ވައިގެ ދަތުރުފަތުރާއި ފަތުރުވެރިކަމާބެހޭ އެއްބަސްވުމެއްގައި އަޒަރުބައިޖާނާއެކު ރާއްޖެއިން ސޮއިކޮށްފި

ދިވެހިރާއްޖެއާއި އަޒަރުބައިޖާންއާ ދެމެދު ވައިގެ ދަތުރުފަތުރާއި ފަތުރުވެރިކަމާއި ގުޅޭ އެއްބަސްވުމެއްގައި ސޮއިކޮށްފިއެވެ.

މި އެއްބަސްވުންތަކުގައި ސޮއިކޮށްފައިވަނީ ޙާރިޖީ ވަޒީރު ޑރ. އަބްދުﷲ ޚަލީލް އަޒަރުބައިޖާންގެ ޚާރިޖީ ވަޒީރު ހިޒް އެކްސެލެންސީ ޖޭހުން ބައިރަމޯވްއާއެކު ބޭއްވެވި ބައްދަލުކުރެއްވުމުގައެވެ.

އަޒަރުބައިޖާންގެ ވެރިރަށް ބާކޫގައި ކުރިއަށްދާ ކޮންފެރެންސް އޮފް ދަ ޕާރޓީސް އޮފް ދަ ޔޫ.އެން.އެފް.ސީ.ސީ.ސީގެ ހަވާސާގައި ބޭއްވި ބައްދަލުކުރެއްވުމުގައި ރާއްޖެއާއި އަޒަރުބައިޖާނާއި ދެމެދު ސޮއިކޮށްފައި ވަނީ ދެޤައުމުގެ ރައްޔިތުންނަށް ދަތުރުފަތުރުކުރުމުގައި ލުއިފަސޭހަގޮތްތަކެއް ހޯދައިދިނުމާއި ގުޅޭ އެެއްބަސްވުމަކާއި ފަތުރުވެރިކަން ކުރިއެރުވުމާއިގުޅޭ އެއްބަސްވުމެކެވެ.

މި އެއްބަސްވުންތަކުގައި ދިވެހި ސަރުކާރުގެ ފަރާތުން ސޮއިކުރެއްވީ ޚާރިޖީ ވަޒީރު ޑރ.އަބްދުﷲ ޚަލީލްއެވެ، އަޒަރުބައިޖާނުގެ ސަރުކާރުގެ ފަރާތުން ސޮއިކުރެއްވީ ހާރިޖީ ވަޒީރު ޖޭހޫން ބައިރަމޯލްއެވެ.

މި އެއްބަސްވުންތަކުގެ ތެރެއިން ވައިގެ ދަތުރުފަތުރާއި ގުޅޭ އެއްބަސްވުމުގެ ސަބަބުން ދިވެހިރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރައްވާ ފަރާތްތަކަށް ވިސާއާއި ނުލައި އަޒަރުބައިޖާނަށް އެތެރެވުމާއި، ޓްރާންސިޓް ވުން އަދި 90 ދުވަހުގެ މުއްދަތަކަށް އެގައުމުގައި ހުރުމުގެ ހުއްދަ ލިބިގެންދާނެއެވެ. މި އެއްބަސްވުމަކީ ހުރިހާ ދިވެހި ރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށްޓަކައި ކުރެވޭ މަސައްކަތަށް އެޅުނު މުހިއްމު ފިޔަވަޅެއްކަމަށް ހާރިޖިއްޔާއިން ބުނެއެެވެ. އަދި ފަތުރުވެރިކަމާއި ގުޅޭ އެއްބަސްވުމުގެ ދަށުން އިޤްތިޞާދީ، ސަގާފީ އަދި އިޖްތިމާއީގޮތުން ދެ ޤައުމަށްވެސް ފައިދާވާނޭ ގޮތަށް މަސައްކަތްތައް ކުރިއަށްގެންދާނެއެވެ.

އެއްބަސްވުމުގައި ސޮއިކުރެއްވުމަށް ބޭއްވި ރަސްމިއްޔާތުގައި ޚާރިޖީ ވަޒީރު ޑރ. އަބްދުﷲ ޚަލީލް ދެއްކެވި ވާހަކަފުޅުގައި، ދިވެހިރާއްޖެއާއި އަޒަރުބައިޖާންއާ ދެމެދު އޮންނަ ގާތް ގުޅުމުގެ މުހިންމުކަމުގެ މައްޗަށް ބައްލަވާލެއްވިއެވެ. އަދި ސޮއިކުރެވުނު އެއްބަސްވުންތަކުގެ ސަބަބުން މި ގުޅުން އިތުރަށް ބަދަހިވެގެންދާނެ ކަމަށާއި، ދެގައުމުގެ ރައްޔިތުންގެ ދެމެދުގައި އޮންނަ ގުޅުން އިތުރަށް ވަރުގަދަވެ ސަގާފީ ގުޅުންތަކުގެ އިތުރުން ވިޔަފާރީގެ ގުޅުންތައް ބަދަހިވެގެންދާނެކަމަށް އުއްމީދުކުރައްވާކަަމަށް ވަޒީރު ވިދާޅުވިއެވެ. މީގެ އިތުރުން ބައިނަލްއަޤްވާމީ މަސްރަހުގައިވެސް ދެޤައުމަށް ފައިދާވަނިވި މައްސަލަތަކުގައި ދިވެހިރާއްޖެއިން އަޒަރުބައިޖާންއާއިއެކު ގާތުން މަސައްކަތް ކުރައްވާނެކަމަށް ވަޒީރު ވިދާޅުވިއެވެ..