ފަލަސްޠީނުގެ ޣައްޒާގެ މުސްލިމުންގެ ނަސްލު ނައްތާލަން ޔަހޫދީ ފައުޖުން ހިންގަމުންދާ ލާއިންސާނީ ޖަރީމާގެ ދަށުން އެ ސަހަރަށް ބޮންއެޅުން އިތުރުކޮށް، 21 މީހުން ޝަހީދު ކޮށްލައިފިއެވެ. ޣައްޒާގެ އޮފިޝަލުން ބުނީ، ޣައްޒާގެ މެދުތެރޭގައި އޮތް ރަށްތަކަށް ޔަހޫދީ ފައުޖުން ދެމުންދާ ވައިގެ ޙަމަލާތައް އިތުރު ކޮށްފައިވާއިރު، އެ ސަހަރުގެ އުތުރާއި ދެކުނުގެ އިތުރު ރަށްތަކުގައި ޔަހޫދީ ފައުޖުގެ އަސްކަރީ ޓޭންކުފަހަރުން ޤަތުލުޢާންމު ފުޅާކުރަމުންދާ ކަމުގައެވެ.
ޣައްޒާގެ މުސްލިމުންނަށް އަމާޒުކޮށް ދެމުންދާ ޙަމަލާތައް އިތުރުކޮށް ފުޅާކުރަން ފަށާފައި މި ވަނީ، ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް މެދުކަނޑައިލުމަށް ފަހުއެވެ. ޣައްޒާގެ މުސްލިމުންނާ ދެކޮޅަށް ޔަހޫދީ ފައުޖުން ލާއިންސާނީ ޖަރީމާތަކެއް ހިންގަން ފަށާފައި ވަނީ މީގެ 13 މަސް ކުރިންނެވެ. އަދި، ލުބްނާނަށް ބޮންއަޅައި، އެ ޤައުމަށް އަސްކަރީ ޓޭންކުފަހަރު ފޮނުވައި ޤަތުލުޢާންމު ހިންގަން ފަށާފައި ވަނީ މި އަހަރުގެ ސެޕްޓެންބަރު މަހުގެ 23ވަނަ ދުވަހުއެވެ.
ނޮވެންބަރު 28ވަނަ ދުވަހު ޣައްޒާގެ އުތުރުގެ ސަރަޙައްދުތަކަށް ޔަހޫދީ ފައުޖުން ދީފައިވާ ނިރުބަވެރި ޙަމަލާތަކުގައި ޢާންމުން ދިރިއުޅޭ ދެ ގެއަކަށް ބޮންއެޅިއެވެ. ކަމާލް ޢަދްވާނީ ހަސްފަތާލު ކައިރީގައި ހުރި އެ ދެ ގެއަށް ދިން ޙަމަލާތަކުގައި ހަ މީހުން ޝަހީދު ކޮށްލިއެވެ. ޣައްޒާގެ ދެކުނުގައި އޮތް ޚާން ޔޫނިސަށް ދިން ވައިގެ ޙަމަލާތަކެއްގައި ވެސް އިތުރު ހަތަރު މީހުން ޝަހީދު ކޮށްލިއެވެ.
ޣައްޒާގައި ހުންނަ އަށް ރެފިއުޖީ ކޭމްޕުގެ ތެރޭގައި ހިމެނޭ ނުޞަޔިރާތު ރެފިއުޖީ ކޭމްޕަށް ވެސް ޔަހޫދީ ފައުޖުން ވަނީ ނިރުބަވެރި ޙަމަލާތަކެއް ދީފައެވެ. ޙަމަލާތައް އަމާޒުކޮށްފައި ވަނީ ނުޞަޔިރާތުގައި ގިނަ އަދަދެއްގެ ބަޔަކު ދިރިއުޅެމުން ދިޔަ އެޕާޓްމަންޓް އިމާރާތަކާއި މިސްކިތަކަށެވެ. އެ ސަރަޙައްދުގައި ހުންނަ އަލް-ޢަވްދާ ހަސްފަތާލުގެ އޮފިޝަލުން ބުނީ، އެ ޙަމަލާތަކުގައި 11 މީހުން ޝަހީދު ކޮށްލާފައިވާ ކަމުގައެވެ. އަދި، ގިނަ އަދަދެއްގެ ބަޔަކު ޒަޚަމު ކޮށްލާފައިވާ ކަމުގައެވެ.
ޙަމަލާތަކުގައި ޒަޚަމު ކޮށްލާފައިވާ މީހުން ހަސްފަތާލަށް ގެންދިޔުމަށް ވެސް ޔަހޫދީ ފައުޖުން ވަނީ އަސްކަރީ ޓޭންކުފަހަރު ބޭނުން ކޮށްގެން ހުރަސް އަޅާފައެވެ. ޣައްޒާގެ އެންމެ ދެކުނުން މިޞްރުގެ ސަރަޙައްދީ ރޮނގު ކައިރީގައި އޮތް ރަފަޙުގައި ވެސް އަސްކަރީ ޓޭންކުފަހަރު ބޭނުން ކޮށްގެން ޔަހޫދީ ފައުޖުން ދަނީ ޤަތުލުޢާންމު ހިންގަމުންނެވެ.
ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް ހުއްޓުވުމުގައި އެންމެ އިސް ދައުރެއް އަދާކޮށްފައި ވަނީ ޔަހޫދީންގެ އެންމެ ބޮޑު މަދަދުގާރު، އެމެރިކާއިންނެވެ. ޙަމަލާ ބަދަލު ކުރުން މެދުކަނޑައިލަން ނިންމާފައިވާ ކަން އިޢުލާނު ކުރައްވަމުން ރައީސް ޖޯ ބައިޑަން ވިދާޅުވީ، ޣައްޒާގެ މުސްލިމުންނާ ދެކޮޅަށް ޔަހޫދީން ހިންގަމުންދާ ލާއިންސާނީ ޖަރީމާތައް ހުއްޓުވުމަށް ވެސް މަސައްކަތް ކުރައްވަމުން ގެންދަވާ ކަމުގައެވެ. ނަމަވެސް، ޣައްޒާގެ މުސްލިމުން ޝަހީދު ކުރުމަށް ޔަހޫދީން ބޭނުން ކުރަމުންދާ ނުރައްކާތެރި އަދި ފަނާކުރަނިވި ހަތިޔާރުގެ ބޮޑު ބައެއް ފޯރުކޮށްދެމުން ދަނީ ބައިޑަންގެ ސަރުކާރުންނެވެ.
"ލުބްނާނޭ އެއްގޮތަށް އަޅުގަނޑުމެންނާ ދެކޮޅަށް ހިންގަމުންދާ ޖަރީމާތައް ވެސް ހުއްޓައިލާނެ ކަމަށް އުންމީދު ކުރަން… އަޅުގަނޑު ބޭނުން ވަނީ، އަޅުގަނޑު ބޭނުމީ އަޅުގަނޑުމެންގެ ބިމާއި ގެދޮރަށް އެ މީހުން ހަދައިލާފައިވާ ގޮތް އަޅުގަނޑުގެ ދަރިންނަށް ދައްކައިލުން، އެ މީހުންނަށް ރައްކާތެރިކަމާ އެކު ދިރިއުޅުމުގެ ފުރުޞަތު ހޯދައިދިނުން،" ޣައްޒާގެ ރައްޔިތެއް ކަމުގައިވާ އަމަލް އަބޫ ޙުމަޔިދު ބުންޏެވެ. "މާތްاللهގެ ވާގިފުޅާ އެކު ޢުދުވާންތައް ހުއްޓުމަކަށް ގެނެވޭނެ."
ޣައްޒާގެ މުސްލިމުންނާ ދެކޮޅަށް 2023 އޮކްޓޫބަރު 7ން ފެށިގެން ހިންގަމުންދާ ލާއިންސާނީ ޢުދުވާނުގައި ޝަހީދުކޮށްލާފައިވާ މީހުންގެ ޢަދަދު ވަނީ 44,330އަށް އުފުލިފައެެވެ. އޭގެ ތެރޭގައި 17,000އެއްހާ ކުޑަކުދިން ހިމެނޭއިރު, އިތުރު 10,000އެއްހާ މީހުންގެ ހަށިތައް ސުންނާފަތި ކޮށްލާފައިވާ އިމާރާތްތަކުގެ ދަށުގައި ތާށިވެފައިވާ ކަމަށް ޣައްޒާގެ އޮފިޝަލުން ޤަބޫލު ކުރެއެވެ. ޣައްޒާ ޢުދުވާނުގައި ޔަހޫދީ ފައުޖުން ވަނީ 104,933 މީހުން ޒަޚަމު ކޮށްލާފައެވެ.