ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތަކީ ގިނަ ދުވަސްތަކަކަށް ފަހު 'މަރުވެފައި' އޮތް ގަލޮޅު ދަނޑަށް އަލުން ދިރުން ގެނުވި މުބާރާތެކެވެ. މި މުބާރާތް ބޭއްވުމުގެ މަގްސަދަކީވެސް ރާއްޖޭގައި ފުޓްބޯޅައަށް އޮތް ފޯރި އަލުން އާލާކޮށް، ވަކިން ހާއްސަކޮށް މާލޭގައި ފަނޑުވަމުން އައި ފުޓްބޯޅަ ފޯރި އަލުން އިޔާދަކޮށް ގަލޮޅު ދަނޑަށް ސަޕޯޓަރުން ވެއްދުމެވެ.
ޖުމްލަ 17 ޓީމެއް ވާދަކުރަމުން އަންނަ މި މުބާރާތުގައި ކޮންމެ ޓީމަކަށްވެސް އާ ޖޯޝެއް ގެނެސްދެނީ ސަޕޯޓަރުންނެވެ. އެކި އެކި މެޗުތައް ހިނގަމުން ދިޔައިރު ސަޕޯޓަރުން އަޑުތައް އާހާލީމެވެ. އާދަޔާ ހިލާފު ސަޕޯޓެއްދޭ އެއް ޓީމަކީ ފުވައްމުލައް ސިޓީއެވެ.
ފުވައްމުލައް ސިޓީގެ ސަޕޯޓަރުންގެ ތެރޭގައި އޮތް ފޯރިއަކީ މެޗުގައި ކުޅުންތެރިން ދައްކާ ހިތްވަރު އިތުރުވެ ކުޅުންތެރިންގެ މެދުގައިވެސް ފޯރި ހިފާ ކަމެކެވެ. އަދި ރަށުގެ އެކި އުމުރުފުރާގެ ސަޕޯޓަރުން ގަލޮޅު ދަނޑަށް ޖަމާވާއިރު، ބައެއް މީހުން އަންނަނީ ހުޅުމާލެ ފޭސް 2 އިންނެވެ. ބައެއް މީހުން އަންނަނީ ދަޅު، ފުޅި އަދި ލުއި ކާނާ ހިފައިގެން ސަޕޯޓަރުންނަށް ބެހުމަށެވެ. އަނެއް ބަޔަކު ތިބެނީ ގަލޮޅު ދަނޑަށް ނުދެވޭތީ ރަށުގައި ބޮޑެތި ސްކްރީންތައް ޖަހައިގެން ފޯރީގައި ރަށުގެ ކުޅުން ބަލާށެވެ.
ރ އަލިފުށީގެ ސަޕޯޓަރުންވެސް ތަފާތެވެ. އަޑުވެސް ގަދައެވެ. ފޯރީގައި ކުޅުންތެރިންނަށް ސަޕޯޓު ދިނުމުގެ އިތުރުން އަލިފުށި ސަޕޯޓަރުން އެހެން ނަމޫނާއެއްވެސް ދައްކައެވެ. ސިޑިބަރީގައި އިށީންދެތިބޭ ސަޕޯޓަރުން މެޗު ނިންމާފައިދަނީ އެތަން ސާފުކުރުމަށްފަހު އެވެ. ހުރިހާ ކުނި ބުނި ނަގާ ޑަސްބިނަށް އަޅައެވެ. ސާފުތާހިރު ކުރުމުގައި ނަމޫނާ ދައްކައެވެ. އަލިފުށި ސަޕޯޓަރުން ރަށުގެ ބަނދަރުމަތީގައި ބޮޑު ސްކްރީނު ޖަހައިގެންވެސް މެޗު ބަލަން ތިބެނީވެސް އެހާ ފޯރީގައެވެ. ދަނޑެއް ނޫނަސް ގަލޮޅު ދަނޑަށްވުރެ އެ ރަށުން ނަގާ ފޯރި ބޮޑޭ ދެންނެވިދާނެއެވެ.
އަނެއްކޮޅުން ބ. އޭދަފުށީގެ ސަޕޯޓަރުންނަކީވެސް ވަރަށް ތަފާތު ބައެކެވެ. އެހާމެ އަޑު ގަދައެވެ. ކުޅުންތެރިންނަށް އިތުރު ޖޯޝެއް އެވެރިންގެ އަޑުން ގެނެސްދެއެވެ. އަންހެންވެރިންވެސް ގިނައެވެ. ރަށު ޓީމަށް ސަޕޯޓް ދިނުމުގައި ކުޅިވަރުގެ ރޫހާއި އެއްގޮތަށް ސަޕޯޓް ދިނުމަށް އޭދަފުށީ ސަޕޯޓަރުން ސިޑިބަރީގައި ތިބޭއިރު އިދިކޮޅު ޓީމުގެ ސަޕޯޓަރުންގެ އަޑު ކަނޑުވާލާހާ އަޑު ގަދަވާ ވަގުތުތައްވެސް އާދެއެވެ.
ދެން އޮތީ ޅ. ނައިފަރުގެ ސަޕޯޓަރުންގެ ވާހަކައެވެ. މަދު އަދަދެއްގެ މީހުންނަމަވެސް ގަދަ އަޑެކެވެ. "ގޯލަށް، ގޯލަށް" ކިޔާފައި ގޮވާއިރު ވަރުބަލިވެފައި ތިބޭ ކުޅުންތެރިންގެ ހިތްވަރު އަލުން އާލާކޮށްދީ ދަނޑުމަތީގައި އާ ޖޯޝެއް އުފައްދާދެއެވެ.
އަނެއްކޮޅުން ގދ. ފަރެސްމަތޮޑާ ސަޕޯޓަރުންވެސް އެހާ ފޯރި ނަގައެވެ. ކުޑަހުވަދޫގެ ސަޕޯޓަރުންނާއި ދިއްދޫގެ ސަޕޯޓަރުންވެސް ފޯރި ނަގައެވެ. އަޑުން އަޑުނަގާފައި ކުޅުންތެރިންނަށް ގޮވާ ގޯލެއް ޖަހާދިނުމަށް އެދޭ އަޑު މެޗު ހިނގަމުންދާއިރު އިވެއެވެ.
ގުރޫޕް ބީގައި ހިމެނެނީ މާލެ ސިޓީގެ ސަޕޯޓަރުންވެސް ދަނޑަށް ވަދެއެވެ. އެހެންނަމަވެސް މާލޭގައި ބާއްވާ މުބާރާތަކަށްވާއިރު ނިސްބަތުން މާލޭގެ ސަޕޯޓަރުން މަދެވެ.
ތ. ތިމަރަފުށި ސަޕޯޓަރުންނަކީވެސް ތަފާތު ބައެކެވެ. ޓީމަށްޓަކައި މަރުދޭ ބައެކެވެ. ވަރަށް ފޯރީގައި ކޮންމެ މެޗެއްގައިވެސް ސަޕޯޓްދިނުމުގައި ދެމި ތިބެއެވެ. އަދި ބ. ތުޅާދޫ އާއި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާގެ ސަޕޯޓަރުންވެސް ގަލޮޅު ދަނޑަށް ވަދެއެވެ. މަދު ނަމަވެސް ވަދެ ތިބޭ ސަޕޯޓަރުންގެ އަޑުން ދަނޑު ގުގުމާލާ ވަގުތުތައް އާދެއެވެ. އެކި ޓީމުތަކުގެ ސަޕޯޓަރުން ބެރު ދުންމާރީގެ އަޑު އެ ސަރަހައްދުގެ މަގުތަކަށްވެސް އިވެއެވެ. ކ. ގުރައިދޫ އާއި ކ. މާފުށީގެ ސަޕޯޓަރުންގެ އަޑުވެސް މަޑެއް ނޫނެވެ. ބައެއް ގަޑިތަކުގައި ކުޅުންތެރިންގެ ނަމުން ގޮވާ އިތުރު ހިތްވަރު ދެއެވެ. ގޯލެއް ޖަހައިދިނުމަށް އެދި ފޯރީގައި މެޗު ނިމެންދެން މި ސަޕޯޓަރުން ތިބެނީ ރަށަށް އޮންނަ ލޯތްބާއި ފުޓްބޯޅައަށް އޮންނަ ޝައުގެއްގެ ބޮޑުކަމުން ކަމަށް ބައެއް ސަޕޯޓަރުން ބުންޏެވެ.
ރަށްރަށުގެ ސަޕޯޓަރުންގެ ފޯރި މި މުބާރާތުގައި އެއް މެޗަށްވުރެ އަނެއް މެޗުގައި ވަރުގަދަ ކުރުމަށް ސަޕޯޓަރުން ބަލައެވެ. އެހެންނަމަވެސް މީގެ ކުރިން ފުޓްބޯޅައިގެ ލެޖެންޑުންކަމުގައިވާ، މަޝްހޫރު ކީޕަރު އިމްރާން މުހައްމަދާއި، އާއި ގައުމީ ކެޕްޓަން އަލީ އަޝްފާގް (ދަނގަޑޭ) އާއި އަކްރަމް އަބްދުލްޣަނީ އާއި އެ ފެންވަރުގެ ކުޅުންތެރިން މެޗުތައް ކުޅުނު އިރު އޮންނަނީ ދަނޑުގެ ސިޑިބަރިއާއި ގޮނޑިތައް ފުރޭވަރަށް ޓިކެޓްވިކި ހުސްވެފައެވެ.
މިހާރު ކުރިޔަށްދާ މުބާރާތުގައިވެސް "ގަދަ ކުޅުންތެރިން" ކުޅެއެވެ. އަރަމުން އަންނަ ތަރިންނާއި ފުރަތަމަ ޑިވިޝަނުގައި ކުޅޭ މަޝްހޫރު ކުޅުންތެރިންނާއި، ރާއްޖޭން ބޭރުގެ ހުނަރުވެރި ކުޅުންތެރިންވެސް މި މުބާރާތުގައި އެބަ އުޅެއެވެ. އެހެންކަމުން މި މުބާރާތުގައިވެސް ސިޑިބަރި ނުފުރެންވީ ސަބަބެއްނެތެވެ. ދިވެހިންގެ ލޭ ކައްކުވާލާ މި ކުޅިވަރަށް އޮތް ފޯރިއާއި ރާއްޖޭގެ ފުޓްބޯޅައަށް އޮތް ލޯބި އާލާކޮށް އަލުން އެންމެން "ގަލޮޅު ދަނޑަށް" އަންނަން މިއީ ރަނގަޅު ދަނޑިވަޅެކެވެ.
ޖުމްލަ 17 ޓީމެއް ވާދަކުރަމުން އަންނަ މި މުބާރާތުގައި ހަތަރު ގުރޫޕަކަށް ބަހާލައިގެން ކުޅޭއިރު މިހާރު ވަނީ ދެވަނަ ބުރަށް ހޮވޭ ގިނަ ޓީމުތައްވެސް މިހާރުވަނީ އެނގިފައެވެ.
ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.