ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުން ބ. އޭދަފުށި ޖާގަ ހޯދައިފިއެވެ.
ގައުމީ ފުޓްބޯޅަ ދަނޑުގައި މިއަދު ކުޅުނު ގްރޫޕް ބީގެ މެޗުން އޭދަފުށި މޮޅުވީ ތ. ތިމަރަފުށި އަތުން ފަސޭހަކަމާއެކު 4-0 ގެ ނަތީޖާއަކުންނެވެ. މިއީ މި މުބާރާތުގައި އޭދަފުށިން ހޯދި ދެވަނަ މޮޅެވެ. އެގޮތުން ފުރަތަމަ މެޗުގައި އެ ޓީމުން ވަނީ ބ. ތުޅާދޫ އަތުން 5-1 ގެ ނަތީޖާއަކުން މޮޅުވެފައެވެ.
ގޯލްޑް ކަޕުގެ ފޯމެޓްގައިވާ ގޮތުން ހަތަރު ގްރޫޕުން 12 ޓީމެއް މުބާރާތުގެ ދެވަނަ ބުރަށް ދަތުރުކުރާނެއެވެ. އޭދަފުއްޓާއެކު ގްރޫޕް ބީގައި ހިމެނޭ މާލެ ސިޓީވެސް ވަނީ ދެވަނަ ބުރުގެ ޖާގައެއް ކަށަވަރުކޮށްފައެވެ. މި ގްރޫޕުން ދެން އަނެއް ބުރަށް ދާ ޓީމެއް ޔަގީންވާނީ ތުޅާދޫ އާއި ތިމަރަފުށިން ކުޅޭ މެޗުންނެވެ.
މި މުބާރާތުގައި މިއަދު ހަވީރު ކުޅުނު މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، މި ހާފު ނިމެން ގާތްވެފައި ވަނިކޮށް އޭދަފުށިން ވަނީ ލީޑު ނަގާފައެވެ. މެޗުގެ 40 ވަނަ މިނެޓުގައި އިޝާން އިބްރާހީމް (ސައްޓު) ދިން ބޯޅައަކުން މި ލަނޑު ކާމިޔާބުކުރީ އަލީ ނަސީމެވެ.
މި މެޗުގެ ފަހުކޮޅު އޭދަފުށީގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 70 ވަނަ މިނެޓުގައި އެ ޓީމުން ވަނީ ލީޑު ފުޅާކޮށްފައެވެ. ސައްޓު ތަނަވަސްކޮށްދިން އިތުރު ފުރުސަތަކުން މި ލަނޑު ޖަހައިދިނީ ކެޕްޓަން މުޙައްމަދު ފާސިރެވެ. އަދި މެޗުގެ 88 ވަނަ މިނެޓުގައި ހުސެއިން ޝަރީފް ނަގައިދިން ކޯނަރަކުން ފާސިރު ވަނީ އިތުރު ލަނޑެއް ޖަހާފައެވެ.
މި މެޗުގައި އޭދަފުށިން ކާމިޔާބުކުރި ހަތަރުވަނަ ލަނޑު މެޗުގެ ފަހު މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ހުސެއިން ޝަރީފެވެ. މިއީ އޭރިއާ ތެރެއިން ތިމަރަފުށީގެ ކުޅުންތެރިއެއްގެ އަތުގައި ބޯޅަ ޖެހުމުން ރެފުރީ ދިން ޕެނަލްޓީއެކެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރާއިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އަދި ހއ. ދިއްދޫ އެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.