މޮންޒާގައި ބާއްވަމުން އަންނަ އިޓަލީގެ ގްރޯން ޕްރީ ރޭސް، 2031 ވަނަ އަހަރުގެ ނިޔަލަށް ކަލަންޑަރުގައި ހިމެނިގެން ކުރިއަށްދާނެ ކަމަށް ފޯމިއުލާ ވަންއިން ބުނެފިއެވެ.
ފޯމިއުލާ ވަން އިން ވަނީ، މިއީ 2025 ވަނަ އަހަރުގެ ނިޔަލަށް އޮތް އެއްބަސްވުން އިތުރު ހަ އަހަރަށް އިތުރުކުރުމުގެ ގޮތުން ކަމަށް ބުނެފައެވެ.
"ޓެމްޕަލް އޮފް ސްޕީޑް" ގެ ނަމުން މަޝްހޫރުވެފައިވާ، މޮންޒާގެ އިޓާލިއަން ގްރޯން ޕްރީ ރޭހުގައި ގިނަ ފަހަރު ފޯމިއުލާ ވަން ދުއްވުންތެރިންގެ ކާރު ސްޕީޑް ހުންނަނީ ގަޑިއިރަކު 350 ކިލޯމީޓަރު ބާރު މިނުގެ ދުވެލީގައެވެ.
1950 ވަނަ އަހަރު ފުރަތަމަ ވޯލްޑް ޗެމްޕިއަންޝިޕް ބޭއްވި ފަހުން ގަވާއިދުން ކޮންމެ އަހަރަކު މޮންޒާގައި ރޭސް ބާއްވަމުން އަންނައިރު، 1980 ގައި ރޭސް ސާކިޓް މަރާމާތުކުރުމަށް ބަންދުކުރެވުނު އަހަރު ފިޔަވައި، ކޮންމެ އަހަރަކުވެސް އިޓާލިއަން ގްރޯން ޕްރީ ވަނީ ބާއްވާފައެވެ.
މޮންޒާއަކީ ފޯމިއުލާ ވަން ތާރީޚުގެ އެންމެ މުހިއްމު އެއްބައި ކަމަށާއި، އަދި ކޮންމެ އަހަރަކު ޓިފޯސީން ބޮޑު އަދަދަކަށް އެއްވެ ފެރާރީ ޓީމަށާއި ޑްރައިވަރުންނަށް ހިތްވަރުދޭ މާޙައުލަކީ ވަރަށް ޚާއްޞަ މާޙައުލެއް ކަމަށްވެސް ފޯމިއުލާ ވަންގެ ރައީސް އަދި ސީއީއޯ ސްޓެފާނޯ ޑޮމެނިކާލީ ވިދާޅުވިއެވެ.
"ފަހަކަށް އައިސް މޮންޒާ ސަރކިޓުގެ އިންފްރާސްޓްރަކްޗަރަށް ގެނެވުނު ބަދަލުތަކާއި ރޭވިފައިވާ އިންވެސްޓްމަންޓުތަކުން ދައްކުވައިދެނީ އިޓަލީގައި ފޯމިއުލާ ވަންގެ ދުރު މުސްތަޤުބަލަށް ކުރެވޭ ވަރުގަދަ އިލްތިޒާމެއް،" ޑޮމެނިކާލީ ވިދާޅުވިއެވެ.
މޮންޒާގެ ރޭސް ސާކިޓަށް މިއަހަރުގެ ތެރޭގައި ބަދަލުތައް ގެނެވުނުއިރު، ޓަނަލްތައް އިތުރަށް ފުޅާކޮށް ސަޕޯޓަރުންނާއި ވެހިކަލްތަކަށް އެކަށޭނަ ޖާގަ ލިބޭ ގޮތަށް އިންތިޒާމްތައް ވަނީ ހަމަޖެހިފައެވެ. މިއާއެކު، މި ފަހަރުގެ މޮންޒާގައި ބޭއްވި ރޭހަށް ގާތްގަނޑަކަށް 335 ހާހެއްހާ ސަޕޯޓަރުން ވަނީ ހާޒިރުވެފައެވެ.
1922 ގައި އިމާރާތްކުރެވުނު މި ސަރކިޓަކީ ފޯމިއުލާ ވަންގެ އެންމެ ވަރުގަދަ އެއްޓީމު ކަމަށްވާ، ފެރާރީގެ ހޯމް ގްރޯން ޕްރީއެވެ. މޮންޒާގައި އެހެން ހުރިހާ ޓީމަކަށްވުރެ ގިނައިން ރޭސް ކާމިޔާބުކޮށްފައިވަނީވެސް ފެރާރީ އެވެ. އެންމެ ފަހުން މިއަހަރުގެ ރޭސް ވެސް ކާމިޔާބުކުރީ ފެރާރީގެ ދުއްވުންތެރިޔާ، ޗާލްސް ލެކްލާކް އެވެ.