އެއް އަހަރުތެރޭ މަސްތުވާތަކެތީގެ 158 އޮޕަރޭޝަން، 48 ޑްރަގް ކެފޭ ބަންދުކޮށްފި

ޑްރަގް ކެފޭތަކުގެ ގޮތުގައި ހިންގަމުންދިޔަ 48 ތަނެއް ބަންދުކޮށްފައިވާކަމަށް ފުލުހުން ވިދާޅުވެއްޖެއެވެ.

ޑްރަގުގެ ވަބާއިން މުޖުތަމަޢު ސަލާމަތްކުރުމަށް ސަރުކާރުން ދަނީ ޚާއްސަ މަސައްކަތްތަކެއް ކުރަމުންނެވެ. މަސްތުވާތަކެތީގެ ވިޔަފާރި ހުއްޓުވުމާއި މަސްތުވާތަކެތި ބޭނުންކުރާ މީހުން މުޖުތަމަޢުން މަދުކޮށް، އެމީހުންނަށް ބޭނުންވާ އެހީތެރިކަން ފޯރުކޮށްދިނުމަށް ތަފާތު އެކި ޕްރޮގްރާމްތައް ކަމާގުޅުންހުރި އިރާދާތައް ގުޅިގެން ވަނީ ފަށާފައެވެ.

ފުލުހުންގެ މަސައްކަތްތަކާއި ގުޅޭ މަޢުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުކުރެއްވުމުގައި ހެޑް އޮފް ޑްރަގް އެންފޯސްމަންޓް، ސްޕްރިންޓެންޑެންޓް އޮފް ޕޮލިސް، ނާހިދު ޙުސައިން ވިދާޅުވީ، މަސްތުވާތަކެތި ބޭނުންކޮށް ވިއްކުމަށް ކެފޭއެއްގެ ގޮތުގައި ހިންގާ 48 ތަނެއް ބަންދުކޮށްފައިވާއިރު، މަސްްތުވާތަކެތީގެ ވަބާގައި ޖެހިފައިވާ ގިނަ އަދަދެއްގެ ބަޔަކު ފަރުވާގެ ނިޒާމުގެތެރެއަށް މިހާރު ވައްދާފައިވާކަމަށެވެ.

"މަސްތުވާތަކެއްޗަށް ދެވިހިފާފައިވާ މީހުންނާ، މަސްތުވާތަކެތި ބޭނުންކުރުމަށް ސަލާންޖަހާމީހުން އަދި ތަކުރާރުކޮށް ޖިނާޢީ ކުށްތައް ކުރާ މިފަދަ މީހުންގެތެރެއިން 49 މީހުން، ނެޝަނަލް ޑްރަގް އެޖެންސީގެ ފަރުވާގެ ނިޒާމުގެތެރެއަށް ވަނީ ގެންގޮސްފަ" ހެޑް އޮފް ޑްރަގް އެންފޯސްމަންޓް، ސްޕްރިންޓެންޑެންޓް އޮފް ޕޮލިސް، ނާހިދު ޙުސައިން ވިދާޅުވިއެވެ.

ނާހިދު ވިދާޅުވީ ބަނގުރަލުގެ ވިޔަފާރި ހުއްޓުވުމަށް ސަފާރީތަކަށް ކުރިއަށްގެންދާ އޮޕަރޭޝަންގެތެރެއިން 57 ސަފާރީއެއް މިހާތަނަށް ބަލާ ފާސްކޮށްފައިވާކަމަށެވެ.

މަސްތުވާތަކެއްޗާ ގުޅުންހުރި 158 އޮޕަރޭޝަނެއްގައި މި ވޭތުވެދިޔަ 1 އަހަރު 12561 މީހުން ބަލާ ފާސްކޮށް 1009 މީހުން ފުލުހުންގެ ބެލުމުގެ ދަށަށް ގެންގޮސްފައިވެއެވެ. އަތޮޅުތަކުގައި 12 އޮޕަރޭޝަން ހިންގާފައިވެއެވެ. އަދި 183 ކިލޯގެ މަސްތުވާތަކެތި އަތުލައިގެންފައިވެއެވެ. މީގެ އިތުރުން 8451 ބަނގުރާ ދަޅު ނުވަތަ ފުޅި ވަނީ އަތުލައިގެންފައެވެ. މި ތަކެތީގެ މަގުމަތީ އަގު 385 މިލިއަން ރުފިޔާއަށް އަރައެވެ.

މަސްތުވަތަކެއްޗާ ގުޅުންހުރި 683 މައްސަލަ ފުލުހުންގެ އިދާރާއަށް ހުށަހެޅިއިރު، 345 މައްސަލަ ވަނީ ޕީޖީކޮށްފައެވެ. މިހާތަނަށް 19 މައްސަލައެއްގައި 22 މީހުންގެ މައްޗަށް ކުށް ސާބިތުވެ ވަނީ ހުކުމްކޮށްފައެވެ. ފުލުހުން ވިދާޅުވީ މަސްތުވާތަކެއްޗާ ގުޅުންހުރި މައްސަލަތަކުގައި މިހާތަނަށް 142 ބިދޭސީން ޑީޕޯޓްކޮށްލަފައިވެސްވާކަމަށެވެ.

މީގެއިތުރުން ޤާނޫނީ ގޮންޖެހުންތައް ޙައްލުކުރުމަށް މަސްތުވަތެކެތީގެ ޤާނޫނަށް އިސްލާހުގެނައުމުގެ ބިލުގެ ޑްރާފްޓް، ދާޚިލީ ސަލާމަތާ ފަންނިއްޔާތާ ބެހޭ ވުޒާރާއާއެކު އެކުލަވާލައި މިހާރު ބަންޑާރަނައިބުގެ އޮފީހަށް ވަނީ ހުށައަޅާފައެވެ. އެ ބިލު މަޖިލީހުން ފާސްވެގެންދާއިރު މަސްތުވާތަކެތީގެ މައްސަލަތަކުގައި ހަރުކަށި އަދަބު ކަނޑައެޅުމާއި ފަރުވާގެ ނިޒާމު ހަރުދަނާކުރުމާއެކު ވަށަޖެހޭ ނިޒާމެއް ޤައިމުކުރުމަށް ގެންނަންޖެހޭ އިސްލާހުތައް ގެނެވޭނެއެވެ. މިއާއެކު ކުޑަކުދިން ބައިވެރިކުރާ އެފަދަ މައްސަލަތަކުގައި ހަރުކަށި އަދަބު ކަނޑައެޅުމާއި މަސްތުވަތެތީގެ ވިޔަފާރިން ހޯދާ މުދާ ދަޢުލަތަށް ނެގޭނެ ގޮތްތަކެއް ޤާނޫނުން ކަނޑައެޅިގެންދާނެއެވެ.