ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިއަދު ހަވީރު ބ. ތުޅާދޫ ބަލިކޮށް، ދެވަނަ ބުރުގެ ޖާގައެއް ތ. ތިމަރަފުށިން ހޯދައިފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް ބީގެ މެޗު ތިމަރަފުށިން ކާމިޔާބުކޮށްފައިވަނީ 4-2 ގެ ނަތީޖާއަކުންނެވެ. މި ގްރޫޕުގެ އެއްވަނަ ކުޅުނު ތިން މެޗުންވެސް މޮޅުވެ ބ. އޭދަފުށިން ހޯދިއިރު، ދެވަނައަށްދިޔަ މާލެ ސިޓީއަށް ވަނީ ތިން މެޗުން ހަ ޕޮއިންޓް ލިބިފައެވެ. އަދި ދެވަނަ ބުރުގެ ޖާގައެއް ތިމަރަފުށިން ހޯދީން ތިން މެޗުން ލިބުނު ތިން ޕޮއިންޓާއެކުއެވެ. ފުލަށްދިޔަ ތުޅާދުއަށް ޕޮއިންޓެއް ލިބިފައެއް ނުވެއެވެ.
މިއަދު ހަވީރު ކުޅުނު މެޗުގެ ފުރަތަމަ ހާފުގައި ތިމަރަފުށިން ލީޑު ނެގިއިރު، މެޗުގެ 33 ވަނަ މިނެޓުގައި މި ލަނޑު ޖަހައިދިނީ އަބްދުﷲ ޒިޔާނެވެ. އަދި ދެވަނަ ހާފުގެ 16 ވަނަ މިނެޓުގައި އިބްރާހީމް ސިނާހު ވަނީ ތިމަރަފުށީގެ ލީޑު ފުޅާކޮށްދީފައެވެ. އޭގެ ހަ މިނެޓު ފަހުން ތިމަރަފުށީގެ ތިންވަނަ ލަނޑު ޖަހައިދިނީ އާދަމް ނާސިހެވެ.
އެކަމަކު މެޗުގެ 71 ވަނަ މިނެޓުގައި ތުޅާދޫން ލަނޑެއް ޖެހިއިރު، މި ލަނޑު ކާމިޔާބުކޮށްދިނީ އަޙްމަދު ރަޝީދެވެ. އަދި މެޗުގެ އިތުރު ވަގުތުގެ ދެވަނަ މިނެޓުގައި ތުޅާދޫން ފަރަގު ކުޑަކުރިއިރު، މިއީ ތިމަރަފުށީގެ އަނޫފް އަޙްމަދު އަތުން ބައިކޮޅަށް ވަން ލަނޑެކެވެ. ނަމަވެސް އޭގެ ތިން މިނެޓު ފަހުން ތިމަރަފުށިން އަލުން ލީޑު ފުޅާކުރިއިރު، މި ލަނޑު ޖަހައިދިނީ އަޙްމަދު އަފްލާޒެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރަމުން އަންނައިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.