ސްކޮޓް މެކްޓޮމިނޭ ވައްދާލި ލަނޑާއެކު ރަށުން ބޭރުގައި ޓޮރީނޯ 0-1 އިން ބަލިކޮށް، ނާޕޮލީން ތާވަލްގެ ކުރީގައި ހަތަރު ޕޮއިންޓްގެ ލީޑެއްނަގައިފިއެވެ.
މި ނަތީޖާއާއެކު ނާޕޮލީ އެއްވަނައިގައި އޮތީ 14 މެޗުން 32 ޕޮއިންޓް ހޯދައިގެންނެވެ. ދެވަނައިގައި އޮތް އެޓަލާންޓާ އަށް އެއްމެޗު މަދުން ކުޅެގެން ލިބިފައިވަނީ 13 މެޗުން 28 ޕޮއިންޓެވެ. ތިންވަނައިގައި އޮތް އިންޓަ މިލާނަށް ވެސް މިއަދަދަށް ޕޮއިންޓް ލިބިފައިވާއިރު، އެޓަލާންޓާ އަށް ކުރިލިބެނީ ފައިދާގޯލްގެ ތަފާތުންނެވެ. ފިއޮރެންޓީނާ ހަތަރުވަނައިގައި އޮތީ އިންޓައާ އެއްވަރަށް ޕޮއިންޓް ހޯދައި، ޖެހި ގޯލްގެ ތަފާތުންނެވެ.
ޓޮރީނޯގެ ދަނޑުގައި ރޭ ކުޅުނު މެޗުގައި ފެނިގެންދިޔަ ހަމައެކަނި ލަނޑު، 31 ވަނަ މިނެޓުގައި ނާޕޮލީ އަށް ކާމިޔާބުކޮށްދިނީ ކްވިޗާ ކްވަރަޝްކޭލިއާ ދިން ހިތްގައިމު ޕާހެއްގެ އެހީގައި އެ ޓީމުގެ ސްކޮޓްލެންޑް މިޑްފީލްޑަރު، މެކްޓޮމިނޭ އެވެ.
ދެވަނަ ހާފުގައި ނާޕޮލީގެ ލީޑްފުޅާކޮށްދޭން ރޮމެލޫ ލުކާކޫ އާއި މަތިއަސް އޮލިވޭރާ އަށް ލިބުނު ފުރުޞަތުތައް ވީ ބޭކާރެވެ. މި ދެ ހަމަލާ ވެސް ޓޮރީނޯގެ ގޯލްކީޕަރު، ވަންޔާ މިލިންކޮވިޗް-ސަވިޗް ވަނީ ހުއްޓުވައިފައެވެ.
ލީގުގައި ރޭ ކުޅުނު އަނެއް މެޗުގައި ލެއްޗެގެ ދަނޑުގައި ޔުވެންޓަސްއާ ދެކޮޅަށް އެ ޓީމު ކުޅުނު މެޗު ނިމުނީ 1-1 އިން އެއްވަރުވެގެންނެވެ. މި މެޗުގައި ފެނިގެންދިޔަ ހުރިހާ ގޯލެއްވެސް ކާމިޔާބުކުރި ފަހު ހާފުގައެވެ. އެގޮތުން، މެޗުގެ 68 ވަނަ މިނެޓުގައި އަންދްރެއާ ކަމްބިއާސޯގެ ލަނޑުން ޔުވެންޓަސް ލީޑްނަގާފައިވަނިކޮށް، އިތުރުވަގުތުގެ ތެރޭގައި ލެއްޗެ އަށް އެއްވަރުކޮށްދިނީ އެންޓޭ ރެބިޗް އެވެ.