އިޓާލިއަން ލީގުގައި ރޭ ކުޅުނު މެޗުގައި އަމިއްލަ ދަނޑުގައި އެމްޕޯލީ އަތުން 3-0 ގެ ނަތީޖާއަކުން އޭސީ މިލާން މޮޅުވެއްޖެއެވެ.
މި ނަތީޖާއާއެކު މިލާން އޮތީ ހަތްވަނައިގައެވެ. މިހާތަނަށް ކުޅުނު 13 މެޗުން އެ ޓީމަށް ވަނީ 22 ޕޮއިންޓް ލިބިފައެވެ. ލީގުގެ އެއްވަނައިގައި އުޅޭ ނާޕޮލީއާ އެ ޓީމާ ދެމެދު ހަތް ޕޮއިންޓްގެ ފަރަގެއް އެބައޮތެވެ. މި މެޗުން ބަލިވި އެމްޕޯލީ އަށް 14 މެޗުން ލިބިފައިވަނީ 16 ޕޮއިންޓެވެ.
މި މެޗުގައި މިލާނުން ޖެހި ތިންލަނޑުގެ ތެރެއިން ދެ ގޯލްޖަހައިދިނީ ނެދަލެންޑްސްގެ މިޑްފީލްޑަރު، ޓިޔާނީ ރެއިންޑާސް އެވެ.
ސެން ސީރޯގައި ރޭ ކުޅުނު މެޗުގެ 19 ވަނަ މިނެޓުގައި މިލާނުން ލީޑްނެގީ ސްޕެއިނުގެ ކެޕްޓަން، އަލްވާރޯ މޮރާޓާ ވައްދާލި ލަނޑުންނެވެ. މިއީ މިލާންގެ ޕޯޗުގީޒް ފޯވާޑް، ރަފައެލް ލެއާއޯ ފޮނުވާލި ހަމަލާއެއް އެމްޕޯލީގެ ޑިފެންޑަރެއްގެ ގައިގަ ޖެހިފައި ނިކުތް ވަގުތު ދެވަނަ ފަހަރަށް އެ ބޯޅަ ލިބުމުން ގޯލްގެތެރެއަށް ފޮނުވާލައިގެން މޮރާޓާ ކާމިޔާބުކުރި ގޯލެކެވެ.
ފުރަތަމަ ހާފު ނިމުމުގެކުރީން، މިލާންގެ ދެވަނަ ލަނޑުޖަހައިދިނީ ރެއިންޑާސް އެވެ. އޭނާ މި ލަނޑުޖެހީ ކްރިސްޓިއަން ޕުލިސިޗް ނަގައިދިން ހުރަހަކުން ލިބުނު ބޯޅައެއް ބޮލުން ގޯލްގެތެރެއަށް ފޮނުވާލައިގެންނެވެ.
މެޗުގެ 69 ވަނަ މިނެޓުގައި މިލާންގެ ތިންވަނަ ލަނޑުޖަހައިދިނީ ވެސް ރެއިންޑާސް އެވެ. މިއީ އަވަސް ކައުންޓާއެއްގައި އެ ޓީމުގެ ފްރާންސް މިޑްފީލްޑަރު، ޔޫސުފް ފޮފާނާ ދިން ބޯޅައެއް ހިފައިގެން ގޮސް ރެއިންޑާސް ކާމިޔާބުކުރި ގޯލެކެވެ.
ލީގުގައި މިލާނަށް ދެން އޮތީ އަންނަ ހުކުރު ދުވަހުގެރޭ ރަށުން ބޭރުގައި އެޓަލާންޓާއާ ދެކޮޅަށް ކުޅެން ޖެހޭ މެޗެވެ. އޭގެކުރީން، އެ ޓީމު ދެން ކުޅޭ މެޗުގައި ކޮޕާ އިޓާލިއާގައި އަންގާރަ ދުވަހުގެރޭ ނިކުންނާނީ ސެރިއޭ ބީގެ ސަސުއޮލޯއާ ދެކޮޅަށެވެ.