މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުން ހުރިހާ ފައިދާއެއް ކުރާނީ ރާއްޖޭގެ ކުލަބުތަކަށް ކަމަށް ފުވައްމުލައް ސިޓީގެ ކޯޗު ސޮބާހު މުޙައްމަދު ބުނެފިއެވެ. ސޮބާހު މިހެން ބުނެފައިވަނީ ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުންނެވެ.
ސޮބާހު ބުނީ ކުރިން ނުފެންނަ ހުނަރުވެރި އެތައް ކުޅުންތެރިންތަކެއް ގޯލްޑް ކަޕުގެ ސަބަބުން ފެނިގެންދާ ކަމަށާއި، ރާއްޖޭގައި ޔޫތު ލެވެލްގައި މަސައްކަތްކުރާ ކޯޗުންނާއި ސީނިއަރ ކޯޗުން، މި މުބާރާތް މޮނީޓަރ ކުރަން ޖެހޭ ކަމަށެވެ.
"އަޅުގަނޑު މި ދައްކަނީ ހޮކޭ ކުޅޭތަން ބަލަން އަންނަ ވާހަކައެއް ނޫން. އަލިފުށީގައި ވިޔަސް، އައްޑޫގައި ވިޔަސް، ކުރެންދޫގައި ވިޔަސް އަޅުގަނޑުމެންނަށް އެބަފެނޭ ޔަންގް ވަރަށް މޮޅެތި ކުޅުންތެރިން،" ސޮބާހު ބުންޏެވެ.
ސޮބާހު ބުނީ އެ ކުޅުންތެރިންގެ ފަރާތުން އެންމެ ބޮޑު ފައިދާއެއް މުސްތަގުބަލުގައި ކުރާނީ ދިވެހި ފުޓްބޯޅައަށް ކަމަށާއި، މިއީ އެއްގޮތަކަށްވެސް ފާޑުކިޔަންވީ ވަގުތު ކަމަށް ގަބޫލުނުކުރާ ކަމަށެވެ. އަދި އަންނަ އަހަރުގެ މުބާރާތަށް މިއަށްވުރެ ރަނގަޅަށް ތައްޔާރުވާނެ ކަމަށާއި، މި މުބާރާތުގެ ކުރިން ޓީމުތައް އެކުލަވާލަން އަންނަ އަހަރު ރަށްރަށުގައި ބޮޑު ފުޓްބޯޅަ މުބާރާތްތައް ބާއްވާނެ ކަމަށްވެސް ބުންޏެވެ.
މީގެ އިތުރުން ރާއްޖޭގައި މިހާރުވެސް ސަރުކާރުގެ ޚަރަދުގައި ހަދާފައި ހުރި ދަނޑުތައް ގިނަ ކަމަށާއި، އެފަދަ ދަނޑުތަކުގެ ބޭނުން އެންމެ އެކަށީގެންވާ ގޮތެއްގައި ހިފަމުންނުދާ ކަމަށްވެސް ސޮބާހު ބުންޏެވެ.
" މި މުބާރާތުގެ ސަބަބުން ރާއްޖޭ އެކި ހިސާބުތަކުގައި ބޮޑެތި މުބާރާތްތައް ބާއްވަން މަޖުބޫރުވާނެ. މިއީ ފުޓްބޯޅަ ދަށްވެފައި އޮތް ހާލަތެއްގައި ވަރަށް ރަނގަޅު ކަމެއް. އެހެންވެ މިއަށް ފާޑުކިޔުމުގެ ބަދަލުގައި، އެންމެންގެ ސަޕޯޓު އެބަ ބޭނުންވޭ." ސޮބާހު ބުންޏެވެ.
ފުޓްބޯޅައަށް ލޯބިކުރާ ބަޔަކުނަމަ، މި މުބާރާތާ ދެކޮޅު ހެދުމުގެ މާ ބޮޑު މާނައެއް ނެތް ކަމަށް ފުވައްމުލަކުގެ ކޯޗު ސޮބާހު ބުންޏެވެ. އަދި ރާއްޖޭގެ ފުޓްބޯޅަ މަރުވެފައި އޮތް ހާލަތެއްގައި، އެލީޓް ލެވެލްގެ އެއްވެސް މުބާރާތެއް ނެތް ދަނޑިވަޅެއްގައި، ރާއްޖޭގެ ރަށްތަކެއް ކުޅެމުންދާ މުބާރާތުން ފެންނަ މަންޒަރުތަކާއި، އޮތް ފޯރި ފެނި، އެންމެންވެސް އުފާކުރުން ހައްގު ކަމަށް ސޮބާހު ބުންޏެވެ. އަދި މުބާރާތަށް ފާޑުކިޔުމުގެ ބަދަލުގައި ރަނގަޅު ވިސްނުމަކުން އެންމެންވެސް ވިސްނުމަށް ސޮބާހު ވަނީ ބުނެފައެވެ.
"އެ ކުއްޖަކަށް ފުރުސަތު ލިބިގެންދަނީ މާދަން އައިސް މާޒިޔާ ނޫނީ ވިކްޓަރީ ކަހަލަ ބޮޑު ކުލަބަކަށް ކުޅެލަން. އޭގެ ސަބަބުން އެ ކުޅުންތެރިޔާއަށް ތަނަވަސްވަނީ ނެޝަނަލް ޓީމަށް ދާން." ސޮބާހު ބުންޏެވެ.
ސޮބާހު ބުނީ އެންމެވެސް ބޭނުންވަނީ ރާއްޖޭގެ ގައުމީ ޓީމު ވަރުގަދަވުން ކަމަށާއި، ރާއްޖޭގެ ފުރަތަމަ ޑިވިޝަނުގައި ކުޅެމުން އަންނަ ކުލަބުތަކުގެ ފެންވަރު ރަނގަޅުވުމަށް ކަމަށެވެ. އަދި މިހާރު އެންމެ އިސް ވިސްނުމަކަށް ވާންވާނީ ރާއްޖޭގެ ފުޓްބޯޅަ ކުރިއަށްދެވޭނެ ގޮތަކާ މެދު ކަމަށާއި، އެކަން ހަރުދަނާކޮށް، ފޯރި އިތުރުކުރެވޭނެ ގޮތެއް ބެލުން މުހިންމު ކަމަށެވެ. އެގޮތަށް މަސައްކަތް ކުރެވިއްޖެ ކަމަށްވާނަމަ، ރާއްޖެއަށް ކުރިއެރުން ލިބުން އެއީ ދުރުގައި އޮތް ކަމެއް ނޫން ކަމަށްވެސް ސޮބާހު ވަނީ ބުނެފައެވެ.