ޒްލަޓާން އިބްރަހިމޮވިޗްގެ ސްވިޑުން މުބާރާތުން ކަޓުވާލުމަށްފަހު ޔޫރޯ ފުޓްބޯޅަ މުބާރާތުގެ ގަދަ 16 އިން ބެލްޖިއަމް ޖާގަ ހޯދައިފިއެވެ. ގްރޫޕް އީގެ ފަހު މެޗްގައި ރޭ ބެލްޖިއަމްއާ ސްވިޑުން ބައްދަލުކުރި މެޗް ބެލްޖިއަމް ކާމިޔާބުކުރީ 1 ލަނޑު 0 ލަނޑުންނެވެ.
މެޗްގައި ބެލްޖިއަމްގެ ހަމައެކަނި ލަނޑު މެޗްގެ 84 ވަނަ މިނެޓްގައި ކާމިޔާބުކޮށްދިނީ ރަޖާ ނައިންގޮލަންއެވެ. މި މެޗުން މޮޅުވެ ބެލްޖިއަމް ގަދަ 16 އިން ޖާގަ ހޯދީ 6 ޕޮއިންޓާއެކު ގްރޫޕްގެ 2 ވަނަ ހޯދައިގެނެވެ. ސްވިޑުން އޮތީ ގްރޫޕްގެ 4 ވަނާގައި 1 ޕޮއިންޓާއެކުއެވެ. ގަދަ 16 ގައި ބެލްޖިއަމް ބައްދަލުރަން ޖެހެނީ ހަންގޭރީއާ އެވެ. އެ މެޗް ކުޅޭނީ 26 ވަނަ ދުވަހުގެ ރޭ ދަންވަރު 12 ޖަހާއިރުއެވެ.
ގަދަ 16 ގައި 25 ވަނަ ދުވަހު އިރުއޮއްސި 6 ޖަހާއިރު ބައްދަލުކުރާނީ ސްވިޒަރލެންޑާ ޕޮލެންޑްއެވެ. އެރޭ 9 ޖަހާއިރު ކުޅޭ މެޗްގައި ބައްދަލުކުރާނީ ވޭލްސްއާ ނޮދާން އަޔަރލެންޑެވެ.