ޑިމޮކްރެޓިކް ރިޕަބްލިކް އޮފް ކޮންގޯގައި ފެތުރެމުންދާ ގޮތް ނޭނގޭ ބަލި ދެނަގަތުމުގެ މަސައްކަތަށް އެހީތެރިވުމަށް ޞިއްޙީ މާހިރުން އެ ޤައުމަށް ފޮނުވުމަށް ނިންމާފައިވާ ކަމަށް ދުނިޔޭގެ ސިއްޙަތު ޖަމްޢިއްޔާ، ޑަބްލިޔުއެޗްއޯއިން ބުނެފިއެވެ.
ޑަބްލިޔުއެޗްއޯގެ ސިއްޙީ މާހިރުން ފޮނުވަނީ ކޮންގޯގެ ޕެންޒީ ސަރަޙައްދަށެވެ. އެ ޤައުމުގެ ކުވަންގޯ ޕްރޮވިންސްގެ ހުޅަނގުދެކުނުގައި އޮންނަ ޕެންޒީގައި، ގޮތް ނޭނގޭ އެ ބަލި ޖެހިގެން އެތައް ބަޔަކު ވަނީ މަރުވެފައެވެ.
ބޭހާއި ޓެސްޓު ކިޓުތަކުގެ އެހީގައި، އެ ބަލި ދެނެގަތުމުގައި ސިއްޙީ މާހިރުން އެހީތެރިވެދޭނެ ކަމަށް ޑަބްލިޔުއެޗްއޯއިން ބުންޏެވެ. އެ ޖަމްޢިއްޔާއިން ބުނި ގޮތުގައި، އެ ބަލި ދެނެގަތުމަށް ހަދަމުންދާ ތަހުލީލުތަކަށްފަހު އެއްކުރެވޭ މަޢުލޫމާތުތައް ވަރަށް އަވަހަށް ޙިއްސާކުރާނެއެވެ.
"އަޅުގަނޑުމެން އެންމެ އިސްކަމެއް ދޭނީ މިކަމުގެ އަސަރުކޮށްފައިވާ އާއިލާތަކަށާއި މުޖުތަމަޢުތަކަށް އެހީތެރިކަން ފޯރުކޮށްދިނުމަށް،" ޑަބްލިއުއެޗްއޯގެ އެފްރިކާގެ ރީޖަނަލް ޑިރެކްޓަރު މެޓްޝިޑިސޯ މޯޓީ ވިދާޅުވިއެވެ.
"މި ބަލިޖެހޭ ސަބަބާއި ފެތުރޭ ގޮތްތައް ދެނެގަނެ، ވީހާވެސް އަވަހަކަށް އެކަށީގެންވާ ގޮތެއްގައި ބަލިން ރައްކާތެރިވުމަށް، ކުރެވެން ހުރި ހުރިހާ މަސައްކަތެއް ކުރެވެމުން އެބަދޭ."
ކޮންގޯގެ ޞިއްޙީ ވުޒާރާއާ ހަވާލާދީ ޑަބްލިއުއެޗްއޯއިން ބުނެފައިވާ ގޮތުގައި، ގޮތް ނޭނގޭ އެ ބަލި ޖެހިގެން މިހާތަނަށް ރިޕޯޓުކޮށްފައިވާ ޖުމްލަ 394 މީހުންގެ ތެރެއިން 30 މީހަަކު ވަނީ މަރުވެފައެވެ. ނަމަވެސް ކޮންގޯގެ ބައެއް ރަސްމީ އިދާރާތަކުން ބުނާ ގޮތުގައި، މިދިޔަ މަހުގެ ތެރޭގައި ޕެންޒީ ސަރަޙައްދުން ގޮތް ނޭނގޭ ބަލި ޖެހިގެން 143 މީހަކު ވަނީ މަރުވެފައެވެ.
މި ބަލީގެ އަލާމާތްތަކުގެ ތެރޭގައި ބޮލުގައި ރިހުން، ކެއްސުން، ހުން އައުން، ނޭވާލާން އުނދަގޫވުން އަދި ލޭ މަދުވުން ހިމެނޭ ކަމަށް ޑަބްލިއުއެޗްއޯއިން ވަނީ ބުނެފައެވެ.