މެޗްގެ އެންމެ ފަހުވަގުތު ޓްރައުސްޓަސޮން ކާމިޔާބުކޮށްދިން ގޯލުން އޮސްޓްރިއާގެ މައްޗަށް ކުރި ހޯދާ އައިސްލެންޑްއިން ޔޫރޯ ފުޓްބޯޅަ މުބާރާތުގެ ގަދަ 16 އަށް ދަތުރުކޮށްފިއެވެ.
ގްރޫޕް އެފްގެ ފަހު މެޗްގައި އައިސްލެންޑާ އޮސްޓްރިއާ ބައްދަލުކުރި މެޗް އައިސްލެންޑް ކާމިޔާބުކުރީ 2 ލަނޑު 1 ލަނޑުންނެވެ. މެޗްގެ ފުރަތަމަ ހާފްގައި އައިސްލެންޑްގެ ބޮއެޑްވާރސަން ލަނޑެއް ކާމިޔާބުކޮށްދީ އެ ޓީމަށް ލީޑް ނަގައިދީފައިވަނިކޮށް 2 ވަނަ ހާފްގައި އޮސްޓްރިއާއަށް މެޗްގެ ނަތީޖާ ހަމަހަމަކޮށްދިނީ އެލެސަންދްރޯ ޝޮއެޕްއެވެ. އޭގެ ކުރިން އޮސްޓްރިއާއަށް ލިބުނު ޕެނަލްޓީއެއް ޑްރަގޮވިޗް ވަނީ ބޭކާރުކޮށްލާފައެވެ.
މެޗްގެ 3 ޕޮއިންޓް ޓްރައުސްޓަސޮން އައިސްލެންޑަށް ހޯދައިދިނީ މެޗްގެ 90 ވަނަ މިނެޓްގައެވެ. މި މެޗުން މޮޅުވެ އައިސްލެންޑް 5 ޕޮއިންޓާއެކު ގްރޫޕްގެ 2 ވަނަ ޓީމުގެ ގޮތުގައި ގަދަ 16 އިން ޖާގަ ހޯދިއިރު އޮސްޓްރިއާ ވަނީ މުބާރާތުން ކަޓާފައެވެ.
ގަދަ 16 ގައި އައިސްލެންޑް ބައްދަލުކުރަން ޖެހޭނީ ގްރޫޕް ބީގެ 2 ވަނަ ޓީމް އިންގްލެންޑާއެވެ. އެ މެޗް ކުޅުމަށް ހަމަޖެހިފައިވަނީ 27 ވަނަ ދުވަހުގެރޭ ދަންވަރު 12 ޖަހާއިރުއެވެ.