ސްޓުޓްގާޓަށް ކުޅެމުން އަންނަ ޖަރުމަނުގެ ފޯވާޑް ޑެނިޒް އުންޑާވްއަށް އަނިޔާވެ، މި އަހަރު ދެން އޭނާއަށް ނުކުޅެވޭނެ ކަމަށް އެ ކުލަބުން ބުނެފިއެވެ.
އުމުރުން 28 އަހަރުގެ އުންޑާވްގެ ފައިގެ މަސްގަނޑަށް އަނިޔާވެފައިވާކަން ސްޓުޓްގާޓުން ވަނީ ބުރާސްފަތިދުވަހު ކަށަވަރުކޮށްދީފައެވެ.
އުންޑާވް އަށް އަނިޔާވީ އޭގެކުރީ ދުވަހު ތަމްރީންތަކުގައެވެ. އަދި މެޑިކަލް ޓީމުން ދިން ފަރުވާއަށްފަހު، ކުރިއަށް އޮތް ހަފްތާތަކުގައި އޭނާ އަށް ކުޅެވޭނެ ކަމަށް ނުބެލެވޭ ކަމަށް ވެސް އެ ކްލަބުން ވަނީ ބުނެފައެވެ.
ސްޓުޓްގާޓަށް އުންޑާވް އެންމެ ފަހުން މެޗެއް ކުޅުނީ މިދިޔަ ނޮވެންބަރު މަހުގެ ހަވަނަ ދުވަހު ޔުއެފާ ޗެމްޕިއަންސް ލީގުގައި އިޓަލީގެ އެޓަލާންޓާއާ ދެކޮޅަށެވެ. އެ މެޗުގެ ކުރީކޮޅު އަނިޔާވެގެން އުންޑާވް ވަނީ ބަދަލުކޮށްފައެވެ. އަދި އޭގެފަހުން، އިންޓަރނޭޝަނަލް ބްރޭކްގައި ޖަރުމަނު ކުޅުނު މެޗުތައް ވެސް އޭނާ އަށް ގެއްލުނެވެ.
"މިއަހަރު އަހަރެމެންނަށް އޭނާ ދަނޑުގައި ކުޅޭތަން ފެންނާނީ ކަންތައް ވަރަށް ރަނގަޅަށް ދިޔައިއްޔާ،" ސްޓުޓްގާޓްގެ ކޯޗް ސެބަސްޓިއަން ހޯނެސް ބުނެފައިވެއެވެ.
އުންޑާވް ވަނީ މި ސީޒަންގައި ބުންޑެސްލީގާގެ 9 މެޗުގައި 5 ލަނޑު ޖަހާފައެވެ. އެ ޓީމުން ނިމިދިޔަ ސީޒަނުގެ ލީގުގައި ބޮޑު ކުރިއެރުންތައް ހޯދައި، މި ފަހަރުގެ ޗެމްޕިއަންސް ލީގަށް ކޮލިފައިކޮށްދިނުމުގައި މުހިއްމު ދައުރެއް އަދާކުރިއެވެ.
ސްޓުޓްގާޓަށް ލީގުގެ ކުޅުން އަންނަ ޑިސެމްބަރު މަހުގެ 22 ގައި މެދުކަނޑާލުމުގެ ކުރިން އަދި ބާކީ އަށް މެޗު ކުޅެން އެބައޮތެވެ.