މަސްވެރިކަމުގެ ހުރިހާ ކޮންޓްރޯލެއް ދޭން ބޭނުންވަނީ މަސްވެރިންނަށް: ރައީސް

މަސްވެރިކަމުގައި ސަރުކާރުގެ އެއްވެސް ކޮންޓްރޯލެއް ގެންގުޅެން ބޭނުންނުވާކަމަށާއި، ބޭނުންފުޅުވަނީ އެހުރިހާ ކޮންޓްރޯލެއް މަސްވެރިންނަށް ދިނުމަށްކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ އއ.ރަސްދޫ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ.

ރަސްދޫ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ އެރަށުގެ ތަރައްޤީއަށް ބޭނުންވާ ގިނަ ކަންކަން އެބަހުރިކަމަށެވެ. ރަސްދޫއަށް އެމަނިކުފާނު ވެވަޑައިގެންފައިވާ ވަޢުދުތައް ފުއްދަވާނެކަމުގެ ޔަޤީންކަން ދެއްވަމުން ރައީސް ވިދާޅުވީ، އަންނަ އަހަރުގެ ބަޖެޓަކީ ރަސްދުއާއި މުޅި ރާއްޖޭގައި މަޝްރޫޢުތައް ހިންގޭނެ ބަޖެޓެއްކަމަށެވެ. ރައީސް ވަނީ މިއަހަރުގެ ބަޖެޓުން ކަންކަން ކުުރުމަށް ހުރި ދަތިތައް ތަކުރާރުކުރައްވާފައެވެ.

"ތަޅެއް އަޅުވާފަ އޮތް ބަޖެޓެއް ވީމަ ތަރައްޤީގެ މަޝްރޫއުތަކަށް އެހާ އިސްކަން ނުދެވޭނެގޮތަށް އޮތީ. މަޝްރޫޢުތަކަށް ވަރަށް ކުޑަ އަދަދެއް ކަނޑައަޅާފައޮތީ. އެގޮތަށް މުޅި ރާއްޖެ އޮތީ. އެހެންވީމަ ވީވަރަކުން ކަންކަންކުރީ، ކޮންސްޓްރަކްޝަން ދާއިރާއިންވެސް 50 ބަނދަރު ނިމިއްޖެ. އެނޫން ވުޒާރާއިންވެސް އެބަކުރޭ. އަޅުގަނޑުގެ އެކްސްޕެކްޓޭޝަނާ އެއްގޮތަށްނޫން ކަންކަން ދިޔައީ. ނަމަވެސް އަންނަ އަހަރު ވަރަށް ގިނަ ކަންކަން ކުރެވޭނެ. ވަޢުދުވެފައިވާ ކަންކަމަށް އިސްކަންދޭނަން." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވިދާޅުވީ ރަސްދޫއާއި އެނޫންވެސް ރަށްރަށަށް އެމަނިކުފާނު ވަޢުދުވެވަޑައިގެންފައިވާ އެންމެ މަޝްރޫޢެއްވެސް ދޫކޮށް ނުލައްވާނެކަމަށެވެ. ރައީސްވަނީ ރަސްދޫގެ ބަނދަރު ތަރައްޤީކުރުމާއި، އައިސްޕްލާންޓް ޤާއިމްކުރުމާއި، އެނޫންވެސް މަޝްރޫޢުތައްވެސް ހިނގާނެކަމުގެ ޔަޤީންކަން ދެއްވާފައެވެ.

ރައީސް ވިދާޅުވީ ޢުމްރާނީ، އިޖްތިމާޢީ އަދި އިޤްތިޞާދީ މަޝްރޫޢުތައް އަންނަ ޖެނުއަރީ މަހުންފެށިގެން ހިނގަންފަށާތަން ފެންނާނެކަމަށެވެ.

ރައީސް ވިދާޅުވީ ރަސްދޫއަކީ މަސްވެރިކަމާއި ފަތުރުވެރިކަމުގައިވެސް ކުރިއަށްދާ ރަށެއްކަމަށާއި، ކަންނެލި މަސްވެރިކަންކުރާ 12 އުޅަނދު އެރަށުގައި އެބައޮތްކަމަށެވެ. އަދި ސައުދީ ފަންޑުގެ އެހީގައި ރަސްދޫގައި އައިސްޕްލާންޓެއް އެޅުމުގެ މަސައްކަތްކުރައްވާކަމަށެވެ. ރައީސްގެ ވާހަކަފުޅުގައި މަސްވެރިންނަށް ފަހި ފުރުޞަތުތައް ހޯދައިދިނުމަށް ކުރާ މަސައްކަތްތައް ތަފްސީލްކޮށްދެއްވަމުން ވިދާޅުވީ، ދޯނިފަހަރުގައި އާރުއެސްޑަބްލިއު ހަރުކުރެވޭނެ މާލީ އެހީ ދިނުމުގެ މަސައްކަތް ފައްޓަވާފައިވާކަމަށެވެ. ރައީސް ދެއްވި ޔަޤީންކަމަކީ މަސްވެރިކަމުގައި ސަރުކާރުގެ ކޮންޓްރޯލް ނުގެންގުޅޭނެކަމަށާއި، ހުރިހާ ބާރެއް ދޫކޮށްލާނީ މަސްވެރިންނަށްކަމަށެވެ.

"ގަސްދުކުރަނީ ކައުންސިލްތައް ބޭނުންވާނަމަ ކައުންސިލްތަކުން އައިސްޕްލާންޓުތައް ހިންގަން. އަޅުގަނޑުމެން ބޭނުނވަނީ ރައްޔިތުން ބޭނުންވާގޮތަށް އެކަންކަން ނިމިގެންދިއުމަށް." ރައީސުލްޖުމްހޫރިއްޔާ ވިދާޅުވިއެވެ.

ރައީސް ވަނީ، ޓޫރިޒަމް ހިންގާ ފަރާތްތަކާއި މަސްވެރިންގެވެސް ހުރި ކަންބޮޑުވުން އެމަނިކުފާނާ ހަމައަށް ގެނެސްދިނުމަށް އެދިވަޑައިގެންފައެވެ.

އަންނަ އަހަރަކީ ލޯކަލް ޓޫރިޒަމް ދާއިރާއާއި އަދި އެނޫންވެސް ކަންކަން ފަހިވާނެ އަހަރެއްކަމަށްވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.