ތަޢުލީމާއި ޞިއްޙީ ދާއިރާގެ މަޝްރޫޢުތައް މިއަންނަ އަހަރު ފެށުމަށް ޚާއްޞަ އިސްކަމެއްދޭނަން: ރައީސް

ތަޢުލީމާއި ޞިއްޙީ ދާއިރާގެ މަޝްރޫޢުތައް މިއަންނަ އަހަރު ފެށުމަށް ޚާއްޞަ އިސްކަމެއްދެއްވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ
މިއަދު ހެނދުނު މާލެއަތޮޅު ގާފަރު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ މެންބަރުންނާއި ބައްދަލުކުރައްވައި، ދެއްކެވި ވާހަކަފުޅުގައެވެ.

ގާފަރު ކައުންސިލް އިދާރާގައި ބޭއްވެވި މި ބައްދަލުކުރެއްވުމުގައި ކައުންސިލުން ވަނީ ރަށުގެ ރައްޔިތުންގެ ހުރި ކަންބޮޑުވުންތަކާއި ރަށުގެ ތަރައްޤީއަށް ބޭނުންވާ ކަންތައްތައް ރައީސުލްޖުމްހޫރިއްޔާއާ ހިއްސާކުރައްވައި އެކަންކަމާ ގުޅޭގޮތުން މަޝްވަރާކުރައްވާފައެވެ. މިގޮތުން، ރަނގަޅު ފެންވަރެއްގެ ސިއްޙީ މަރުކަޒެއް ޤާއިމުކުރުމުގެ މަސައްކަތް އަވަސްކޮށްދެއްވުމަށާއި، ރަށުގައި ގޯތި ދޫނުކުރާތާ 18 އަހަރުވެފައިވުމުން ރަށުގެ ގިނަ ރައްޔިތުން ގޯތި ބޭނުންވާކަން ފާހަގަކުރައްވައި ބިން ހިއްކުމުގެ މަޝްރޫޢު ކުރިއަށް ގެންގޮސްދެއްވުމަށް އެދިވަޑައިގެންނެވިއެވެ. މީގެ އިތުރުން ސްކޫލުގެ ޖާގައިގެ ދަތިކަމާއި، މަސްވެރިންގެ ފަރާތުން ހުރި ބައެއް ކަންބޮޑުވުންތައްވެސް މިބައްދަލުވުމުގައި ފާޅުކުރެއްވިއެވެ.

އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވަނީ ބަޖެޓުގެ ދަތިކަމާއި ހޭންޑް ބޯލް ދަނޑު ނުނިމި އޮތުމުން ކަންބޮޑުވުން ފާޅުކުރައްވާފައެވެ.

މި ބައްދަލުކުރެއްވުމުގައި ރައީސުލްޖުމްހޫރިއްޔާގެ އަރިހުގައި ބައިވެރިވެވަޑައިގެންނެވި ވަޒީރުން ވަނީ ކައުންސިލުން ކަންބޮޑުވުން ފާހަގަކުރެއްވި ކަންކަމަށް ސަރުކާރުން ކުރައްވަމުންދާ މަސައްކަތްތަކުގެ މަޢުލޫމާތާއި، ތަރައްޤީއަށް ކުރިއަށްގެންދާ މަޝްރޫޢުތަކުގެ އެންމެ ފަހުގެ މަޢުލޫމާތުތައް ހިއްސާކުރައްވާފައެވެ.

މިބައްދަލުކުރެއްވުމުގައި ރައީސުލްޖުމްހޫރިއްޔާ ވިދާޅުވީ ކައުންސިލުން ފާހަގަކުރެއްވިކަންކަމުގެ ދާއިމީ ނަތީޖާ ރަނގަޅުވާނެ ގޮތަކަށް ކުރިއަށްގެންދަވާނެ ކަމަށެވެ. އަދި އެމަނިކުފާނު ވަޢުދުވެވަޑައިގެންފައިވާ ކަންކަން ކޮށްދެއްވާނެކަމަށްވެސް ވިދާޅުވިއެވެ. އެގޮތުން ތަޢުލީމާ ސިއްޙީ ދާއިރާގެ މަޝްރޫޢުތައް މިއަންނަ އަހަރު ފެށުމަށް ޚާއްޞަ އިސްކަމެއްދެއްވާނެކަމަށް އެމަނިކުފާނު ވިދާޅުވިއެވެ. ހަމައެއާއެކު ރަށުގެ ތަރައްޤީގެ ކަންކަން ތާށިނުވެ ކުރިއަށްގެންދިއުމަށް އަހަންމިއްޔަތުކަން ދެއްވާނެކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.