އެމްޑަބްލިއުއެސްސީގެ ސީއެސްއާރު ޕްރޮގްރާމްގެ ދަށުން ހުޅުމާލޭގައި ހުންނަ ކުޑަކުދިންގެ ހިޔާ ފިޔަވަތިއަށް 9 އޭސީ ޔުނިޓް ހަދިޔާކޮށްފިއެވެ.
އެމްޑަބްލިއުއެސްސީގައި މިއަދު ބޭއްވި ރަސްމިއްޔާތެއްގައި މި އެހީގެ ރަމްޒީ ލިއުން އެމްޑަބްލިއުއެސްސީގެ ފަރާތުން ހަވާލުކުރެއްވީ އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދެވެ. ލޯ އެންޑް ޖެންޑަރ މިނިސްޓްރީގެ ފަރާތުން މި އެހީއާ ހަވާލުވެވަޑައިގަތީ އެމިނިސްޓްރީގެ އެގްޒެކްޓިވް ކޯޑިނޭޓަރ މުޙައްމަދު ޝަކީބެވެ.
މިރަސްމިއްޔާތުގައި ވާހަކަދައްކަވަމުން އެމްޑަބްލިއުއެސްސީގެ މެނޭޖިންގ ޑިރެޓަރ ފަޒުލް ރަޝީދު ވިދާޅުވީ އެކުންފުނީގެ ސީއެސްއާރު ޕްރޮގްރާމްގެ ދަށުން މުޖްތަމަޢަށް އެހީތެރިވުމަށް މިފަދަ ހަރަކާތްތައް އިތުރުކުރުމަށް އެކުންފުނިން މިހާރު މަސައްކަތް ފަށާފައިވާކަމަށެވެ.
އެމްޑަބްލިއުއެސްސީން ހަދިޔާކުރި އޭސީތައް މިހަފްތާގައި ފިޔަވަތީގައި ބެހެއްޓުމުގެ މަސައްކަތް ކުރާނެކަމަށް އެކުންފުނިން މަޢުލޫމާތުދެއެވެ. ފިޔަވަތިއަކީ ސަރުކާރުގެ ބެލުމުގެ ދަށުގައިތިބޭ 9 އަހަރުން ދަށުގެ ކުދިން ބަލައްޓަމުން ގެންދާ މަރުކަޒެވެ. މިތަނުގައި މިހާރު 82 ކުއްޖަކު ތިބެއެވެ.