ބަޖެޓު ބަހުސް ނިންމާލައިފި؛ 77 މެންބަރުން ވާހަކަދެއްކެވި

އަންނަ އަހަރަށް ލަފާކޮށް ރައްޔިތުންގެ މަޖިލީހަށް ހުށައަޅާފައިވާ ބަޖެޓަށް ބަހުސްކޮށް ނިންމާލައިފިއެވެ.

އަންނަ އަހަރަށް ލަފާކޮށް ހުށައަޅާފައިވަނީ 56.6 ބިލިޔަން ރުފިޔާގެ ބަޖެޓެކެވެ. ބަޖެޓު މަޖިލީހަށް ހުށައެޅުއްވީ މިދިޔަ މަހުގެ 31 ވަނަ ދުވަހުއެވެ. އަދި ބަޖެޓަށް ބަހުސް ފެށީ މިމަހުގެ 12 ވަނަ ދުވަހުއެވެ.

ބަޖެޓަށް ކުރިއަށްގެންދިޔަ ބަހުސްގައި ކޮންމެ މެންބަރަކަށްވެސް، 15 މިނެޓުގެ ފުރުޞަތެއް ވަނީ ދީފައެވެ. މި ބަހުސްގައި 77 މެންބަރުން ވާހަކަދައްކަވާފައިވެއެވެ. ބަހުސްގައި ޖުމްލަ ހޭދަވެފައިވަނީ 14 ގަޑިއިރާއި 17 މިނެޓެވެ.

ބަޖެޓު ބަހުސްގައި ވާހަކަފުޅުދައްކަވަމުން ވިލިމާލޭ ދާއިރާގެ ޕީއެންސީ މެންބަރު މުޙައްމަދު އިސްމާޢިލް ވިދާޅުވީ ވަކި ވަކި ރަށްރަށުގައި ހިންގާ މަޝްރޫޢުތަކަށް ކަނޑައަޅާފައިވާ ފައިސާގެ އަދަދަކީ ކޮބައިކަން ބަޖެޓު ތަފްސީލުތައް ހިމެނޭ ޝީޓުގައި ޖަހާފައި ނެތުމުން ސަރުކާރާ އިދިކޮޅު މެންބަރުން ކަންބޮޑުވުން ފާޅުކުރަމުންދާ ކަމަށެވެ. ނަމަވެސް ތަފްސީލް ހިމަނައިގެން މީގެ ކުރިން ބަޖެޓު ހެދި ނަމަވެސް، ރައްޔިތުން ބޭނުންވި މިންވަރަށް މަޝްރޫޢުތައް ނިމުނުތައް ފެނިގެންގޮސްފައިނުވާކަން މެންބަރު ފާހަގަކުރެއްވިއެވެ.

މުޙައްމަދު އިސްމާޢިލް ވިދާޅުވީ ވަކި ވަކި ތަފްސީލް ނުހިމެނި ނަމަވެސް، މިއަހަރަށް ކަނޑައެޅި ބަޖެޓުގައި ދައުލަތަށް އާމްދަނީ އިތުރުކުރެވޭނެ ގޮތްތަކާބެހޭ ތަފްސީލް ވަރަށް ސާފުވާނެހެން ހިމަނާފައި އޮތް ކަމަށެވެ.

"އެއަރޕޯޓް ޓެކްސް، ސިނގިރޭޓު ޑިޔުޓީ ބޮޑުކުރުމުން ލިބޭ އާމްދަނީ، ގްރީން ޓެކްސް، ބިން ހިއްކައިގެން ލިބޭ ވެލި ވިއްކައިގެން ލިބޭ އާމްދަނީ ތަފްސީލްކޮށް ބަޖެޓުގައި ހިމަނާފައި އެބައޮތް." މުޙައްމަދު އިސްމާޢިލް ވިދާޅުވިއެވެ.

ބަޖެޓަށް ބަހުސްކުރައްވަމުން ހުޅުމާލޭ އުތުރު ދާއިރާގެ މެންބަރު ޙުސައިން ޝަރީފް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތީ އެމަނިކުފާނުގެ މެނިފެސްޓޯގައި ހިމަނުއްވާފައިވާ ކަންކަން ރައްޔިތުންނަށް ކޮށްދެއްވުމަށް ކަމަށެވެ. އަދި ވަކި ވަކި މަޝްރޫޢުތަކުގެ ތަފްސީލް ބަޖެޓުގައި ޖެހުމަށްވުރެ، ބަޖެޓުގައި ފައިސާ ހިމަނާފައިވަނީ އެމަނިކުފާނުގެ ވަޢުދުތައް ފުއްދޭނެ ގޮތަށްކަމަށް މެންބަރު ވިދާޅުވިއެވެ.

މެންބަރު ޙުސައިން ޝަރީފް ވިދާޅުވީ ބަޖެޓުގައި ތަފްސީލް ޖަހާއިގެން މީގެ ކުރިން ހުށައެޅުނު ނަމަވެސް، ރައްޔިތުން ބޭނުންވި ގޮތަށް މަޝްރޫޢުތައް ކުރިއަށްގޮސްފައިނުވާ ކަމަށެވެ.

"ރައީސް ނިންމެވީ ޤައުމު ޢުމްރާނީ ގޮތުން ތަރައްޤީކުރުމަށް ބޭނުންވާ އަދަދަށް ބަޖެޓުގައި ފައިސާ ހިމަނަން. ކޮންމެހެން ތަފްސީލްތަކެއް ޖަހާފައިނެތަސް، ވަކި ވަކި ދާއިރާތަކަށް ކަނޑައަޅާފައިމިންވަރު ބަޖެޓުގައި ހިމަނާފައި އެބައޮތް. ލަފާފުރުމުގެ ދަތިކަން ޙައްލުކުރުންފަދަ ކަންކަމަށް ހިނގާނެ ޚަރަދު ވަކި ވަކިން ޖަހާފައި އެބައޮތް." ޙުސައިން ޝަރީފް ވިދާޅުވިއެވެ.

އަންނަ އަހަރަށް ލަފާކޮށް ދައުލަތުން ކަނޑައަޅާފައިވާ ބަޖެޓަށް ބަހުސްކުރައްވަމުން ސަރުކާރާ އިދިކޮޅު ބައެއް މެންބަރުން ވަނީ ބަޖެޓުގައި ވަކިވަކި މަޝްރޫޢުތަކަށް ޚަރަދުވާ ފައިސާ ވަކިން ޖަހާފައި ނެތުމުން ކަންބޮޑުވުން ފާޅުކޮށްފައެވެ. އެގޮތުން ހުޅުމާލެ ދެކުނު ދާއިރާ އެމްޑީޕީ މެންބަރު ޑރ. އަޙްމަދު ޝަމްހީދު ވިދާޅުވީ ބަޖެޓުގައި ވަކިވަކި މަޝްރޫޢުތަކަށް ޚަރަދުވާ ފައިސާ ނެތުމަކީ ކަންބޮޑުވާންޖެހޭކަމެއްކަމަށް ވިދާޅުވިއެވެ. ނަމަވެސް ބައެއް މަޝްރޫޢުތަކަށް ފައިސާ ހިމަނާފައިވާތީ މެންބަރު ވަނީ ސަރުކާރަށް ޝުކުރުއަދާކޮށްފައެވެ.

"ހުޅުމާލޭގައި ޞިއްޙީ ޚިދުމަތް ފުޅާކުރުމަށާއި އިތުރު ހޮސްޕިޓަލްތައް އެޅުމަށް އިތުރު 130 މިލިޔަނެއްހާ ރުފިޔާ ހިމަނާފައިވާތީ ސަރުކާރަށް ޝުކުރު ދަންނަވަން." ޑރ. ޝަމްހީދު ވިދާޅުވިއެވެ.

ސަރުކާރާ އިދިކޮޅު ބައެއް މެންބަރުން ބަޖެޓުގައި ތަފްސީލް ހިމަނާފައިނުވާތީ ކަންބޮޑުވުން ފާޅުކުރަމުންދާއިރު، ނިމުނު އަހަރުތަކުގައި ސަރުކާރުގެ ބަޖެޓު ކަނޑައެޅުމުގައި ވަކިވަކި ރަށްތަކަށް މަޝްރޫޢު ހިމެނީ ސިޔާސީ ވިސްނުމެއްގައި އިންތިޚާބުތަކަށް ރައްޔިތުންނާއި މެންބަރުން ރުއްސުމަށްކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވަނީ ވިދާޅުވެފައެވެ. އަދި ބަޖެޓުގައި ކިތަންމެ ގިނަ މަޝްރޫޢުތައް ޖަހާފައި އޮތް ނަމަވެސް، އެއަށް ބޭނުންވާ ފައިސާ ނެތި އެއްވެސް މަޝްރޫޢުއެއް ކުރިއަށްގެންދިއުމަކީ ސަރުކާރަށް ވާނެ ކަމެއް ނޫންކަމަށްވެސް ވަޒީރު ވިދާޅުވެފައިވެއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓާ ގުޅޭގޮތުން ކުރިއަށްދިޔަ ބަހުސް މިހާރު ނިންމާލާފައިވާއިރު، ދެން އޮންނާނީ ބަޖެޓު ކޮމިޓީން ބަޖެޓާމެދު ގޮތެއް ނިންމުމަށްފަހު، ކޮމިޓީ ރިޕޯޓު ތަޅުމަށް ހުށައެޅުމެވެ. ބަޖެޓު ފާސްކުރާނީ، ކޮމިޓީ ރިޕޯޓު ހުށައެޅުމުންނެވެ.