އެމެރިކާގެ ކެލިފޯނިއާ ސްޓޭޓުގެ ސެން ފްރެންސިސްކޯ ބޭ އޭރިއާގައި މިހާރު ކުރިއަށްދާ ހަވަނަ ކެރަމް ވޯލްޑް ކަޕުގެ ޓީމު އިވެންޓުން ރާއްޖޭގެ ގައުމީ ފިރިހެން އަދި އަންހެން ޓީމުން ލޯ މެޑެލް ހޯދައިފިއެވެ.
އެމެރިކާގެ ކެރަމް އެސޯސިއޭޝަން (ޔޫއެސްސީއޭ) ގެ އިސްނެގުމުގެ މަތިން، އިންޓަނޭޝަނަލް ކެރަމް ފެޑެރޭޝަން (އައިސީއެފް) އާ ގުޅިގެން ބާއްވާ މި މުބާރާތުން ރާއްޖޭގެ ފިރިހެން ޓީމު ލޯ މެޑެލް ހޯދީ ސިންގަޕޫރު ބަލިކުރުމަށްފަހުއެވެ. މި ފަހަރުގެ ކެރަމް ވޯލްޑް ކަޕުގައި ވާދަކުރާ ގައުމީ ފިރިހެން ޓީމުގައި ހިމެނޭ އެތުލީޓުންނަކީ އިސްމާޢީލް އަޒްމީނާއި، އިބްރާހީމް ހުޖާން އަލީ އާއި، ހަސަން ނާޒިމާއި، މުޙައްމަދު މުންތަސިރު އަދި ޚާތިމް ޚަލީލެވެ.
ލޯ މެޑެލް މެޗުގެ ފުރަތަމަ ގޭމުގައި ރާއްޖޭގެ އިސްމާޢީލް އަޒުމީން ވަނީ ސީދާ ދެ ގޭމުން ސިންގަޕޫރުގެ ވިޖޭ ބަލިކޮށްފައެވެ. އަދި ސިންގަލްސް ދެވަނަ މެޗުގައި ރާއްޖޭގެ މުންތަސިރު ވަނީ ސީދާ ދެ ގޭމުން ސިންގަޕޫރުގެ ލެނަސް އަތުން މޮޅުވެފައެވެ. އަދި ޑަބަލްސް މެޗުން ރާއްޖޭގެ ނާޒިމާއި ހުޖާންގެ ޕެއާ މޮޅުވީ ސީދާ ދެ ގޭމުންނެވެ. މި މޮޅާއެކު ރާއްޖެއިން ލޯ މެޑެލް ހޯދިއިރު، މިއީ ކެރަމް ވޯލްޑް ކަޕުގެ ތާރީޚުގައި ރާއްޖޭގެ ފިރިހެން ޓީމަށް ލިބުނު ފުރަތަމަ މެޑެއްޔެވެ.
މީގެ އިތުރުން މި މުބާރާތުން އަންހެން ޓީމު ލޯ މެޑެލް ހޯދީ މުބާރާތް ބާއްވާ ގައުމު ކަމަށްވާ އެމެރިކާ ބަލިކުރުމަށްފަހުއެވެ. މުބާރާތުގައި ވާދަކުރާ ރާއްޖޭގެ އަންހެން ޓީމުގައި ހިމެނޭ ކުޅުންތެރިންނަކީ އައިމިނަތު ވިދާދާއި، އައިޝަތު ނަހުފާ އާއި، އައިޝަތު ފައިނާޒް އާއި، ފާތިމަތު ރަޔާނާ އަދި އައިމިނަތު ޝުބާ އާދަމެވެ.
ލޯ މެޑެލް މެޗުގެ ސިންގަލްސް ފުރަތަމަ ގޭމުގައި ރާއްޖޭގެ ވިދާދު ވަނީ އެމެރިކާގެ ސްވަޕޫރާ ކަޓްކަމް އަތުން ސީދާ ދެ ގޭމުން މޮޅުވެފައެވެ. އެކަމަކު ދެވަނަ މެޗުގައި ރާއްޖޭގެ ރަޔާނާ ވަނީ އެމެރިކާގެ ޕްރީތީ ޖަކޯޓީ އަތުންސީދާ ދެ ގޭމުން ބަލިވެފައެވެ. ނަމަވެސް ޑަބަލްސް މެޗުގައި ރާއްޖޭގެ ނަހުފާ އާއި ފައިނާޒްގެ ޕެއާ ވަނީ ސީދާ ދެ ގޭމުން މޮޅުވެ، ލޯ މެޑެލް ކަށަވަރުކޮށްފައެވެ.
ކެރަމް ވޯލްޑް ކަޕުގައި ވާދަކޮށް ރާއްޖޭގެ ފިރިހެން އަދި އަންހެން ޓީމަށް ލޯ މެޑެލް ހޯދިއިރު، މިދިޔަ އޭޕްރީލް މަހު މާލޭގައި ބޭއްވި ހަވަނަ އޭޝިއަން ކެރަމް ޗެމްޕިއަންޝިޕުންވެސް އަންހެން ޓީމު ވަނީ ލޯ މެޑެލް ހޯދާފައެވެ. އަދި އެ މުބާރާތުގައި ރާއްޖޭގެ ފިރިހެން ޓީމު ވަނީ ރިހި މެޑެލް ހޯދާފައެވެ.
މި އަހަރުގެ ކެރަމް ވޯލްޑް ކަޕުގައިވެސް އޯޕަން ސިންގަލްސް އާއި، އޯޕަން ޑަބަލްސްގެ އިތުރުން ޓީމު އިވެންޓް އަދި ސްވިސް އިވެންޓް ކުޅުމަށް ވަނީ ހަމަޖެހިފައެވެ. މީގެ އިތުރުން ޔޫއެސް އޯޕަން އިންވިޓޭޝަނަލް މުބާރާތްވެސް ކުޅުމަށް ވަނީ ހަމަޖެހިފައެވެ.