ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނައުމަށް އެމެރިކާގެ އިންތިޚާބީ-ރައީސް ޑޮނަލްޑް ޓްރަމްޕް މަސައްކަތް ފަށްޓަވައިފިއެވެ. ޔަހޫދީންގެ އަމަލުތަކާ ގުޅިގެން ޢުދުވާންތައް ހުއްޓުމަކަށް ގެނައުމަށް ކުރަމުން ދިޔަ މަޝްވަރާތައް މެދުކެނޑިފައިވާއިރު، މަޝްވަރާތައް އަލުން ފެށުމާ ގުޅޭ ގޮތުން ވާހަކަ ދެއްކުމަށް ޓްރަމްޕް ވަނީ އޭނާގެ އިސް މަންދޫބެއް މެދުއިރުމައްޗަށް ފޮނުއްވާފައެވެ.
2025 ޖަނަވަރީ 20ވަނަ ދުވަހު ވެރިކަމާ ޙަވާލުވެ ވަޑައިގަންނަވާ ޓްރަމްޕްގެ ސަރުކާރުގައި މެދުއިރުމައްޗަށް ކަނޑައަޅުއްވާނެ މަންދޫބަކީ ސްޓީވް ވިޓްކޮފެވެ. ޓްރަމްޕްގެ އިރުޝާދުގެ ދަށުން، އޭނާ ވަނީ ޤަޠަރާއި ޒަޔަނިސްޓު އިސްރާއީލަށް ދަތުރުފުޅެއް ކުރައްވައި، އެ ދެ ޤައުމުގެ ވެރިންނާ ބައްދަލު ކުރައްވާފައެވެ. ޢުދުވާން ހުއްޓުމަކަށް ގެނައުމާ ގުޅޭ މަޝްވަރާތަކުގައި މެދުވެރިއެއްގެ ދައުރު އަދާ ކުރަމުން ދިޔަ ޤަޠަރުގެ ވެރިރަށް ދަވްޙާއަށް ކުރެއްވި ދަތުރުފުޅުގައި އޭނާ ވަނީ ބޮޑުވަޒީރު އަލް-ޝައިޚް މުޙައްމަދު ޢަބްދުއްރަޙްމާން އަލް-ޘާނީއާ ބައްދަލު ކުރައްވާފައެވެ. އެއަށްފަހު، އިސްރާއީލަށް ވަޑައިގަންނަވައި ޔަހޫދީންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫއާ ވެސް އޭނާ ބައްދަލު ކުރެއްވިއެވެ.
ޝައިޚް މުޙައްމަދާއި ނިރުބަވެރި ނަތަންޔާހޫއާ އެކު ބޭއްވެވި ބައްދަލުވުމުގައި، 14 މަހުގެ މަސައްކަތަށް ފަހު ނާކާމިޔާބުވެފައިވާ މަޝްވަރާތަކުގެ އޮއިވަރު ބަދަލު ކުރުމަށް ވިޓްކޮފް މަސައްކަތް ކުރައްވާފައިވާ ކަމުގައި، ބައްދަލުވުންތަކުގެ މަޢުލޫމާތު އިނގޭ މަޞްދަރުތަކުން ހާމަކުރިއެވެ. ޓްރަމްޕްގެ އަމާޒަކީ، ވެރިކަމާ ޙަވާލުވެ ވަޑައިގެންނެވުމުގެ ކުރިން ޔަހޫދީންގެ ލާއިންސާނީ ޖަރީމާތަކަށް ނިމުމެއް ގެންނެވުމެވެ. އަދި، ޣައްޒާގައި ވެރިކަން ކުރާ ޙަމާސް ޖަމާޢަތުން ރަހީނު ކޮށްފައިވާ އަސީރުން ޖަނަވަރީ 20ގެ ކުރިން މިިނިވަން ނުކޮށްފި ނަމަ، މެދުއިރުމަތީގެ މަސްރަޙު "ނަރަކައިގެ" ހާލަތަކަށް ބަދަލު ކޮށްލާނެ ކަމުގައި ވިދާޅުވެ، ޓްރަމްޕް ވަނީ ޙަމާސަށް އިންޒާރު ދެއްވާފައެވެ.
ޔަހޫދީންގެ ޢުދުވާނުގެ އެންމެ ބޮޑު މަދަދުގާރު ކަމުގައިވާ ރައީސް ޖޯ ބައިޑަންގެ ސަރުކާރުން ވެސް ދަނީ ޤަތުލުޢާންމު ހުއްޓުވުމުގެ ނަމުގައި މަސައްކަތްތަކެއް ކުރަމުންނެވެ. ޔަހޫދީ ނަތަންޔާހޫ ކުރިމަތިކުރަމުން ދިޔަ ހުރަސްތަކާ ގުޅިގެން، މަޝްވަރާތަކުގައި މެދުވެރިއެއްގެ ދައުރު އަދާ ކުރަމުން ދިޔަ ޤަޠަރުން ވަނީ އެ ކަމާ ފެޔަށް ޖެހިފައެވެ. ނަމަވެސް، ވިޓްކޮފާ އެކު ޝައިޚް މުޙައްމަދު ބޭއްވެވި ބައްދަލުވުމާ އެކު، އެ ޒިންމާތަަކަށް ޤަޠަރުން ރުޖޫއަވެފައިވާ ކަމަށް ބެލެވެއެވެ.
މަޝްވަރާތައް ވިލަރެސް ކުރުމުގައި ޤަޠަރާ އެކު މިޞްރުން ވެސް ދަނީ ބައިވެރިވަމުންނެވެ. މަޝްވަރާތައް އަލުން ފެށުމާ ގުޅޭ ގޮތުން ވާހަކަދެއްކުމަށް ޙަމާސްގެ އިސް އޮފިޝަލުންގެ ވަފުދެއް ހުސްވި ހަފުތާގައި މިޞްރުގެ ވެރިއަށް ޤާހިރާއަށް ދަތުރުކޮށްފައިވެއެވެ. އަދި، ކުރިއަށް އޮތް ދުވަސްތަކުގައި ޙަމާސްގެ ޓީމެއް ދަވްޙާއަށް ދަތުރު ކުރާނެ ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ.
މެދުއިރުމައްޗަށް ޓްރަމްޕްގެ ސަރުކާރުން ކަނޑައަޅަން ނިންމާފައިވާ މަންދޫބު، ވިޓްކޮފަކީ ރިޔަލް-އެސްޓޭޓްގެ ދާއިރާގައި ވިޔަފާރި ކުރާ މީހެކެވެ. އަދި، ޚާރިޖީ ދާއިރާގެ އެއްވެސް ތަޖުރިބާއެއް ހުރި ބޭފުޅެއް ނޫނެވެ. ނަމަވެސް، އޭނާއަކީ ޤަޠަރާއި ގަލްފުގެ ޤައުމުތަކާ އެކު ވިޔަފާރީގެ ގުޅުންތައް ބާއްވަމުންދާ މީހެއް ކަން ފާހަގަ ކޮށްލަން ޖެހެއެވެ.
ސުލްޙައިގެ މަޝްވަރާތައް އަލުން ފެށުމުގެ މަސައްކަތް ކުރިއެރުވުމަށް ނޮވެންބަރު 24ވަނަ ދުވަހު ޝައިޚް މުޙައްމަދު ވަނީ އޮސްޓްރިޔާގެ ވެރިރަށް ވިއެނާއަށް ވަޑައިގަންނަވާފައެވެ. އަދި، މަޝްވަރާތަކުގައި ޒަޔަނިސްޓުން ތަމްސީލު ކުރާ ޔަހޫދީ ޖާސޫސީ އިދާރާގެ ވެރިޔާ ދަވީދު ބަޣުނެޔާއާ ބައްދަލު ކުރައްވާފައެވެ. "މެދުވެރިން ބޭނުންކޮށް ޙަމާސާއި އިސްރާއީލާ ދެމެދު ދަވްޙާގައި މަޝްވަރާ ބައްދަލުވުންތަކެއް ބޭއްވުމަށް މިހާރު ދަނީ ތައްޔާރުވަމުން،" މަޢުލޫމާތު އިނގޭ މަޞްދަރަކުން ބުންޏެވެ. ނަމަވެސް، އެ ބައްދަލުވުންތައް ބާއްވާނެ ތާރީޚެއް ސާފެއް ނޫނެވެ.
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,532އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 105,538 މީހުން ޒަޚަމު ކޮށްލާފައެވެ.