އެމެރިކާގެ ހުޅަނގުގައި އޮތް ކެލިފޯނިޔާ ސްޓޭޓަށް އައި ބާރުގަދަ ބިންހެލުމަކާ ގުޅިގެން ސުނާމީއެއްގެ އިންޒާރުދިނުމާ އެކު، އެ ސްޓޭޓްގައި ޕެސިފިކް ކަނޑުގެ އައްސޭރިފަށުގައި ދިރިއުޅޭ ރައްޔިތުން ރައްކާތެރި ހިސާބުތަކަށް ބަދަލުކޮށްފިއެވެ. އެ ސަރަޙައްދަށް އައި ބިންހެލުން ރެކޯޑު ކުރެވިފައި ވަނީ ރިކްޓަރ މިންގަނޑު 7ގައެވެ. ނަމަވެސް، 90 މިނެޓަށް ފަހު ސުނާމީގެ އިންޒާރު ވަނީ ބާޠިލު ކޮށްފައެވެ.
ބިންހެލުމާ ގުޅިގެން އެއްވެސް މީހެއްގެ ފުރާނައަށް ނުރައްކާވެފައި ނުވާ ކަމުގައި އެ ޤައުމުގެ ކަމާގުޅޭ އިދާރާތަކުން ހާމަކުރިއެވެ. އަދި، ޢުމްރާނީ ވަސީލަތްތަކަށް ވެސް ބޮޑެތި ގެއްލުންތަކެއް ލިބިފައެއް ނެތެވެ. ނަމަވެސް، ބިންހެލުމުގެ ލޮޅުންތަކުގެ އަސަރު ކޮށްފައިވާ ސަރަޙައްދުތަކުގެ ޢުމްރާނީ ވަސީލަތްތަކަށް އެއްވެސް ގެއްލުމެއް ލިބިފައިނުވާ ކަން ކަށަވަރު ކުރުމަށް ކަމާ ގުޅޭ އިދާރާތަކުން ދަނީ މަސައްކަތް ކުރަމުންނެވެ.
އެމެރިކާގެ މޫސުމާ ބެހޭ އިދާރާ، ނޭޝަނަލް ވެދަރ ސަރވިސް (އެންޑަބްލިޔުއެސު)ން ބުނީ، ބިންހެލުމާ ގުޅިގެން ކެލިފޯނިޔާގެ އައްސޭރިފަށުގެ 800 ކިލޯމީޓަރުގެ ސަރަޙައްދެއްގެ އިތުރުން، އެ ސްޓޭޓާ އިންވެގެން އޮތް އޮރިގަން ސްޓޭޓްގެ އަައްސޭރިފަށުގެ ސަރަޙައްދުތަކަށް ވެސް ސުނާމީ އިންޒާރު ކޮށްފައިވާނެ ކަމުގައެވެ. އެ ދެ ސްޓޭޓްގައި 4.7 މިލިޔަން މީހުންގެ އާބާދީއެއް ދިރިއުޅެއެވެ. ބިންހެލުން އައިސްފައި ވަނީ އުތުރު ކެލިފޯނިޔާގެ ހުޅަނގުގައި އޮތް ފަރންޑޭލްގެ ސަރަޙައްދަށް، ބިމުގެ 39 ކިލޯމީޓަރު އަޑިއަށެވެ.
ބިންހެލުމާ ގުޅިގެން 1,400އެއްހާ މީހުންގެ އާބާދީއެއް އޮތް ފަރންޑޭލްގެ ގެދޮރާއި ވިޔަފާރިތަކުގައި ހިފައިގެންގުޅޭ ބައެއް ސާމާނަށް ގެއްލުން ލިބުނު ކަން އެ ރަށުގެ އަލިފާން ނިއްވާ އިދާރާއިން ހާމަކުރިއެވެ. "އެއީ، ވަރަށް ބާރުގަދަ ބިންހެލުމެއް، އަޅުގަނޑުމެން މިހާރު ވެސް މި ދަނީ ޢުމްރާނީ ވަސީލަތްތަކަށް ލިބިފައިވާ ގެއްލުންތައް ވަޒަން ކުރުމުގެ މަސައްކަތް ކުރަމުން،" އެ އިދާރާގެ އޮފިޝަލެއް ކަމުގައިވާ ޓޯރީ ލެންޑް ވިދާޅުވިއެވެ. ބިންހެލުމުގެ ލޮޅުންތަކުގެ އަސަރު ފަރންޑޭލާއި އިންވެގެން އޮތް ޔޫރީކާއަށް ވެސް ކުރިއެވެ.
ބިންހެލުމާ ގުޅިގެން ކެލިފޯނިޔާއަށް ޢުމްރާނީ ގޮތުން ބޮޑެތި ގެއްލުންތަކެއް ލިބިފައި ނެތް ނަމަވެސް، އެ ސްޓޭޓްގެ ގަވަރުނަރު ގެވިން ނިޔުސަމް ވަނީ އެ ސަރަޙައްދުގައި ކުއްލިހާލަތު އިޢުލާނު ކުރައްވާފައެވެ. އޭނާ ވިދާޅުވީ، ބިންހެލުމާ ގުޅިގެން ލިބިފައިވާ ގެއްލުންތަކާ މެދު ކަންބޮޑުވެ ވަޑައިގަންނަވާ ކަމަށާއި، ގެއްލުންވެފައިވާ ސަރަޙައްދުތަކުގައި ދިރިއުޅޭ ރައްޔިތުންނަށް އެހީތެރިކަން ފޯރުކޮށްދިނުމަށް މަސައްކަތް ކުރަމުންދާ ކަމުގައެވެ.