2023ވަނަ އަހަރުގެ ޖުލައި މަހުން ފެށިގެން ޖަލުގައި ހުންނެވި ޕާކިސްތާނުގެ ކުރީގެ ބޮޑުވަޒީރު އިމްރާން ޚާން، އޭނާއަށް ތާއީދުކުރާ މީހުން އަންނަ ހަފުތާގައި މުޒާހަރާއެއް ބޭއްވުމަށް ގޮވާލައްވައިފިއެވެ. އޭނާ މި ކަމަށް އެދިވަޑައިގެންފައި ވަނީ އެ ޤައުމުގެ ވެރިރަށް އިސްލާމްއާބާދުގައި އޭނާގެ ސިޔާސީ ޕާޓީން އެއްވުންތަކެއް ބާއްވައި ބޮޑެތި ހަމަނުޖެހުންތަކެއް ހިންގިތާ ދުވަސްކޮޅެއް ފަހުންނެވެ.
އެކްސްގައި ކުރެއްވި ޕޯސްޓެއްގައި ޚާންވަނީ އޭނާގެ ޕާޓީ، ޕާކިސްތާން ތަހްރީކް އިންސާފް (ޕީޓީއައި)ން ވެރިކަންކުރާ ޚައިބަރު ޕަޚްތުންޚްވާ ޕްރޮވިންސުގެ ވެރިރަށް ޕެޝާވަރަށް އޭނާއަށް ތާޢީދުކުރާ ފަރާތްތައް ޑިސެމްބަރު މަހުގެ 14ވަނަ ދުވަހު ޖަމަޢުވުމަށް އެދިވަޑައިގެންފައެވެ.
އިސްލާމްއާބާދުގައި ނޮވެމްބަރު މަހުގެ 25ވަނަ ދުވަހު ހިންގި ހަމަނުޖެހުންތަކުގައި 12އަށްވުރެ ގިނަ މީހުން މަރުވިކަން ފާހަގަކުރައްވާ ޚާން ވިދާޅުވީ އެ ހާދިޘާގެ މައްޗަށް ޝަރުޢީ ތަހުޤީގެއް ހިނގަންޖެހޭކަމަށެވެ. އަދި މިދިޔަ އަހަރުގެ މެއި މަހުގެ 9ވަނަ ދުވަހު ހިންގި ހަމަނުޖެހުންތަކުގައި 8 މީހުން މަރުވި މައްސަލަ ވެސް ބަލަންޖެހޭ ކަމަށް އޭނާ ވިދާޅުވިއެވެ. އޭގެ އިތުރުން ހައްޔަރުކޮށްފައިވާ ހުރިހާ ސިޔާސީ މަސައްކަތްތެރިން މިނިވަން ކުރަން ވެސް އޭނާ ޝަރުތުކުރެއްވިއެވެ. އެ ގޮތަށް ކަންތައް ނުކޮށްފިނަމަ މަދަނީ ބަސްނޭހުމުގެ ޙަރަކާތެއް އަނެއްކާ ވެސް ފަށްޓަވާނެކަމުގެ އިންޒާރު އޭނާ ދެއްވިއެވެ.
"މި ކަންތައްތައް މިގޮތަށް ކުރިއަށް ނުގެންދާނަމަ ޑިސެމްބަރު މަހުގެ 14ވަނަ ދުވަހު މަދަނީ ބަސްނޭހުމުގެ ޙަރަކާތެއް ފަށާނަން. އޭގެ ސަބަބުން ނިކުންނަ ކޮންމެ ނަތީޖާއެއްގެ ޒިންމާ އުފުލަންޖެހޭނީ ސަރުކާރުން،" ޚާން ވިދާޅުވިއެވެ.
ނޮވެމްބަރު 25ވަނަ ދުވަހު ބޭއްވި ހިނގާލުމުގައި މީހަކު މަރުވިކަން ޕާކިސްތާނުގެ ސަރުކާރުން ދޮގުކުރެއެވެ. ސަރުކާރުން ބުނާގޮތުގައި ޚާނަށް ތާޢީދުކުރާ މީހުން ވަނީ މިދިޔަ އަހަރުގެ މެއި މަހުގެ 9ވަނަ ދުވަހު އަސްކަރީ މަޤާމުތަކަށް ޙަމަލާ ދީފައެވެ.
މެއި 9ގެ ޙަމަލާތައް ރާއްވަވައި ހިންގުމަށް އިރުޝާދު ދެއްވި ކަމުގެ ތުހުމަތުގައި ޚާންގެ މައްޗަށް ވަނީ ދަޢުވާކޮށްފައެވެ. އޭނާވަނީ އެ ތުހުމަތުތަކަށް އިންކާރުކުރައްވާފައެވެ. މި ދައުވާއަކީ މިދިޔަ އަހަރުގެ ފަހުކޮޅުން ފެށިގެން ޚާންގެ މައްޗަށް އުފުލާފައިވާ އެތައް މައްސަލައެއްގެ ތެރެއިން އެންމެ ފަހުގެ ދައުވާއެވެ. އޭނާގެ
ޕާޓީން ބުނީ މި ދައުވާތަކަކީ 2022ވަނަ އަހަރު ޚާންގެ ވެރިކަމުން ވައްޓާލުމުގެ ކުރިން، އަސްކަރިއްޔާގެ ވެރިންނާ އޭނާ ދެބަސްވެވަޑައިގަނެފައިވާތީ ސިޔާސީ މައިދާނުން އޭނާ އެއްކިބާކުރުމަށް ކުރާ މަސައްކަތްތަކެއް ކަމަށެވެ. އެ ތުހުމަތުތައް އަސްކަރިއްޔާއިން ދޮގުކުރެއެވެ.