އިންޑިޔާގެ އިރުއުތުރު މަނީޕޫރު ސްޓޭޓްގައި ހިންގަމުންދާ ހަމަނުޖެހުންތައް ކޮންޓްރޯލް ކުރުމުގެ ގޮތުން އެ ސްޓޭޓްގެ ބައެއް ސަރަޙައްދުތަކުގައި އިންޓަރނެޓާއި މޮބައިލް ފޯނުގެ ޚިދުމަތްތައް ކަނޑައިލައި، ކަރފިޔު އިޢުލާނު ކޮށްފިއެވެ. މަނީޕޫރުގައި ހަމަނުޖެހުން ބޮޑުވެ، މެއިޓީ ދަރިކޮޅުގެ ރައްޔިތުން ވަނީ އެ ސްޓޭޓްގެ ބައެއް ސިޔާސީ ވެރިންގެ ގެދޮރު ކައިރިއަށް އެއްވެ، އެ ސަރަޙައްދުތައް ވަށައިލާފައެވެ.
މަނީޕޫރުގައި އެންމެ ފަހުގެ ހަމަނުޖެހުންތައް ފެށުނީ، މެއިޓީ ދަރިކޮޅުގެ ތިން މީހަކު މަރައިލުމާ ގުޅިގެންނެވެ. އެ ތިން މީހުންގެ ހަށިގަނޑު ފެނިފައި ވަނީ ކޯރެއްގެ ތެރެއިންނެވެ. މެއިޓީ ދަރިކޮޅުގެ މީހުން ތުހުމަތު ކުރާ ގޮތުގައި އެ އަމަލު ހިންގާފައި ވަނީ ކުއްކީ ދަރިކޮޅުގެ މީހުންނެވެ. މަރައިލާފައިވާ ތިން މީހުންނަކީ، ކުއްކީ ދަރިކޮޅުގެ މީހުން ރަހީނު ކޮށްގެން ގެންގޮސްފައިވާ މެއިޓީ ދަރިކޮޅުގެ ހަ މީހެއްގެ ތެރެއިން ތިން މީހުން ކަމަށް ބެލެވެއެވެ. އެއީ، އެއް ޢާއިލާއެއްގެ ހަ މެންބަރުންނެވެ.
އެ މަރުތަކާ ގުޅިގެން ކަންބޮޑުވުން ފާޅު ކުރުމަށް އެތަކެއް ސަތޭކަ ބަޔަކު ވަނީ އިމްފާލްގައި ދިރިއުޅޭ ޤާނޫނު ހަދާ މަޖިލީހުގެ މެންބަރުންގެ ގެދޮރު ކައިރިއަށް އެއްވެފައިވާ ކަމުގައި މަނީޕޫރުގެ ފުލުހުން ބުންޏެވެ. އެ މީހުން ދަނީ، ޤާނޫނު ހަދާ މަޖިލީހުގެ މެންބަރުންނާ ބައްދަލު ކުރަން ޑިމާންޑު ކުރަމުންނެވެ. "އެ މީހުންގެ ޑިމާންޑުތަކަށް އިންކާރު ކުރުމުން، އެ މީހުން ވަނީ [ޤާނޫނު ހަދާ މަޖިލީހުގެ މެންބަރުންގެ] ގެދޮރަށް ގަދަބާރުން ވަދެގަނެ، ގެއްލުންދީ، އެއްގަމު އުޅަނދުފަހަރުގައި ހުޅުޖަހައި، މުދަލަށް ގެއްލުންދީފައި،" ނަން ހާމަކޮށްފައި ނުވާ ފުލުހުންގެ އޮފިޝަލެއް ބުންޏެވެ.
ފުލުހުން ބުނީ، ޤާނޫނު ހަދާ މަޖިލީހުގެ ނުވަ މެންބަރެއްގެ ގެއަށް، މުޒާހަރާގެ ބައިވެރިން ޙަމަލާދީފައިވާ ކަމުގައެވެ. އަދި، އޭގެ ތެރެއިން ހަތަރު ގެއެއްގެ ތެރެއަށް ވަދެ، މުދަލާއި ތަކެއްޗަށް ގެއްލުންދީފައިވާ ކަމުގައެވެ. "އަޅުގަނޑުގެ ގެއަށް އެ ދަނީ ޙަމަލާ ދެމުން،" ޤާނޫނު ހަދާ މަޖިލީހުގައި ވެރިކަން ކުރާ ބަރްތިޔާ ޖަންތާ ޕާޓީ (ބީޖޭޕީ) ތަމްސީލު ކުރައްވާ މެންބަރެއް ކަމުގައިވާ އެލް ސުޝިންދްރާ ވިދާޅުވިއެވެ.
މެއިޓީ ދަރިކޮޅުގެ ޢާއިލާއަކަށް ނިސްބަތްވާ ހަ މެންބަރުން ގެއްލިފައިވާ ކަން ރިޕޯޓު ކޮށްފައި ވަނީ ނޮވެންބަރު 11ވަނަ ދުވަހުއެވެ. އެ ދުވަހު ފުލުހުންނާއި ކުއްކީ ދަރިކޮޅުގެ ހަތިޔާރު އެޅި ބަޔަކާ ދެމެދު ހިނގި ޙަމަލާ ބަދަލު ކުރުންތަކެއްގައި، ކުއްކީ ދަރިކޮޅުގެ 10 މީހުން މަރުވިއެވެ. ހުސްވި ހަފުތާގައި ދިން އެހެން ޙަމަލާއެއްގައި 31 އަހަރުގެ އަންހެނެއްގެ ހަށިގަނޑުގައި ހުޅުޖަހައި މަރައިލާފައިވެއެވެ. އެއީ، ކުއްކީ ދަރިކޮޅުގެ އަންހެނެކެވެ. 2023ވަނަ އަހަރުގެ މޭ މަހުން ފެށިގެން މަނީޕޫރުގައި ހިންގަމުންދާ ހަމަނުޖެހުންތަކުގައި މިހާތަނަށް 250އެއްހާ މީހުން ވަނީ މަރުވެފައެވެ. އަދި، 60,000އަށްވުރެ ގިނަ މީހުންގެ ގެދޮރު ގެއްލިފައިވެއެވެ.
މަނީޕޫރަކީ 2.3 މިލިޔަން މީހުންގެ އާބާދީއެއް ދިރިއުޅޭ ސްޓޭޓެކެވެ. އެ ސްޓޭޓްގެ އެކި ކަންކޮޅުތަކުގައި ހިންގަމުންދާ ހަމަނުޖެހުންތައް ކޮންޓްރޯލް ކުރުމަށް، ސަރުކާރުން ވަނީ އިތުރު ސިފައިން ފޮނުވާފައެވެ. މަނީޕޫރުގައި ދިރިއުޅޭ މެއިޓީއާއި ކުއްކީ ދަރިކޮޅުގެ މީހުންގެ މެދުގައި ލޭއޮހޮރުވުން ބޮޑު ހަމަނުޖެހުންތަކެއް ފަށާފައި ވަނީ ހުސްވި އަހަރުގެ މޭ މަހުއެވެ. މަނީޕޫރުގެ މައި ވާދީގައި ދިރިއުޅެނީ މެއިޓީ ދަރިކޮޅުގެ މީހުންނެވެ. އަދި, އުސް ބިންތަކުގައި ދިރިއުޅެނީ ކުއްކީ ދަރިކޮޅުގެ ޢާއިލާތަކެވެ. ދެ ފަރާތުގެ ދެމެދުގައި ހިނގަމުންދާ ހަމަނުޖެހުންތައް ކޮންޓްރޯލް ކުރަން އިންޑިޔާގެ އަސްކަރިއްޔާއިން ވެސް ދަނީ މަސައްކަތް ކުރަމުންނެވެ.
ހުސްވި އަހަރު މެއިޓީއާއި ކުއްކީ ދަރިކޮޅުގެ މީހުންގެ މެދުގައި ހަމަނުޖެހުން ހިންގަން ފަށާފައި ވަނީ, ކުއްކީ ދަރިކޮޅަށް ޤާނޫނީ ގޮތުން ދީފައިވާ އިނާޔަތްތަކާއި ފުރުޞަތުތައް މެއިޓީ ދަރިކޮޅުގެ މީހުންނަށް ފަހިކޮށްދިނުމަށް ކޯޓަކުން އަމުރު ކުރުމުންނެވެ. ކުއްކީ ދަރިކޮޅުގެ މީހުންނަށް ލިބިދީފައިވާ އިނާޔަތްތަކާއި ފުރުޞަތުތަކުގެ ތެރޭގައި އިޤުތިޞާދީ އަދި ވިޔަފާރީގެ ފުރުޞަތުތަކާއި, ސަރުކާރު ވަޒީފާތައް ހޯދުމުގެ ފުރުޞަތާއި, ތަޢުލީމީ ފުރުޞަތުތައް ހިމެނެއެވެ.