ރައީސްގެ ވައުދާ އެއްގޮތަށް ފުރަތަމަ ފަހަރަށް 48 ގަޑިއިރު ތެރޭގައި މަސްވެރިންނަށް ފައިސާ ޖަމާކޮށްފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދާ އެއްގޮތަށް ފުރަތަމަ ފަހަރަށް 48 ގަޑިއިރުގެ ތެރޭގައި މަސްވެރިންނަށް ފައިސާ ޖަމާކޮށްފިއެވެ.

މަސްވެރިން ބާނާ މަސް ކިރުވާތާ 48 ގަޑިއިރުގެ ތެރޭގައި އެ ފައިސާ މަސްވެރިންނަށް ޖަމާކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވައުދެކެވެ.

ފުރަތަމަ ފަހަރަށް 48 ގަޑިއިރުގެ ތެރޭ ފައިސާ ޖަމާކޮށްފައިވާކަން ހާމަކުރައްވައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައި މަސްވެރިކަމާއި ކަނޑުގެ ވަޞީލަތްތަކާ ބެހޭ ވަޒީރު އަޙްމަދު ޝިޔާމް ވިދާޅުވީ މި މަހުގެ 8 ވަނަ ދުވަހު މަސްވެެރިން މިފްކޯއަށް ކިރުވި މަހަށްވާ، 2.04 މިލިޔަން ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފައިވާކަމަށެވެ.

އަދި މިއީ އިއްޔެ މަސްވެރިންގެ ޕޭމަންޓުގެ ބެކްލޮގު ސާފުކުރިއިރު މިމަހުގެ 7 ވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭގައި މަސްވެެރިންގެ ފައިސާ ރައީސުލްޖުމްހޫރިއްޔާގެ ވަޢުދާ އެއްގޮތަށް ޖަމާކުރި ތާރީޚީ ދުވަސްކަމަށް ވަޒީރު ވިދާޅުވިއެވެ.

ވަޒީރު ވަނީ މަސްވެރިންނާއި މަސްވެރިކަމުގެ ސިނާޢަތުގައިހުރި ޒަމާންވީ ބޮޑެތި ގޮންޖެހުންތަކަށް ރައީސުލްޖުމްހޫރިއްޔާ ޖުމްލަ ހައްލުތަކެއް ހޯއްދަވައި ދެއްވަމުން ގެންދަވާކަން ފާހަގަކުރައްވާފައެވެ.

މަސްވެރިކަމުގެ ސިނާއަތް ކުރިއެރުވުމަށް ސަރުކާރުން ޚާއްސަ އިސްކަމެއް ދެއްވަމުން އަންނައިރު ރާއްޖޭގައި މަސް ރައްކާކުރުމުގެ ގާބިލްކަން ދެގުނަ ކުރުމާއި ޕްރޮސެސިންގެ ފެސިލިޓީތަކުގެ މަސައްކަތްތައްވެސް އަންނަނީ ކުރަމުންނެވެ. މީގެއިތުރުން މި ސިނާއަތް ސިންދަފާތު ކުރުމަށްވެސް ސަރުކާރުގެ ޕްލޭންތައް ހަދާ މަސްވެރިކަމުގެ ސިނާއަތް އިތުރަށް ފުޅާކޮށް، ރާއްޖެއަށް އެންމެ ބޮޑު އާމްދަނީއެއް ލިބޭ ސިނާއަތަށް މަސްވެރިކަން ހެދުމަކީވެސް ސަރުކާރުގެ އަމާޒެކެވެ.

މަސްވެރިކަމުގެ ސިނާއަތް ކުރިއެރުވުމަށްޓަކައި މަސްވެރިންގެ ޤައުމީ ދަފްތަރެއް އެކުލަވާލުމުގެ މަސައްކަތް ފަށައި މަސްވެރިން ދަފްތަރުކުރުމުގެ މަސައްކަތްވަނީ ފަށާފައެވެ. އަދި އަންނަ ބުރާސްފަތި ދުވަހު މަސްވެރިންގެ ދަފްތަރުގެ ޤަވައިދު ގެޒެޓްކުރެވޭނެކަމަށް ރައީސް ވަނީ ވިދާޅުވެފައެވެ. މިއާއެކު ބޭންކް އޮފް މޯލްޑިވްސް އަދި މޯލްޑިވްސް އިސްލާމިކް ބޭންކުން ދޫކުރާ ލޯނުތަކަށް އެދި ހުށައެޅޭނެއެވެ.