ފަލަސްޠީނުގެ މިނިވަން ކަމަށް ޖިހާދު ކުރަމުންދާ ޙަމާސް ޖަމާޢަތުން ރަހީނުކޮށްފައިވާ އަަސީރެއްގެ ވީޑިޔޯ ޢާންމުކޮށްފިއެވެ. ޔަހޫދީންގެ ބައިގަނޑެއް ރަހީނުކޮށްފައި ވަނީ، 2023 އޮކްޓޫބަރު 7ވަނަ ދުވަހު ޙަމާސްގެ މުޖާހިދުން ޒަޔަނިސްޓު އިސްރާއީލުގެ ރަށްތަކަށް ދިން ޖިހާދީ ޙަމަލާތަކުގައެވެ. އެ ޙަމަލާތަކުގެ ބަދަލު ހިފުމުގެ ގޮތުން ޔަހޫދީ ފައުޖުން ވަނީ ޣައްޒާގެ މުސްލިމުންގެ ނަސްލުހޭދު ކުރަން ލާއިންސާނީ ޢުދުވާނެއް ހިންގަން ފަށާފައެވެ.
ބެލެވޭ ގޮތުގައި، ޙަމާސުން އަސީރެއްގެ ވީޑިޔޯ ޢާންމު ކޮށްފައި މި ވަނީ، ޣައްޒާގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތައް ހުއްޓުމަކަށް ގެނައުމަށް ބާރު އެޅުމުގެ ގޮތުންނެވެ. ޔަހޫދީންގެ ޢުދުވާނީ ޙަމަލާތައް ހުއްޓުމަކަށް ގެނައުމަކީ، ޙަމަލާ ބަދަލު ކުރުން ހުއްޓައިލައި، އަސީރުން މިނިވަން ކުރުމަށް ޙަމާސުން ހުށަހަޅާފައިވާ ޝަރުޠެކެވެ. ނަމަވެސް، ޒަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ދަނީ އެ ކަމަށް އިންކާރު ކުރަމުންނެވެ.
ޙަމާސުން ޢާންމު ކޮށްފައިވާ ވީޑިޔޯއިން ފެންނަނީ، ޔަހޫދީ ފައުޖުގައި ޚިދުމަތްކުރާ 20 އަހަރުގެ ސިފައިންގެ މީހެކެވެ. ވީޑިޔޯގައި އޭނާގެ ޢާއިލާގެ މެންބަރުންގެ އިތުރުން އަނިޔާވެރި ނަތަންޔާހޫއާއި އެމެރިކާގެ އިންތިޚާބީ-ރައީސް ޑޮނަލްޑް ޓްރަމްޕާ މުޚާޠަބުކޮށް ވާހަކަ ދައްކައެވެ. އަދި، އޭނާ މިނިވަން ކުރުމަށް މަސައްކަތް ކޮށްދިނުމަށް އެދި ހައްދުފަހަނަ އެޅި ނަތަންޔާހޫއާއި ޓްރަމްޕަށް ގޮވައިލައެވެ.
މީގެ 13 މަސް ކުރިން ޙަމާސުން ދީފައިވާ ޖިހާދީ ޙަމަލާތަކުގައި ޔަހޫދީންގެ 250އެއްހާ މީހުން ރަހީނުކޮށްގެން ގެންގޮސްފައިވާއިރު، އޭގެ ތެރެއިން 100އެއްހާ މީހުން މިހާރު ވަނީ މިނިވަން ކޮށްފައެވެ. ޙަމާސްގެ ބެލުމުގެ ދަށުގައި މި ވަގުތު ތިބި 101 މީހުންގެ ތެރެއިން ދެބައިކުޅަ އެއްބައި މީހުން އަދިވެސް ދުނިޔޭގައި ތިބި ކަމަށް ބެލެވޭ ކަމުގައި މަސްރަޙު ދިރާސާ ކުރާ ފަރާތްތަކުން ޤަބޫލު ކުރެއެވެ. ބާކީ ތިބި އަސީރުން މަރުވެފައި ވަނީ، ޣައްޒާގެ ރަށްތަކަށް ޔަހޫދީ ފައުޖުން ދެމުންދާ ނިރުބަވެރި ޙަމަލާތަކުގައި ކަމަށް ޙަމާސުން ބުންޏެވެ.
އެ ޖަމާޢަތުން އަސީރެއްގެ ވީޑިޔޯ ޢާންމު ކޮށްފައި މި ވަނީ، ޣައްޒާ ޢުދުވާން ހުއްޓުމަކަށް ގެނައުމަށް ކުރަމުން ދިޔަ މަޝްވަރާތައް އަލުން ފެށުމަށް މިޞްރުން މަސައްކަތް ފަށާފައިވާ ދަނޑިވަޅެއްގައެވެ. މިޞްރުގެ އިތުރުން ޤަޠަރުން މެދުވެރިންގެ ގޮތުގައި ވިލަރެސް ކުރަމުން ދިޔަ މަޝްވަރާތައް މެދުކެނޑިފައި ވަނީ ޔަހޫދީ ނަތަންޔާހޫ އެ ކަމަށް ހުރަސް އަޅަމުންދިޔުމާ ގުޅިގެންނެވެ. މިޞްރުގެ މަޞްދަރުތަކުން ބުނީ، މަޝްވަރާތައް އަލުން ފެށުމާ ގުޅޭ ގޮތުން ވާހަކަދެއްކުމަށް ޙަމާސްގެ އިސް އޮފިޝަލުންގެ ވަފުދެއް ނޮވެންބަރު 30ވަނަ ދުވަހު މިޞްރުގެ ވެރިރަށް ޤާހިރާއަށް ދަތުރު ކުރުމަށް ހަމަޖެހިފައިވާ ކަމުގައެވެ.
ޣައްޒާ ޢުދުވާން ހުއްޓުމަކަށް ގެނައުމަށް ކުރަމުންދާ މަސައްކަތްތައް އިތުރަށް ހަރުދަނާ ކުރުމަށް މަސައްކަތް ކުރަމުންދާ ކަން އެމެރިކާއިން ވެސް ވަނީ ހާމަކޮށްފައެވެ. އެމެރިކާއަކީ، ޔަހޫދީންގެ އެންމެ ބޮޑު މަދަދުގާރެވެ. ޣައްޒާގެ އަންހެނުންނާއި ކުޑަކުދިން ޝަހީދު ކުރުމަށް ޔަހޫދީ ފައުޖުން ބޭނުން ކުރަމުންދާ ނުރައްކާތެރި އަދި ފަނާކުރަނިވި ހަތިޔާރު ފޯރުކޮށްދެމުން ދަނީ ރައީސް ޖޯ ބައިޑަންގެ ސަރުކާރުންނެވެ.
ބައިޑަންގެ ސަރުކާރުން ބުނީ، 2025 ޖަނަވަރީ 20ވަނަ ދުވަހު އިންތިޚާބީ-ރައީސް ޓްރަމްޕްގެ އައު ސަރުކާރު ފެށުމުގެ ކުރިން ޣައްޒާ ޢުދުވާން ހުއްޓުމަކަށް ގެނެސް، އަސީރުން މިނިވަން ކުރެވޭތޯ މެދުކެނޑުމެއް ނެތި މަސައްކަތް ކުރަމުންދާ ކަމުގައެވެ. "އަސީރުން މިނިވަންކޮށް، ޢުދުވާން ހުއްޓުމަކަށް ގެނެސް، ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގެ ހަނި ފުރުޞަތެއް އަދިވެސް އެބައޮތް،" އެމެރިިކާގެ ރިޔާސީ ގަނޑުވަރު، ވައިޓް ހައުސްގެ ޤައުމީ ސަލާމަތާ ބެހޭ މަޖިލީހުގެ ތަރުޖަމާނު ޝޯން ސަވެޓް ވިދާޅުވިއެވެ. "އެއްބަސްވުމެއްގެ ދެލިކޮޕީ ކުރިމަތީގައި އެބައޮތް."
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,382އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 105,142 މީހުން ޒަޚަމު ކޮށްލާފައެވެ.