އެމެރިކާގެ މޭޖަރ ލީގު ސޮކަރ (އެމްއެލްއެސް) ގެ އިންޓަރ މަޔާމީއަށް ކުޅެމުން އަންނަ ފޯވާޑް ލުއިސް ސުއަރޭޒް، އިތުރު އަހަރަކު އެ ކުލަބުގައި މަޑުކުރުމަށް ނިންމައި އެއްބަސްވުން އައުކޮށްފިއެވެ.
އުމުރުން 37 އަހަރުގެ އުރުގުއޭއަށް އުފަން ސުއަރޭޒް އިންޓަރ މަޔާމީ އާއި ގުޅިފައިވަނީ 2023 ވަނަ އަހަރުގެ ޑިސެމްބަރ މަހުގަ އެވެ. އޭގެ ކުރިން އޭނާ ކުޅެފައިވަނީ ސްޕެއިންގެ އެތްލެޓިކޯ މެޑްރިޑަށެވެ.
ސުއަރޭޒް ވަނީ އިނގިރޭސި ޕްރިމިއާ ލީގުގެ ކްލަބް ލިވަޕޫލް އާއި ސްޕެއިންގެ ބާސެލޯނާ އަށް ކުޅެދީ އެ ދެ ކްލަބާއިއެކު ގިނަ ކާމިޔާބީތަކެއް ހޯދާފަ އެވެ. އަދި ފާއިތުވެދިޔަ ގިނަ އަހަރުތަކެއްގައި އޭނާ ވަނީ އުރުގުއޭގެ ގައުމީ ޓީމަށްވެސް ކުޅެފަ އެވެ.
ސުއަރޭޒް އިންޓަރ މަޔާމީ އާއި ގުޅިފައިވާއިރު އޭނާ އާއިއެކު ބާސެލޯނާއަށް ކުރިން ކުޅުނު ލަޔޮނެލް މެސީ އާއި ސާރޖިއޯ ބަސްކެޓްސްގެ އިތުރުން ޖޯޑީ އަލްބާ ވެސް މިހާރު ކުޅެމުންދަނީ އިންޓަރ މަޔާމީ އަށެވެ.
މި ސީޒަނުގައި އިންޓަރ މަޔާމީ އިން ވަނީ މޭޖަރ ލީގުގައި އެއް ސީޒަނުގައި ކްލަބަކުން ހޯދާފައިވާ އެންމެ ގިނަ ޕޮއިންޓް ކަމުގައިވާ 74 ޕޮއިންޓާއެކު ސަޕޯޓާސް ޝީލްޑް ކާމިޔާބުކޮށްފަ އެވެ.
ލުއިސް ސުއަރޭޒް ވަނީ އިންޓަރ މަޔާމީ އަށް މި ސީޒަނުގައި އޭނާ ކުޅެދިން 27 މެޗުގައި 20 ގޯލު ޖަހާފަ އެވެ. އުރުގުއޭގެ ގައުމީ ޓީމަށް ކުޅުނު143 މެޗުގައި 69 ގޯލު ޖަހާފައިވާ ސުއަރޭޒް ކުރިން ބުނެފައިވަނީ އޭނާ ކްލަބް ލެވެލްގައި ކުޅޭނެ އެންމެ ފަހު ކްލަބަކީ އިންޓަރ މަޔާމީ ކަމަށެވެ.
އިންޓަރ މަޔާމީއިން ސުއަރޭޒްގެ އެއްބަސްވުން އައު ކޮށްފައިވާއިރު އެ ޓީމަށް ކުރިން އިރުޝާދުދިން ކޯޗު އަމިއްލަ ސަބަބުތަކާއިހުރެ މަގާމުން އިސްތިއުފާ ދިނުމުން ކޯޗަކަށް އާޖެންޓީނާގެ މަޝެރާނޯ ހަމަޖައްސާފަ އެވެ.