ވީއައިއޭގެ އައު ޓަރމިނަލް ހުޅުވުން އަވަސް ކުރުމަށް ދަނީ މަސައްކަތް ކުރަމުން: ވަޒީރު އަމީން

ވެލާނާ އިންޓަރނޭޝަނަލް އެއާޕޯޓުގެ އައު ޓާމިނަލް ހުޅުވުމަށް ކުރިން ކަނޑައަޅާފައި އޮތް ތާރީޚަށްވުރެ އަވަސް ތާރީޚެއްގައި އެތަން ހުޅުވައި ޚިދުމަތް ދިނުމަށް މަސައްކަތް ކުރަމުންދާކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު މިފަދައިން ވިދާޅުވީ ބައިނަލްއަޤްވާމީ ވައިގެ ދަތުރު ފަތުރުގެ ދުވަހާ ގުޅިގެން ދެއްވި ޚިތާބުގައެވެ.

ބައިނަލްއަޤްވާމީ ވައިގެ ދަތުރު ފަތުރުގެ ދުވަހުގެ މުނާސަބަތުގައި ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވަނީ 21 ވަނަ ޤަރުނާ ހަމައަށް ވާޞިލްވިއިރު މަދަނީ ވައިގެ ދަތުރުފަތުރަކީ ހަމައެކަނި މީހުން އެއްތަނުނަށް އަނެއްތަނަށް ދަތުރުކުރުމަށް ބޭނުން ކުރާ ވަޞީލަތެއް ނޫންކަން ފާހަގަކުރައްވާފައެވެ. މި ޒަމާނުގައި ވައިގެ ދަތުރުފަތުރަކީ އިޤްތިޞާދީ އަދި އިޖުތިމާޢި ކުރިއެރުމާއި ތަރައްޤީގެ "އިންޖީނު" ކަންވެސް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ ރާއްޖެ ހިމެނެނީ ވައިގެ ދަތުރުފަތުރުގެ ވައްޓަފާޅިއަށް އައި ޒަމާނީ ބަދަލުތަކާއި ފުރިހަމައަށް ފައިހަމަކޮށް ތަރައްޤީވަމުން އަންނަ ޤައުމުތަކުގެ ތެރޭގައިކަމަށެވެ. އަދި ރައީސުލްޖުމްހޫރިއްޔާގެ ސިޔާސަތުތަކާއި އެއްގޮތަށް ރާއްޖޭގޭ އެއަރލައިންތަކުންވެސް ތަފާތު މަރުކާގެ ބޯޓުތައް ގެނެސް އޮޕަރޭޝަން ފުޅާކުރުމުގެ މަސައްކަތް ކުރަމުންއަންނަކަން ވަޒީރު ފާހަގަކުރެއްވިއެވެ. އެގޮތުން ޤައުމީ އެއަރލައިން މޯލްޑިވިއަންގެ ފުރަތަމަ ވައިޑް-ބޮޑީ މަތިންދާ ބޯޓު ރާއްޖެގެނެސް ބައިނަލްއަޤްވާމީ އިތުރު މަންޒިލްތަކަށް މޯލްޑިވިއަންގެ ދަތުރުތައް ފެށޭނަކަމަށް ވަޒީރު ވިދާޅުވިއެވެ.

މީގެ އިތުރުން ދިވެހިންގެ މައި ދޮރާށީ ވެލާނާ އިންޓަރނޭޝަނަލް އެއަޕޯޓުގެ އައު ބައިނަލްއަޤްވާމީ ޓާމިނަލް ހުޅުވުމުގެ މަސައްކަތް ވަރަށް ހަލުއި ކަމާއެކު ކުރިއަށްދާކަމަށެވެ. ސަރުކާރުގެ އިސްނެގުމާއެކު މިހާރު މަސައްކަތް ކުރަމުން މިދަނީ ކުރިން ކަނޑައެޅި ތާރީޚަށްވުރެ އަވަސް ތާރީޚެއްގައި އައު ޓަމިނަލް ހުޅުވާއި ޚިދުމަތް ދޭން ފެށުމަށްކަމަށެވެ.

މިކަމުގެ ސަބަބުން ރާއްޖެއާއި ބޭރުގެ އެއާލައިންތަކުގެ އުދުހުމުގެ ހަރަކާތްތައް އިތުރުކުރެވި ފަސިންޖަރުންނަށް މިހާރަަށްވުރެ ފެންވަރު ރަނގަޅު ޚިދުމަތްތައްކެއް ފޯރުކޮށްދެވޭނެކަމަށް ވަޒީރު ވިދާޅުވިއެވެ. މީގެ އިތުރުން ވަޒީރު ވަނީ ރާއްޖޭގެ މަދަނީ އުދުހުމުގެ ސިނާޢަތް ސިންދަފާތުކުރުމުގެ ގޮތުން ރާއްޖޭގައި ހެލިކޮށްޕްޓރަ އޮޕަރޭޝަންތައް އަލުން ފެށުމަށް ތައްޔާރުވަމުންދާކަން ފާހަގަކުރައްވާފައެވެ.

"މެޑިކަލް އިވެކުއޭޝަން ހިމެނޭ ގޮތަށް މި ޚިދުމަތް ފެށުމާއެކު ރިސޯޓްތަކާއި އެއަޕޯޓާއި ދެމެދު ފަތުރުވެރިން ވައިގެ މަގުން އުފުލުމުގެ ޚިދުމަތް ލިބިގެންދާނެ. އަދި ރާއްޖޭގައި އެއަޕޯޓުތައް ނެތް އެކި ސަރަޙައްދުތަކަށްވެސް ރޭގަނޑު ދަތުރުކުރުމުގެ ފުރުޞަތު ފަހިވެގެންދާނެކަމަށް. ސަލާމަތާއި ރައްޖާތެރިކަމުގެ މިންގަނޑުތަކާ އެއްގޮތަށް މިފަދަ އުދުހުންތައް ރާއްޖޭގައި ފުޅާވަމުން އިޤްތިޞާދީ އަދި އިޖުތިމާޢި ފައިދާ އިތުރުވެގެންދާނެ" ދަތުރުފަތުރާއި މަދަނީ އުދުހުންތަކާ ބެހޭ ވަޒީރު ވިދާޅުވިއެވެ.

އައު ޓާމިނަލް ހުޅުވާ ތާރީޚު އަވަސް ކުރުމަށް މަސައްކަތް ކުރަމުން އަންނައިރު، އެޓާމިނަލް އަންނަ އަހަރުގެ މެދުތެރޭގައި ބޭނުންކުރަން ފަށާނެ ކަމަށް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް، އެމްއޭސީއެލްއިން މީގެ ކުރިން ވިދާޅުވެފައިވެއެވެ.

ވަޒީރު އަމީން ވިދާޅުވީ އިންޓަރނޭޝަނަލް ސިވިލް އޭވިއޭޝަން އޯގަނައިޒޭޝަން، އައިކާއޯގެ މިންގަނޑުތަކާއި އެއްގޮތަށް ރާއްޖެއިން މަސައްކަތް ކުރާ މިންވަރު ބެލުމަށް އަންނަ އަހަރުގެ މެދުތެރޭފައި އައިކާއޯގެ ފަރާތުން ރާއްޖެއަށް ޒިޔާރަތްކޮށް އޮޑިޓްއެއް ކުރިއަށްގެންދިޔުމަށް ހަމަޖެހިފައިވާކަމަށެވެ. ވަޒީރު ވަނީ ސަރުކާރުގެ ސިޔާސަތުގެ ދަށުން ސިވިލް އޭވިއޭޝަން އޮތޯރިޓީން ކުރަމުންގެންދާ މަސައްކަތުން އައިކާއޯ އޮޑިޓްގައި ފަޚުރުވެރި ނަތީޖާއެއް ރާއްޖެއަށް ލިބިގެންދާނެކަމަށް ވިދާޅުވެފައެވެ.