ސޫރިޔާގެ ހުޅަނގުއުތުރުގައި އޮތް ޙަލަބު ޕުރޮވިންސަށް އަތްގަދަ ކޮށްފައިވާ ހަޔިއަތު ތަޙްރީރް އަލް-ޝާމް (އެޗްޓީއެސު)ން އެ ކަމަށް ތައްޔާރުވަމުންދާތާ އަހަރެއް ފާއިތުވެފައިވާ ކަމަށާއި، އެ ރަށަށް ޙަމަލާ ދިނުން މަޑުޖެހިފައި އޮތީ ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުންދާ ލާއިންސާނީ ޢުދުވާނާ ގުޅިގެން ކަން ހާމަވެއްޖެއެވެ. އެ ކަން ހާމަ ކުރައްވަމުން ސޫރިޔާގެ އިދިކޮޅު އިއްތިޙާދުގެ ވެރިޔާ ހާދީ އަލް-ބަޙްރާ ވިދާޅުވީ، އެޗްޓީއެސުން ޙަލަބަށް އަތްގަދަ ކުރުމަށް އަސްކަރީ ހަރަކާތްތައް ފަށާފައި ވަނީ، ލުބްނާންގެ މުސްލިމުންނާ ދެކޮޅަށް ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް މެދުކަނޑައިލުމުން ކަމުގައެވެ.
ޙަލަބު ޕުރޮވިންސްގައި ތިބި ސޫރިޔާގެ އަސްކަރިއްޔާގެ ސިފައިންނަށް ޙަމަލާދީ، އެ މީހުން ފަހަތަށް ޖައްސައި، އެޗްޓީއެސްގެ ހަނގުރާމަވެރިން އެ ސަރަޙައްދަށް އަރައިގަނެފައި ވަނީ ނޮވެންބަރު 27ވަނަ ދުވަހުއެވެ. އެ ޕުރޮވިންސުގެ ވެރިރަށް، ޙަލަބް ސިޓީއާއި މައި ވައިގެ ބަނދަރު ވެސް މި ވަގުތު އޮތީ ހަނގުރާމަވެރިން އަތްދަށުގައެވެ.
ބަޙްރީ ވިދާޅުވީ، އެޗްޓީއެސްގެ ހަނގުރާމަވެރިންނަށް އެހާ ފަސޭހައިން ޙަލަބުގެ ސަރަޙައްދުތަކަށް އަތްގަދަ ކުރެވިފައި ވަނީ، ޔަހޫދީންނާ ދެކޮޅަށް ކުރަމުން ދިޔަ ހަނގުރާމައަށް ޙިޒްބުاللهގެ މުޖާހިދުންނާއި އީރާނުން ވާގިވެރިވާ ހަތިޔާރު އެޅި ޖަމާޢަތްތަކުގެ ނަޒަރު ހުއްޓިފައި އޮތުމުން ކަމުގައެވެ. ޙަލަބުގައި ތިބި ސޫރިޔާގެ އަސްކަރިއްޔާގެ ސިފައިންނަށް ޙިޒްބުاللهގެ އިތުރުން އީރާނުން ވާގިވެރިވާ ހަތިޔާރު އެޅި ޖަމާޢަތްތަކުން ދިޔައީ އެހީތެރިކަން ފޯރުކޮށްދެމުންނެވެ. ޙިޒްބުاللهއަކީ ލުބްނާންގެ މުޖާހިދުންގެ ޖަމާޢަތެކެވެ.
ސޫރިޔާގެ ރައީސް ބައްޝާރް އަލް-އަސަދުގެ ސަރުކާރާއި އަސްކަރިއްޔާއާ ދެކޮޅަށް ހަނގުރާމަ ކުރަމުންދާ ބައެއް ޖަމާޢަތްތަކަށް ތުރުކީވިލާތުން ވެސް ދަނީ ވާގިވެރިވަމުންނެވެ. ބަޙްރީ ވިދާޅުވީ، ޙަލަބަށް އަތްގަދަ ކުރަން އެޗްޓީއެސުން ތައްޔާރުވަމުން ގޮސްފައިވާ ކަމުގެ މަޢުލޫމާތު ތުރުކީވިލާތަށް ވެސް އެނގޭ ކަމުގައެވެ. ނަމަވެސް، އެ ފަދަ އެއްވެސް ހަނގުރާމައިގެ އަމަލެއްގައި ބައިވެރިނުވާނެ ކަން ތުރުކީވިލާތުން ހާމަކޮށްފައިވާ ކަމުގައި އޭނާ ވިދާޅުވިއެވެ. އެޗްޓީއެސަކީ ތުރުކީވިލާތުގެ އިތުރުން އެމެރިކާއިން ވެސް ނިރުބަވެރި ޖަމާޢަތެއްގެ ގޮތުގައި ކަނޑައަޅާފައިވާ ގުރޫޕެކެވެ.
އެޗްޓީއެސްގެ ހަނގުރާމަވެރިން ޙަލަބު ހިފުމަށް ޙަމަލާ ދޭން ފަށާފައި ވަނީ ލުބްނާން ޢުދުވާން މެދުކަނޑައިލި ދުވަހުއެވެ. "މީގެ އަހަރެއްހާ ދުވަސް ކުރިން އެ މީހުން [އެޗްޓީއެސްގެ ހަނގުރާމަވެރިން] ވަނީ ތަމްރީނުތައް ފަށައި، ރުކުރުވައިލުމުގެ މަސައްކަތް ވަރަށް ސީރިޔަސް ކޮށް ފަށާފައި،" ސޫރިޔާގެ މައި އިދިކޮޅު އިއްތިޙާދު ކަމުގައިވާ ނޭޝަނަލް ކޯލިޝަން އޮފް ސީރިޔަން ރިވޮލޫޝަން އެންޑް އޮޕޮޒިޝަން ފޯސަސްގެ ރައީސް ބަޙްރީ ވިދާޅުވިއެވެ. އެޗްޓީއެސަކީ އެ ކޯލިޝަންގެ މެންބަރެއް ނޫނެވެ.
"ނަމަވެސް ޣައްޒާ ޢުދުވާނާއި… އެއަށްފަހު ލުބުނާން ޢުދުވާނާ ގުޅިގެން އެ ކަން މަޑުޖެހުނީ. އެ މީހުންނަށް ޤަބޫލު ކުރެވުނު ގޮތުގައި، ލުބްނާންގައި ހަނގުރާމައެއް ހިނގަމުން ދިޔަ ވަގުތުގައި ސޫރިޔާގައި ހަނގުރާމަ ފެށުމަކީ ކަމުދާ މަންޒަރަކަށް ނުވީސް. އެހެންވެ، ލުބްނާން ޢުދުވާން މެދުކަނޑައިލުމާ އެކު އެ މީހުން ވަނީ ޙަމަލާ ދޭން ފަށާފައި،" އޭނާ ވިދާޅުވިއެވެ. އެ ވަގުތު ޙަލަބު ޢުދުވާން ފެށުމަކީ ޔަހޫދީންނަށް ވާގިވެރިވުމުގެ އަމަލެއްގެ ގޮތުގައި ބެލެވޭނެ ކަމަށް ހަނގުރާމަވެރިން ޤަބޫލު ކުރި ކަމުގައި ވެސް އޭނާ ވިދާޅުވިއެވެ.
ޙަލަބަށް އެޗްޓީއެސްގެ ހަނގުރާމަވެރިން ދީފައިވާ ޙަމަލާތަކަކީ، 2020ވަނަ އަހަރު ޙަމަލާ ބަދަލު ކުރުން މެދުކަނޑައިލި ފަހުން ދީފައިވާ އެންމެ ބޮޑު އަދި ނުރައްކާތެރި ޙަމަލާތަކެވެ. އަދި، ފާއިތުވި އަހަރުތަކުގެ ތެރޭގައި ބައްޝާރުގެ ސަރުކާރާއި އަސްކަރިއްޔާއަށް ކުރިމަތިވި އެންމެ ބޮޑު ގޮންޖެހުމެވެ. 2020ވަނަ އަހަރުގެ މާރިޗު މަހު ޙަމަލާ ބަދަލު ކުރުން މެދުކަނޑައިލާފައި ވަނީ ތުރުކީވިލާތާއި ރަޝިޔާއާ ދެމެދު ވެވުނު އެއްބަސްވުމެއްގެ ދަށުންނެވެ. ރަޝިޔާއަކީ އަސަދުގެ ސަރުކާރާއި އަސްކަރިއްޔާގެ އެންމެ ބޮޑު އެއް މަދަދުގާރެވެ.
ބަޙްރީ ވިދާޅުވީ، އެޗްޓީއެސްގެ ކޮންޓުރޯލުގެ ދަށަށް ޙަލަބު ގެންދިޔުމާ އެކު، ސޫރިޔާގެ ދާޚިލީ ހަނގުރާމައިގައި ގެދޮރުނެތި، އެހެން ޤައުމުތަކަށް ހިޖުރަ ކޮށްފައިވާ ސޫރިޔާގެ ރައްޔިތުންނަށް އެ މީހުންގެ ވަޒަނަށް އެނބުރި ދިޔުމުގެ ފުރުޞަތު ފަހިވެގެން ގޮސްފައިވާ ކަމުގައެވެ. ތުރުކީވިލާތުގައި ވެސް މި ވަގުތު ސޫރިޔާގެ 600,000އަށްވުރެ ގިނަ ރެފިއުޖީން އެބަތިއްބެވެ.
އެޗްޓީއެސްގެ ހަނގުރާމަވެރިން ޙަލަބު ހިފުމާ ގުޅިގެން ތުރުކީވިލާތުން ބުނީ އެ ކަމުގައި އެ ޤައުމުގެ އެއްވެސް ބައިވެރިވުމެއް، އަދި އެހީތެރިކަމެއް ނެތް ކަމުގައެވެ. ޙަލަބަށް އަތްގަދަ ކުރުމުގެ ފުރުޞަތު އެޗްޓީއެސަށް ލިބިފައި ވަނީ ލުބްނާން ޢުދުވާން ހުއްޓައިލުމުން ކަމުގައި ބަޙްރީ ވިދާޅުވި ނަމަވެސް، ޙިޒްބުاللهން އެ ކަމަށް ރައްދު ދީފައެއް ވެސް ނެތެވެ.
ލުބްނާން ޢުދުވާނުގައި ޙިޒްބުالله ބަލިކަށި ކޮށްލާފައިވުމާ އެކު، އަސަދުގެ ސަރުކާރާއި އަސްކަރިއްޔާއަށް އެހީތެރިކަން ފޯރުކޮށްދިނުމަށް އެ ޖަމާޢަތަށް ވަނީ ދަތިވެފައެވެ. އަދި، ރަޝިޔާ-ޔޫކްރެއިން ހަނގުރާމައާ ގުޅިގެން، އަސަދުގެ ވެރިކަން ދިފާޢު ކުރަން ރަޝިޔާއިން ފޯރުކޮށްދެމުން ދިޔަ އެހީތެރިކަމަށް ވެސް ވަނީ ގޮންޖެހުންތައް ކުރިމަތިވެފައެވެ. ނަމަވެސް، ޙަލަބު ދިފާޢު ކުރަން ބޭނުންވާ ހަތިޔާރާއި އަސްކަރީ ސާމާނު ފޯރުކޮށްދޭން މަސައްކަތް ކުރަމުންދާ ކަން ރަޝިޔާއިން ވަނީ ހާމަކޮށްފައެވެ.