ބީސީސީގެ ހުރިހާ ޚިދުމަތެއްވެސް ކުމެވި ޕޯޓަލްގެ ތެރެއިން ލިބޭގޮތް ހަދައިފި

ބިޒްނަސް ސެންޓަރ ކޯޕަރޭޝަނުން ފޯރުކޮށްދޭ ޚިދުމަތްތައް އެއް ޕްލެޓްފޯމަކުން ދިނުމަށް "ކުމެވި ޕޯޓަލް" އިފްތިތާޙުކޮށްފިއެވެ.

ބީސީސީން ވިދާޅުވީ މިޕޯޓަލް މެދުވެރިކޮށް އޮތެންޓިކް މޯލްޑިވްސްގެ ސަޕްލަޔަރަކަށްވުމަށް އެދޭ ފަރާތްތަކުން އެކަމަށް އެދި ހުށަހެޅުމަށާއި، ސީޑް ބައި ބީސީސީން ދެމުންގެންދާ ޚިދުމަތްތަކުގެ ތެރޭގައި ހިމެނޭ މަސައްކަތުގެ ޖާގަތައް ހޯދުމަށްވެސް މި ޕޯޓަލް ތެރެއިން އެދެވޭނެއެވެ. އަދި ވިޔަފާރިއެއް ފެށުމަށް ނުވަތަ ވިޔަފާރިއާއި ބެހޭ ކަންކަމުގެ ތަޖުރިބާކާރުންގެ ޚިޔާލާއި މަޝްވަރާ ހޯދުމަށްޓަކައި ކޮންސަލްޓެންސީގެ ޚިދުމަތާއި، މަސްވެރި އުފެއްދުންތައް ވިއްކުމަށް ޚާއްސަ މަހަ ޕޯޓަލްގެ ޚިދުމަތްތައް ހޯދުމަށްވެސް މިޕޯޓަލް މެދުވެރިކޮށް ހޯދޭނެކަމަށް ބީސީސީން ވިދާޅުވެއެވެ.

މީގެއިތުރުން އަމިއްލަ މަސައްކަތްކުރާ ފަރާތްތަކުގެ ދަފްތަރުގައި ހިމެނުމަށާއި، ކްރިއޭޓިވް އިކޮނަމީ ފަނޑުގެ ޚިދުމަތްތައްވެސް ކުމެވި ޕޯޓަލްގެ ތެރެއިން ލިބޭނެކަމަށް ބީސީސީން ފާހަގަކުރައްވައެވެ.

ބީސީސީން ވިދާޅުވީ މިޚިދުމަތްތަކަކީ މީގެކުރިން އެކޯޕަރޭޝަންގެ ވެބްސައިޓް މެދުވެރިކޮށް ދެމުންއައި ވަކިވަކި ޚިދުމަތްތަކެއްކަމަށެވެ. އެހެންނަމަވެސް ކުމެވި ޕޯޓަލްއާއެކު އީފާސްމެދުވެރިކޮށް ލޮގްއިން ވުމަށްފަހު މިޚިދުމަތްތައް އެއްޕްލެޓްފޯމްއަކުން ލިބޭނެކަމަށް ބީސީސީން ވިދާޅުވެއެވެ.

ކުމެވި ޕޯޓަލް އިފްތިތާޙްކުރުމާއެކު މިހާރު ބީސީސީގެ ވެބްސައިޓުންވެސް ޕޯޓަލް ފެންނަން ހުންނާނެކަމަށް ބީސީސީން ވިދާޅުވެއެވެ. މިޕޯޓަލްއަކީ ޔޫއެންޑީޕީ އަދި ޖަޕާން ސަރުކާރުގެ އެހީތެރިކަމާއެކު ތައްޔާރުކޮށްފައިވާ ޕޯޓަލްއެއްކަމަށް ބީސީސީން ވިދާޅުވެއެވެ.