މުޅި ރާއްޖެއަށް ހުޅުވާލައިގެން ބާއްވާ 90 ޕްލަސް ގޯލްޑް ކަޕް ފުޓްބޯޅަ މުބާރާތުގެ ފުރަތަމަ މެޗުގައި ދ. ކުޑަހުވަދޫ އާއި ފުވައްމުލަކު ސިޓީ ވާދަކުރަން ޖެހިއްޖެއެވެ.
ސިޓްރޯން ރެސްޓޯރެންޓުގައި މިރޭ ކުރިއަށްދިޔަ ގުރުނެގުމުގެ ރަސްމިޔާތުގައި މުބާރާތުގައި ބައިވެރިވި 17 ޓީމު ވަނީ ހަތަރު ގުރޫޕަކަށް ބަހާލާފައެވެ. އަންނަ ބުދަ ދުވަހުން ފެށިގެން ޑިސެމްބަރު މަހުގެ 25 ވަނަ ދުވަހުގެ ނިޔަލަށް ކުރިއަށްދާ މުބާރާތުގައި މީގެ ކުރިން 22 ޓީމެއް ބައިވެރިވި ނަމަވެސް، ފަސް ޓީމެއް ވަނީ ފަހުން މުބާރާތުން ވަކިވެފައެވެ.
މި މުބާރާތް ކުރިއަށްދާނީ އެހެން މުބާރާތްތަކާ ޚިލާފަށް ގުރޫޕް ސްޓޭޖު ދެ ފިޔަވައްސަކަށް ބަހާލައިގެންނެވެ. އެގޮތުން ގުރޫޕް ސްޓޭޖުގެ ފުރަތަމަ ފިޔަވަހީގައި އެންމެ ފުލަށްދާ ޓީމު ކަޓާއިރު، ދެވަނަ ފިޔަވަހީގެ އެންމެ ފުލަށްދާ ޓީމުވެސް މުބާރާތުން ކަޓާނެއެވެ.
ދެން މުބާރާތުގައި އޮންނާނީ ކުއާޓާ ފައިނާލާއި ސެމީ ފައިނަލުގެ އިތުރުން ފައިނަލް މެޗެވެ. މުބާރާތުގައި މެޗުތައް ބަލާލުމަށް ގައުމީ ފުޓްބޯޅަ ދަނޑަށް ވަންނަން ޓިކެޓް ނަގަން ޖެހޭއިރު، ޓިކެޓް އަގުތަކަކީ 30 ރުފިޔާ އާއި، 50 ރުފިޔާ އަދި 100 ރުފިޔާއެވެ.
ގުރުނުގެމުގެ ރަސްމިއްޔާތުގައި 90 ޕްލަސް ފާރާތުން ވާހަކަދައްކަމުން ތަޖުބާކާރު ކޯޗު މުޙައްމަދު ޝާޒްލީ ބުނީ މި މުބާރާތުގެ މަގުސަދަކީ ރާއްޖޭގައި އެންމެ މޮޅު ފުޓްބޯޅަ ކުޅޭ ރަށެއް ހޮވުން ކަމަށެވެ.
"މިހާތަނަށް އައިރު އެންމެ މޮޅީ ތިމަންނަމެންނޭ ބުނެވޭނެ ރައިޓެއް އެއްވެސް ބަޔަކަށް ނެތް. އެހެން ބުނާނެ އޮފިޝަލް ރައިޓެއް އެއްވެސް ބަޔަކަށް ނެތް. އެހެންވީމާ ގޯލްޑް ކަޕް މި ނުކުތީ އެ މަގުސަދުގައި." ޝާޒްލީ ބުންޏެވެ.
ޝާޒްލީ ބުނީ ރާއްޖޭގެ ފުޓްބޯޅައިގެ ހާލަތު ރަނގަޅުކަން ގުރު ނެގުމުގެ ރަސްމިއްޔާތުން އެކަނިވެސް އެނގޭ ކަމަށެވެ. އަދި މުބާރާތުގެ އެންމެ މުހިންމު މަގުސަދުގެ ތެރޭގައި ރާއްޖޭގެ ލީގަށް ފެންވަރު ރަނގަޅު ކުޅުންތެރިން ހޯދުން ހިމެނޭ ކަމަށްވެސް ވަނީ ބުނެފައެވެ. މީގެ އިތުރުން ޝާޒްލީ ވަނީ މުބާރާތުގައި ބައިވެރުވުމަށް ޓީމުތަކުން ކުރި މަސައްކަތަށް ޝުކުރު އަދާކޮށްފައެވެ.
މުބާރާތުގެ ބައިވެރިންގެ ފަރާތުން ވާހަކަދައްކަމުން ބ. ތުޅާދޫ ޓީމުގެ އޮފިޝަލް ވަނީ ފުޓްބޯޅައިގެ ފޯރި އަލުން ގެނައުމަށް 90 ޕްލަސްގެ ޓީމުން ކުރަމުންދާ މަސައްކަތަށް ޝުކުރު އަދާކޮށްފައެވެ. އަދި ވަކިބަޔަކަށް ބެލުމެއް ނެތި، އެ ފޯރި ގެނައުމަށް އަބަދުވެސް 90 ޕްލަސްއިން މަސައްކަތް ކުރާނެ ކަމަށް އުއްމީދުކުރާ ކަމަށް ތުޅާދޫ ޓީމުގެ ފަރާތުން ވާހަކަދެއްކި އޮފިޝަލް ވަނީ ބުނެފައެވެ.
ފުޓްބޯޅައިގެ ބޮޑު ކަވަރޭޖާއެކު ކޮންމެ މެޗެއްގެ ޕްރީ ޝޯ ހިމެނޭހެން މުބާރާތުގެ 47 މެޗު ޕަބްލިކް ސަރވިސް މީޑިއާ (ޕީއެސްއެމް) ގެ ޔެސް ޓީވީން ވަގުތުން ދެއްކުމަށް ވަނީ ހަމަޖެހިފައެވެ.
މުބާރާތުގެ ގުރޫޕް ސްޓޭޖް:
ގުރޫޕް އޭ
- ފުވައްމުލަކު ސިޓީ
- ދ. ކުޑަހުވަދޫ
- ގދ. ފަރެސްމާތޮޑާ
- ހއ. ދިއްދޫ
ގުރޫޕް ބީ
- މާލެ ސިޓީ
- ތ. ތިމަރަފުށި
- ބ. އޭދަފުށި
- ބ. ތުޅާދޫ
ގުރޫޕް ސީ
- އައްޑޫ ސިޓީ
- ޅ. ކުރެންދޫ
- ކ. ހުރާ
- ކ. ގުރައިދޫ
ގުރޫޕް ޑީ
- ޅ. ނައިފަރު
- ކ. މާފުށި
- ބ. ކެންދޫ
- ރ. އަލިފުށި