ފުރަތަމަ ފަހަރަށް މިފްކޯއަށް ބޭރުގެ ސީއީއޯ އެއް އައްޔަންކޮށްފި

މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ، މިފްކޯގެ ސީއީއޯގެ މަޤާމަށް ޔޫކްރެއިނުގެ ބޭފުޅެއް އައްޔަންކޮށްފިއެވެ.

ސަރުކާރުގެ މަސްކުންފުނި، މިފްކޯގެ ސީއީއޯގެ މަޤާމަށް ޢައްޔަންކުރައްވާފައިވަނީ ޔޫކްރެއިންގެ ބޭފުޅެއްކަމުގައިވާ ޑރ. ވިތާލީ ލުބިމޮފްއެވެ. މިއީ މިފްކޯގެ ތާރީޙުގައިވެސް އެކުންފުންފުނީގެ ސީއީއޯއަކަށް ބޭރުގެ ބޭފުޅެއް ޢައްޔަންކުރި ފުރަތަމަ ފަހަރެވެެ.

ޑރ.ވިތާލީ ލުބިމޮފްއަކީ ވިޔަފާރީގެ ދާއިރާގައި 20 އަހަރުގެ ތަޖުރިބާ ލިބިވަޑައިގަންނަވާފައިވާ ބޭފުޅެކެވެ. ޑރ.ވިތާލީ މާދަމާ ރަސްމީކޮށް މަސައްކަތާ ޙަވާލުވެވަޑައިގަންނަވާނެ ކަމަށް މިފްކޯއިން ވިދާޅުވެއެވެ.

މިފްކޯގެ ސީއީއޯގެ މަޤާމުގައި ހުންނެވި އަޙްމަދު ޝަމާހު ރަޝީދު އެމަޤާމުން މެއި މަހުގެ ތެރޭގައި ވަކިކުރުމާއި ގުޅިގެން 2 ފަހަރެއްގެ މަތިންވަނީ މިފްކޯއަށް ސީއީއޯއެއް ހޯދުމަށް ޢިއުލާންކޮށްފައިވެއެވެ. ސަރުކާރުގެ ކުންފުނިތަކުގެ ބެލެނިވެރި ފަރާތް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑު، ޕީސީބީން ރަސްމީކޮށް އަދި ޑރ.މިތާލީ މިމަޤާމަށް ޢައްޔަންކުރެއްވިކަން ޢިއުލާންކުރައްވާފައެއް ނުވެއެވެ.

މިފްކޯއަށް ސީއީއޯއެއް ހޯދުމަށް އޭރު ކުރި އިޢުލާންގައިވާގޮތުން ސީއީއޯގެ މަޤާމަށް ކުރިމަތިލާ ފަރާތްތަކަކީ މަދުވެގެން 8 އަހަރު މަސްވެރިކަމާއި ގުޅުންހުރި ކުންފުންޏެއް ހިންގުމުގެ ތަޖުރިބާ ހުރި ފަރާތަކަށް ވާން ޖެހެއެވެ. އަދި އެފަރާތަކީ މަދުވެގެން 4 އަހަރު މަސްވެރިކަމާއި ގުޅުން ހުރި ބައިނައަޤްވާމީ ކުންފުންޏެއް ހިންގުމުގެ ތަޖުރިބާވެސް ހުރި ފަރާތަކަށް ވާން ޖެހޭ ކަމަށް ޕީސީބީގެ އިޢުލާންގައި ބުނެފައިވެއެވެ.

މިފްކޯއަކީ ރާއްޖޭގެ މަސްވެރިކަމުގެ ސިނާޢަތްކުރިއެރުވުމަށް 1993 ވަނަ އަހަރު އުފައްދާފައިވާ ކުންފުންޏެކެވެ. އެހެންނަމަވެސް މިވީ ދިގު މުއްދަތުގެ ތެރޭގައި އެކުންފުންޏަކީ ދައުލަތަށް މާލީގޮތުން ބުރަ ބޮޑުވެފައިވާ ކުންފުންޏެކެވެ.

އެހެންކަމުން މިފްކޯގެ ހިނގުން ހަރުދަނާކުރުމަށް ސަރުކާރުން ގެންނަ އެންމެ މުޙިއްމު އެއް ބަދަލަކީ ހިންގުމުގެ ދާއިރާގެ ތަޖުރިބާ ލިބިފައިވާ ބޭރުގެ ބޭފުޅެއް ކުންފުންޏަށް ގެނައުމެވެ.