުލަތް ދަންނަ ބަޔަކަށް ހެދުމެވެ.

މި ޤަވައިދުގައި ވާގޮތުން މަސްވެރިކަމުގެ ދަފުތަރުގައި ރަޖިސްޓަރީކުރުމަށް އެދި ހުށަހަޅަންވާނީ "ކެޔޮޅު" އެޕްލިކޭޝަން މެދުވެރިކޮށްކަމަށެވެ. އަދި މަސްވެރިކަމުގެ ދަފުތަރުގައި އުޅަނދުގެ ވެރިފަރާތް ނުވަތަ އޮޕަރޭޓަރު ރަޖިސްޓަރީވުމަށްފަހު، ކޮޔޮޅާއި ބިދޭސީން ހިމެނޭގޮތަށް ފަޅުވެރިންވެސް ރަޖިސްޓަރ ވާންޖެހެއެވެ.

ގަވާއިދުގައި ވާގޮތުން މަސްވެރިކަމުގެ ލައިސަންސް ދޫކުރާނީ މަސްވެރިކަމުގެ ޤާނޫނުގެ އިމުގެ ތެރެއަށް ފެތޭ މަސްވެރިކަމާއ،ި މަސްވެރިކަމާ ގުޅުންހުރި އެންމެހައި ހަރަކާތްތަކާއި އުޅަނދުފަހަރުން ނަގަންޖެހޭ ލައިސަންސް ނެގުމަށް އެދި ހުށަހަޅަންޖެހެނީ މަސްވެރިކަމުގެ ދަފުތަރުގައި ރަޖިސްޓަރީވުމަށް ފަހުގައެވެ.

މި ގަވާއިދަށް ޢަމަލުކުރަން ފަށާ ތާރީޚުން ފެށިގެން، މަސްވެރިކަމާ ބެހޭ ވުޒާރާއިން މަސްވެރިންނަށް އަމާޒުކޮށް ދޭ ޚިދުމަތްތައް ދިނުމުގައ،ި އެ ފަރާތެއް މަސްވެރިކަމުގެ ދަފުތަރުގައި ރަޖިސްޓަރީވެފައިވާކަން ކަށަވަރުކުރަން ޖެހެއެވެ. އަދި މަސްވެރިކަމުގެ ދަފުތަރުގައި ރަޖިސްޓަރީ ނުކުރާ ފަރާތްތަކުން، އެ ފަރާތްތަކުން ދަފުތަރުގައި ރަޖިސްޓަރީވާ ހިސާބުން ފެށިގެން މަސްވެރިންނަށް އަމާޒުކޮށް ދޭ ޚިދުމަތްތައް އެ ފަރާތްތަކަށް ލިބޭނެކަމަށް ޤަވައިދުގައިވެއެވެ.

މި ޤަވައިދުގައި ވާގޮތުން މަސްވެރިކަމުގެ ދަފުތަރުގައި ރަޖިސްޓަރީކޮށްފައިވާ ފަރާތްތަކަށް މާލީ ޚިދުމަތްތަކާއި އިޖުތިމާޢީ ޚިދުމަތްތައް ފަސޭހަކަމާއެކު ހޯދޭނެ އިންތިޒާމުތައް މަސްވެރިކަމާ ބެހޭ ވުޒާރާއިން ހަމަޖައްސަންޖެހެއެވެ.

މަސްވެރިކަމުގެ ދަފުތަރުގައި ހިމަނާފައިވާ މަޢުލޫމާތު ބަދަލުކުރަންޖެހޭ ހާލަތުގައ،ި މަޢުލޫމާތު ބަދަލުކުރަންޖެހޭ ދުވަހުން ފެށިގެން 7 ދުވަހުގެ ތެރޭގައި "ކެޔޮޅު" އެޕްލިކޭޝަން މެދުވެރިކޮށް، އެ މަޢުލޫމާތު އަދާހަމަކުރުމަކީ މަސްވެރި އުޅަނދުގެ ވެރިފަރާތް ނުވަތަ އޮޕަރޭޓަރުގެ ޒިންމާއެއްކަމަށް ޤަވައިދުގައިވެއެވެ. ހަމަ އެހެންމެ އެ މަޢުލޫމާތުތައް މަސްވެރިކަމާ ބެހޭ ވުޒާރާއިންވެސް އަދާހަމަކޮށް ބަލަހައްޓަންޖެހެއެވެ.

މި ގަވާއިދުގައި ވާގޮތުން މަސްވެރިކަމުގެ ދަފުތަރުގައި ރަޖިސްޓަރީވުމަށް ހުށަހަޅާ މަޢުލޫމާތުގެ ޞައްޙަކަން ކަށަވަރުކުރުމަކީ މަސްވެރި އުޅަނދުގެ ވެރިފަރާތްނުވަތަ އޮޕަރޭޓަރުގެ ޒިންމާއެކެވެ.