ޖަރުމަން ލީގުގައި ރޭ ކުޅުނު މެޗުގައި ރަށުން ބޭރުގައި ބޮރޫޝިއާ ޑޯޓްމުންޑާ ދެކޮޅަށް ކުޅެ 1-1 ގެ ނަތީޖާއަކުން އެއްވަރުވި މެޗުގައި ބަޔާން މިއުނިކްގެ އިނގިރޭސި ފޯވާޑް ހެރީ ކޭންއަށް އަނިޔާވެއްޖެއެވެ.
މިއީ ލީގުގައި އެންމެ ފަހުން އަމިއްލަ ދަނޑުގައި ކުޅުނު ހަތް މެޗުގެ ތެރެއިން ޑޯޓްމުންޑް އެއްވަރުވި ފުރަތަމަ ފަހަރެވެ. އެ ޓީމު ވަނީ އަނެއް ހަ މެޗު ކާމިޔާބުކޮށްފައެވެ. އަނެއްކޮޅުން، މިއީ ހުރިހާ މުބާރާތެއް ހިމެނޭ ގޮތަށް އެންމެ ފަހުން ކުޅުނު ހަތް މެޗުގައި ބައިކޮޅަށް ލަނޑެއްނުވަދެ މޮޅުވި ބަޔާން ކޮޅަށް ވަތް ފުރަތަމަ ލަނޑެވެ.
ރޭގެ މެޗުތަކަށްފަހު ލީގުގެ އެއްވަނައިގައި އަދިވެސް އުޅެނީ ބަޔާން އެވެ. އެ ޓީމަށް 12 މެޗުން 30 ޕޮއިންޓް ލިބިފައިވާއިރު، ދެވަނައިގައި އުޅޭ އެއިންޓްރަކްޓް ފްރޭންކްފާޓަށް 11 މެޗުން ލިބިފައިވަނީ 23 ޕޮއިންޓެވެ. ހަމަ މި އަދަދަށް ޕޮއިންޓް ލިބިގެން ތިންވަނައިގައި ލަނޑުގެ ތަފާތުން ބަޔާ ލެވަކޫސަން އޮތްއިރު، އޭގެ ދެ ޕޮއިންޓް ފަހަތުން ހަތަރުވަނައިގައި އޮތީ އާރްބީ ލީޕްޒިގެވެ.
ޑޯޓްމުންޑްގެ ސިގްނަލް އިޑޫނާ ޕާކްގައި ރޭ ކުޅުނު މެޗުގެ 27 ވަނަ މިނެޓުގައި އެ ޓީމުން ލީޑްނެގީ އިނގިރޭސި ޒުވާން ވިންގް، ޖޭމީ ގިޓެންސް ކާމިޔާބުކޮށްދިން ލަނޑުންނެވެ.
އޭގެކުރީން، މެޗުގެ 17 ވަނަ މިނެޓުގައި ޑޯޓްމުންޑްގެ ޑިފެންޑަރު، ވަލްޑެމާރް އެންޓޯން އަށް އަނިޔާވެގެން ވަނީ ބަދަލުކޮށްފައެވެ. އޭނާގެ ބަދަލުގައި ކުޅެން ނިކުތީ ކުރީން ބަޔާނަށް ކުޅުނު ޖަރުމަނުގެ ޑިފެންޑަރު، ނިކްލަސް ސޫލް އެވެ.
މި މެޗުގެ ފުރަތަމަ ހާފުގެ 33 ވަނަ މިނެޓުގައި ބަޔާންގެ ފޯވާޑް، ކޭންގެ ފައިގެ ފަލަމަސްގަނޑަށް ލިބުނު އަނިޔާއެއްގެ ސަބަބުން ވަނީ ބަދަލުކޮށްފައެވެ. މިވަގުތު ރަނގަޅު ފޯމެއްގައި ހުރި ކޭންގެ ބަދަލުގައި ކުޅެން ނިކުތީ ޖަރުމަނުގެ ކުރީގެ ފޯވާޑް، ތޯމަސް މުލާ އެވެ.
ދެވަނަ ހާފުގެ ކުރީކޮޅު، ބަޔާން އަށް ލަނޑެއްޖަހައިދޭން މުލާ އަށް ލިބުނު ފުރުޞަތުގައި ފޮނުވާލި ބޯޅަ ޑޯޓްމުންޑްގެ ގޯލްކީޕަރު، ގްރެގޯ ކޯބެލް ހުއްޓުވިއެވެ. އޭގެފަހުން، ޖަމާލް މުސިއާލާ އާއި ލެރޯއީ ސާނޭ ފޮނުވާލި ހަމަލާތަކުގައި ވެސް ގޯލެއް ކާމިޔާބުކުރެވޭ ގޮތެއް ނުވިއެވެ.
މެޗު ނިމެން ފަސް މިނެޓަށްވެފައިވަނިކޮށް، ބަޔާނަށް ކާމިޔާބުކޮށްދިނީ ޖަމާލް މުސިއާލާ އެވެ. އެ ޓީމުގެ ފްރާންސް ވިންގް، މައިކަލް އޮލީސޭ ނަގައިދިން ހުރަހަކުން މުސިއާލާ މި ލަނޑުޖެހީ ބޮލުންނެވެ. މިއީ މި ފަހަރުގެ ސީޒަނުގެ ލީގުގައި އޭނާ ޖެހި ހަވަނަ ގޯލެވެ.
މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، ރަށުން ބޭރުގައި ޔޫނިއަން ބާލިން އަތުން ލެވަކޫސަން މޮޅުވީ 1-2 އިންނެވެ. މި މެޗުގައި ލެވަކޫސަންގެ ލަނޑުތައް ޖަހައިދިނީ ޖެރެމީ ފްރިމްޕޮންގް އާއި ޕެޓްރިކް ޝިކް އެވެ. ޔޫނިއަން ބާލިންގެ ހަމައެކަނި ލަނޑުޖަހައިދިނީ ވޫ-ޔެއޮންގ ޖެއޮންގ އެވެ.
ވާޑާ ބްރޭމަންގެ ދަނޑުގައި 2-2 އިން އެ ޓީމާ ވީއެފްބީ ސްޓުޓްގާޓާ އެއްވަރުވިއިރު، ރަށުން ބޭރުގައި ވުލްފްސްބާގުން ވަނީ 5-1 ގެ ނަތީޖާއަކުން އާރްބީ ލީޕްޒިގު ބަލިކޮށްފައެވެ.