މި ފަހަރުގެ ސީޒަނުގެ ނިޔަލަށް ފްރާންސްގެ ފުޓްބޯޅަ ކުލަބު ލިޔޯންގެ މާލީ ހާލަތު ރަނގަޅު ނުކުރެވިއްޖެނަމަ، ދެވަނަ ޑިވިޝަނަށް ޑީމޯޓްކުރަން ނިންމައިފިއެވެ.
ފްރާންސްގެ ޕްރޮފެޝަނަލް ފުޓްބޯޅަ ކުލަބުތަކުގެ މާލީ ހިސާބުތައް ބަލަހައްޓާ މުއައްސަސާ ޑީ.އެން.ޖީ.ސީގެ މި ނިންމުމުގެ ތެރެއިން ކުރިއަށް އޮތް ޖަނަވަރީ މަހު އައު ކުޅުންތެރިން ގަތުން ލިޔޯނަށް މަނާކުރެވޭނެއެވެ.
ލިޔޯންގެ ވެރިޔާ، ޖޯން ޓެކްސްޓަރ އަކީ އިނގިރޭސި ޕްރިމިއަރ ލީގުގެ ކްލަބް ކްރިސްޓަލް ޕެލަސްގެ ކޯ-އޯނާއެއްގެ އިތުރުން ބްރެޒިލްގެ ކްލަބް ބޮޓަފޯގޯގެ އެންމެ ބޮޑު ހިއްސާދާރެވެ. އޭނާގެ އީގަލް ފުޓްބޯޅަ ގްރޫޕުން ދާދިފަހުން އިޢުލާނުކުރި ގޮތުގައި އެ ގްރޫޕުގެ ދަރަނި 422 މިލިއަން ޕައުންޑަށް އަރައެވެ.
ލިޔޯންގެ މާލީ ހާލަތު ދަށްވުމުގެ ސަބަބުން އެ ކްލަބުގެ މުސާރައިގެ ކަންކަން ވެސް ޑީ.އެން.ޖީ.ސީ އިން ވަރަށް ގާތުން ބަލަމުންގެންދާނެ އެވެ.
ފްރާންސްގެ ޗެމްޕިއަންކަން ހަތް ފަހަރު ހޯދާފައިވާ ލިޔޯންގެ މާލީ ހާލަތު ރަނގަޅުކޮށް، ފުރަތަމަ ޑިވިޝަނުގައި ދެމިހުރުމަށްޓަކައި އަންނަ ޖަނަވަރީ މަހުގެ ތެރޭގައި އެ ކްލަބުގެ މުހިއްމު ގިނަ ކުޅުންތެރިންތަކެއް ވިއްކާލަން ޖެހިދާނެ އެވެ.
މީގެއިތުރުން، އެމެރިކާގެ ޓެކްސްޓަރ އަށް، ކްރިސްޓަލް ޕެލަސްގައި އޮތް އޭނާގެ ހިއްސާ ނުވަތަ ބޮޓަފޯގޯގެ ކުޅުންތެރިން ވިއްކައިގެން މި ދަރަނި މެނޭޖްކުރެވިދާނެ ކަމަށް ފަހުގެ މީޑިއާ ރިޕޯޓުތައް ބުނެއެވެ.
މި ފަހަރުގެ ލީގުގައި ލިޔޯން މިވަގުތު އޮތީ ތާވަލްގެ ފަސްވަނައިގައެވެ. އެ ޓީމަށް މިހާތަނަށް ކުޅުނު 11 މެޗުން ލިބިފައިވަނީ 18 ޕޮއިންޓެވެ. އަދި، އެ ޓީމު އޮތީ ޔުއެފާ ޔުރޮޕާ ލީގުގެ ނުވަވަނައިގައެވެ.