އީރާނުން ޔުރޭނިއަމް މުއްސަނދިކުރުން އެތައް ގުނައެއް އަވަސްކޮށް، ނިޔުކްލިއަރ ބޮމެއްގެ ދަރަޖައަށް ދާން ބޭނުންވާ 90 އިންސައްތައާ ގާތްކޮށްފައިވާ ކަމަށް، ދުނިޔޭގެ ނިޔުކްލިޔަރ ހަތިޔާރަށް ފާރަވެރިވާ އދގެ ޖަމްޢިއްޔާ، އިންޓަނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ)ގެ ވެރިޔާ ރަފަޔަލް ގްރޮސީ ވިދާޅުވެއްޖެއެވެ.
އީރާނުން ޔުރޭނިއަމް މުއްސަނދިކުރުން އަވަސް ކުރަމުންދާ ކަމަށާއި އެއީ ސިވިލް ނިއުކްލިއާ ހަކަތަ އުފެއްދުމުގައި ނުވަތަ ނިޔުކްލިއަރ ހަތިޔާރު އުފެއްދުމުގައި ތެލުގެ ގޮތުގައި ބޭނުންކުރެވޭނެ ގޮތަށް މާއްދާތައް ރީފައިން ކުރާ މަރުހަލާއެއް ކަމަށް، އެ އޭޖެންސީން މެންބަރު ޤައުމުތަކަށް ފޮނުވި ސިއްރު ރިޕޯޓެއްގައި ވަނީ ކަށަވަރުކޮށްދީފައެވެ.
އައިއޭއީއޭގެ ހޯދުންތަކާ އެކު، މަދަނީ އެއްވެސް ޕްރޮގްރާމެއްގެ ދަށުން ޔުރޭނިއަމް މިހާ މަތީ ފެންވަރަކަށް މުއްސަނދި ކުރުމުގެ ސަބަބެއް ނެތް ކަމަށާއި މީގެކުރިން މި ފެންވަރަށް ޔުރޭނިއަމް މުއްސަނދިކުރިހުރިހާ ޤައުމުތަކަކުން ވެސް ނިޔުކްލިޔަރ ހަތިޔާރު އުފައްދާފައިވާ ކަމަށް ބުނާ ހުޅަނގުގެ ޤައުމުތަކުގެ ކަންބޮޑުވުން އިތުރުވާނެއެވެ.
ނަމަވެސް، ޔުރޭނިޔަމް މުއްސަނދިކުރަނީ، ނިޔުކްލިޔަރ ހަތިޔާރު އުފައްދަން ކަމަށް ބުނެ ކުރެވޭ ތުހުމަތުތައް އީރާނުން ދޮގުކުރެއެވެ.
އައިއޭއީއޭ އިން ލަފާކުރާ ގޮތުގައި، އީރާނުގައި މިހާރުވެސް 60 އިންސައްތައިގެ ފެންވަރަށް މުއްސަނދިކޮށްފައިވާ ޔުރޭނިއަމް ހުރިއިރު، އެ އިތުރަށް މުއްސަނދިކޮށްފިނަމަ، ހަތަރު ނިޔުކްލިޔަރ ބޮން އުފެއްދޭނެއެވެ.
"މިއަދު މި އިދާރާއިން މި އިޢުލާން ކުރަނީ، 60 އިންސައިތައިގެ ފެންވަރަށް މުއްސަނދިކޮށްފައިހުރި ޔުރޭނިއަމްގެ އިތުރަށް މުއްސަނދިކުރުމުގެ ޤާބިލުކަން ވަރަށް ބޮޑަށް އިތުރުކޮށްފައިވާ ކަމަށް،" ގްރޮސީ ވިދާޅުވިއެވެ.
އޭނާ ވިދާޅުވީ އީރާނުގެ އުފެއްދުމުގެ ޤާބިލުކަން، 60 އިންސައްތައިގެ ފެންވަރަށް މުއްސަނދިކޮށްފައިވާ މަހަކު 5-7 ކިލޯ ޔުރޭނިއަމް މިހާރު ހުރި މިންވަރަށް ވުރެ "ހަތް، އަށް ގުނަ އިތުރު، ފަހަރެއްގައި އެއަށްވުރެ ވެސް އިތުރު" ވާނެ ކަމަށެވެ.