ދައުލަތަށް 69 އަހަރަށްވުރެ ގިނަ ދުވަހު ޚިދުމަތް ކުރެއްވި ނިޝާން ޢިއްޒުއްދީންގެ ޢިއްޒަތުގެ ވެރިޔާ އަލްމަރުޙޫމް މުޙައްމަދު ޒާހިރު ނަޞީރުގެ ޚިދުމަތްތަކަކީ ޤައުމީ ހަޔާތުގައި ރަންއަކުރުން ފަވާލެވޭފަދަ ޚިދުމަތްތަކެއްކަމަށާއި، އެމަނިކުފާނުގެ ޙަޔާތްޕުޅަކީ ޢިބުރަތުން ފުރިގެންވާ ހަޔާތްޕުޅެއްކަމަށް ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމް ވިދާޅުވެއްޖެއެވެ.
އަލްމަރުޙޫމް މުޙައްމަދު ޒާހިރު ނަޞީރުގެ ހަނދާނުގައި ބޭއްވެވި ތަޢުބީނުގެ ޖަލްސާގައި ވާހަކަދެއްކެވި އެމަނިކުފާނާ ގާތް ބޭބޭފުޅުންނާއި، އެކުގައި މަސައްކަތް ކުރެއްވި ބޭބޭފުޅުންވަނީ އެމަނިކުފާނުގެ ހަޔާތްޕުޅުގައި ގެންގުޅުއްވި ހަރުދަނާ އުޞޫލުތަކުގެ މައްޗަށް އަލިއަޅުއްވާލައްވައި ވާހަކަފުޅު ދައްކަވާފައެވެ.
img:http://s3.psmnews.mv/images/660x400/14665399666281.jpg|އަލްމަރުޙޫމް މުޙައްމަދު ޒާހިރު ނަޞީރު ގެންގުޅުއްވި ބައެއް ތަކެތި- ފޮޓޯ: ޔޫތް މިނިސްޓްރީ
ދައުލަތަށް ދިގު މުއްދަތެއް ވަންދެން ޚިދުމަތްކޮށްދެއްވި ނިޝާން ޢިއްޒުންދީންގެ ޢިއްޒަތުގެ ވެރިޔާ އަލްމަރުޙޫމް މުޙައްމަދު ޒާހިރު ނަޞީރުގެ ޚިދުމަތްތަކުގެ ތެރެއިން ކުޅިވަރުގެ ދާއިރާއަށް އެމަނިކުފާނު ކޮށްދެއްވި ޚިދުމަތްތައް ފާހަގަ ކޮށްލެވެއެވެ. އެމަނިކުފާނަކީ ދިވެހިރާއްޖޭގެ ކުޅިވަރަށް އެކި ގޮތްގޮތުން 69 އަހަރު ޚިދުމަތް ކޮށްދެއްވި ޤައުމީ ޚިދުމަތްތެރިއެކެވެ.
އަލްމަރުޙޫމް ޒާހިރު ނަޞީރުގެ ހަނދާނުގައި ބޭއްވެވި ތައުބީނުގެ ޖަލްސާގައި ވަނީ އެމަނިކުފާނުގެ ހަނދާނުގައި ހަމަހިމޭންކަމުގައި ސުކޫތެއް ގެންނަވާފައެވެ. އަދި މަރުޙޫމް ޒާހިރު ނަޞީރުގެ ހަނދާނުގައި ޔޫތް މިނިސްޓްރީން ބޭއްވެވި ތަޢުޒިޔާގެ ދަފްތަރު އެމަނިކުފާނުގެ ޢާއިލާއަށް އަރުއްވާފައިވެއެވެ.
img:http://s4.psmnews.mv/images/660x400/14665401917899.jpg|އަލްމަރުޙޫމް މުޙައްމަދު ޒާހިރު ނަޞީރު ގެންގުޅުއްވި ބައެއް ތަކެތި- ފޮޓޯ: ޔޫތް މިނިސްޓްރީ
މިޖަލްސާގައި ވާހަކަދެއްކެވި ބޭބޭފުޅުން ޒާހިރު ނަޞީރުގެ ހަނދާން އާކުރައްވައި، އެމަނިކުފާނުގެ ޚިދުމަތްތަކުގެ އަގުވަޒަން ކުރައްވައި ވާހަކަދައްކަވާފައިވެއެވެ.
މިޖަލްސާގައި ވާހަކަފުޅުދައްކަވަމުން ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމް ވިދާޅުވީ ޤައުމީ ޚިދުމަތުގައި މަރުޙޫމް ޒާހިރު ނަޞީރަކީ ބަޠަލެއް ކަމަށެވެ. އަދި، ރާއްޖޭގެ ކުޅިވަރު ބޭރު ދުނިޔެއަށް ތަޢާރަފް ކޮށްދެއްވުމުގައި ޒާހިރު ނަޞީރު މުހިންމު ދައުރެއް އަދާކުރައްވާފައިވާކަން ރައީސް މައުމޫން ފާހަގަކުރެއްވިއެވެ. މަރުޙޫމް ޒާހިރު ނަޞީރުގެ ޙަޔާތްޕުޅުގެ ކޮންމެ ހިސާބަކުންވެސް އަންނަންއޮތް ޖީލުތަކަށް ޢިބްރަތްތެރި އެތައް ފިލާވަޅުތަކެއް ދޫކޮށްދެއްވިކަމަށްވެސް ރައީސް މައުމޫން ވިދާޅުވިއެވެ.
މަރުހޫމް ޒާހިރު ނަޞީރުގެ ތައުބީނުގެ ޖަލްސާގައި ވާހަކަދައްކަވަމުން ޒާހިރު ނަޞީރާއެކު ގިނަދުވަހު މަސައްކަތްކުރެއްވި އިބްރާހީމް އިސްމާޢީލް ވިދާޅުވީ، ޒާހިރު ނަޞީރަކީ ކަންކަން ކުރެއްވުމުގައި ފަސްޖެހިވަޑައިގަންނަވާ ބޭފުޅެއް ނޫންކަމަށާއި، ދިރިއުޅުމުގައި ދިމާވާ ކޮންމެ ކަމަކުންވެސް އެކަމުގެ މިސާލު ދެއްކެވިކަމަށެވެ. ޒާހިރު ނަޞީރުގެ އެންމެ މުހިއްމު އެއް ސިފަފުޅަކީ ގަޑިއަށް ކަމޭހިއްތެވުންކަމަށް އިބްރާހީމް އިސްމާޢީލް ވިދާޅުވިއެވެ.
img:http://s4.psmnews.mv/images/660x400/14665401917899.jpg|އަލްމަރުޙޫމް މުޙައްމަދު ޒާހިރު ނަޞީރު ގެންގުޅުއްވި ބައެއް ތަކެތި- ފޮޓޯ: ޔޫތް މިނިސްޓްރީ
ޒާހިރު ނަޞީރުގެ ޢާއިލާގެ ފަރާތުން ވާހަކަދައްކަވަމުން އެމަނިކުފާނުގެ ޢާއިލާގެ ބޭފުޅެއްކަމަށްވާ ބަދުރުއްނަޞީރު ވަނީ ޒާހިރު ނަޞީރުގެ ހަޔާތްފުޅުގައި ދެއްވި އިރުޝާދުތަކުގެ ހަންދާން އާކުރައްވާފައެވެ.
އަލްމަރުޙޫމް މުޙައްމަދު ޒާހިރު ނަޞީރުގެ ހަނދާނުގައި ބޭއްވެވި ތަޢުބީނުގެ ޖަލްސާގައި ރައީސުލްހުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމާއި، ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމާއި، އުއްތަމަ ފަނޑިޔާރު އަލްއުސްތާޛް ޢަބްދުﷲ ސަޢީދު ބައިވެރިވެވަޑައިގެންނެވިއެވެ. މީގެ އިތުރުން ވަޒީރުންނާއި، ރައްޔިތުންގެ މަޖިލީހުގެ މެންބަރުންގެ އިތުރުން ދައުލަތަށް ގިނަ ދުވަހު ޚިދުމަތްކުރެއްވި ޢިއްޒަތްތެރިންނާއި، ކުޅިވަރުގެ ދާއިރާގައި ފާހަގަކޮށްލެވޭ ބޭބޭފުޅުން ބައިވެރިވެވަޑައިގެންނެވިއެވެ.
މިޖަލްސާގައި ޒާހިރު ނަޞީރުގެ ޤައުމީ ޚިދުމަތުގެ މައްޗަށާއި، ކުޅިވަރުގެ ދާއިރާއަށް ކޮށްދެއްވި ޚިދުމަތްތަކުގެ މައްޗަށް ޚާއްޞަ ވީޑިއޯ ޕްރެޒެންޓޭޝަނެއްވެސް ހުށައަޅާދީފައިވެއެވެ. މީގެއިތުރުން އެމަނިކުފާނުގެ ހަޔާތްޕުޅުގެ އެކި ހިސާބުގައި ބޭނުންކުރެއްވި ބައެއް ތަކެއްޗާއި، ލިބިފައިވާ ބައެއް އެވޯޑްތައްވެސް ދައްކާލާފައިވެއެވެ.