ރަޝިޔާ-ޔޫކްރެއިން ހަނގުރާމަ ހުއްޓުމަކަށް ގެނައުމަށް އެމެރިކާގެ އިންތިޚާބީ-ރައީސް ޑޮނަލްޑް ޓްރަމްޕް އިސްވެ ފަށްޓަވާ ސުލްޙައިގެ މަޝްވަރާތަކުގައި ބައިވެރިވާން ތައްޔާރަށް އޮތް ކަން ރަޝިޔާއިން ހާމަކޮށްފިއެވެ. މި ކަން ހާމަކުރައްވާފައި ވަނީ ޖެނީވާގައި ހުންނަ އދގެ އޮފީހަށް ކަނޑައަޅާފައި ހުންނަވާ ރަޝިޔާގެ ސަފީރު ގިނާޑީ ގަތިލޮފެވެ. އޭނާ ވިދާޅުވީ، ހަނގުރާމައިގެ މައިދާނުގައި ރަޝިޔާއިން ހޯދާފައިވާ ކުރިއެރުންތަކަށް ޓްރަމްޕް ފަށްޓަވާ މަޝްވަރާތަކުގައި ރިއާޔަތް ކުރަން ޖެހޭނެ ކަމުގައެވެ.
ނޮވެންބަރު 5ވަނަ ދުވަހު އެމެރިކާގައި ބޭއްވި ރިޔާސީ އިންތިޚާބު ކާމިޔާބު ކުރައްވާފައިވާ އިދިކޮޅު ރިޕަބްލިކަން ޕާޓީގެ ކެނޑިޑޭޓު، ކުރީގެ ރައީސް ޓްރަމްޕަކީ ރަޝިޔާ-ޔޫކްރެއިން ހަނގުރާމައާ ދެކޮޅު ބޭފުޅެކެވެ. އަދި، ޔޫކްރެއިނަށް އެމެރިކާއިން އެއްވެސް ހައްދެއް ނެތި އެތަކެއް ބިލިޔަން އެމެރިކާ ޑޮލަރުގެ ހަތިޔާރު ފޯރުކޮށްދިނުމަށް ވެސް އިންކާރު ކުރައްވަމުން ގެންދަވާ ބޭފުޅެކެވެ.
ވެރިކަމާ ހަވާލުވެ ވަޑައިގަންނަވާ ފުރަތަމަ ދުވަހު، އެ ހަނގުރާމަ ނިމުމަކަށް ގެންނަވާނެ ކަމުގައި ޓްރަމްޕް ވަނީ ވިދާޅުވެފައެވެ. ނަމަވެސް، އެ ކަން ކުރައްވާނެ ގޮތް ސާފުކޮށްދެއްވާފައެއް ނެތެވެ. އޭނާގެ ވެރިކަމުގައި ޔޫކްރެއިނަށް ހަތިޔާރު ފޯރުކޮށްދިނުން ހުއްޓައިލާނެ ކަމަށް، ނުވަތަ މެދުކަނޑައިލާނެ ކަމަށް ބެލެވޭތީ ކީވްގެ އިތުރުން ވިލާތުގެ ޤައުމުތަކުގައި ވެސް ވަނީ ކަންބޮޑުވުން އިތުރުވެފައެވެ.
"ޔޫކްރެއިން ކާރިސާ އެންމެ ދުވަހަކުން ޙައްލު ކުރައްވަން ޓްރަމްޕް ވަނީ ވަޢުދުވެ ވަޑައިގަންނަވާފައި. އޯކޭ، އެ ކަން ކުރެވޭތޯ ބަލަންވީ. އެކަމަކު އަޅުގަނޑުމެންނަކީ ޙަޤީޤަތަށް ވިސްނާ ބަޔެއް، އަދި ދުވަހަކު ވެސް އެ ކަން ހާސިލު ނުކުރެވޭނެ ކަމަށް ޤަބޫލު ކުރަން. ނަމަވެސް، އޭނާ އިސްވެ އެ ކަން [ސުލްޙައިގެ މަޝްވަރާތައް] ފަށްޓަަވައިފި ނަމަ ނުވަތަ އެ ކަމަށް ގޮވައިލައްވައިފި ނަމަ، އެޅުގަނޑުމެން އެ ކަމަށް އިޖާބަދޭނަން،" ގަތިލޮފް ވިދާޅުވިއެވެ.
އޭނާ ވިދާޅުވީ، ސުލްޙައިގެ މަޝްވަރާތަކުގައި ރަޝިޔާއިން ބައިވެރިވާނީ، ހަނގުރާމައިގެ މައިދާނުގެ ޙަޤީޤަތްތަކަށް ބިނާކޮށް ކަމުގައެވެ. އަދި، ދެ އަހަރާއި ހަ މަހަށް ދެމިގެން ގޮސްފައިވާ ހަނގުރާމައިގައި ޔޫކްރެއިންގެ ސިފައިން ފަހަތަށް ޖެހެމުންދާ ކަމުގައި ވެސް އޭނާ ވިދާޅުވިއެވެ. މި އަހަރުގެ ތެރޭގައި ރަޝިޔާގެ ސިފައިން ދަނީ ބޮޑެތި ކުރިއެރުންތަކެއް ހޯދަމުންނެވެ. އަދި، ޔޫކްރެއިންގެ ބިމުގެ ފަސްބައިކުޅަ އެއްބައި މި ވަގުތު އޮތީ ރަޝިޔާގެ ކޮންޓުރޯލުގެ ދަށުގައެވެ.
ހަނގުރާމަ ނިމުމަކަށް ގެނައުމާ ގުޅޭ ގޮތުން ޔޫކްރެއިންގެ ރައީސް ވޮލޮޑޮމީރް ޒެލެންސްކީ ގެންގުޅުއްވާ ވިސްނުން ތަފާތެވެ. ޔޫކްރެއިނަށް އަރައިގަނެފައިވާ ރަޝިޔާގެ ހުރިހާ ސިފައިން ފޭބުމުން މެނުވީ ސުލްޙައަށް މަސައްކަތް ނުކުރައްވާނެ ކަމުގައި އޭނާ ގެންދަވަނީ ވިދާޅުވަމުންނެވެ. އޭގެ ތެރޭގައި 2014ވަނަ އަހަރު ރަޝިޔާއިން އަތްގަދަ ކޮށްފައިވާ ޔޫކްރެއިންގެ ބިންތައް ވެސް ހިމެނެއެވެ.
ޓްރަމްޕް ޤަބޫލު ކުރައްވާ ގޮތުގައި، މި ވަގުތު ހަނގުރާމަ ނިމުމަކަށް ގެނެވޭ ހަމައެކަނި ގޮތަކީ، ރަޝިޔާއިން އަތްގަދަ ކޮށްފައިވާ ބިންތައް އެ ޤައުމަށް ދޫކޮށްލަން ޔޫކްރެއިނުން އެއްބަސްވުމެވެ. ނަމަވެސް، ހުސްވި ހަފުތާގައި ވިލާތުގެ ޤައުމުތަކުގެ ވެރިންނާ ވާހަކަފުޅު ދައްކަވަމުން ޒެލެންސްކީ ވަނީ އެ ކަމަށް އިންކާރު ކުރައްވާފައެވެ. އޭނާ ވިދާޅުވީ، އެއީ "ޔޫކްރެއިނަށް ބަލައިނުގަނެވޭނެ" ހުށަހެޅުމެއް ކަމަށާއި، އެއީ "ވިލާތުގެ ޤައުމުތަކުން އަމިއްލަ މަރުވުން" ފަދަ އަމަލަކަށް ވާނެ ކަމުގައެވެ.
މަސްރަޙު ދިރާސާ ކުރާ ފަރާތްތަކުން ޤަބޫލު ކުރާ ގޮތުގައި، ރަޝިޔާ-ޔޫކްރެއިން ހަނގުރާމައަކީ، ޕްރޮކްސީއެއް ނުވަތަ މެދުވެރިއެެއްގެ ގޮތުގައި ޔޫކްރެއިން ބޭނުންކޮށްގެން އެމެރިކާއާއި ހުޅަނގުން، ޚާއްޞަކޮށް ހުޅަނގުގެ ސަލާމަތީ އިއްތިޙާދު (ނޭޓޯ)ން، ރަޝިޔާއާ ދެކޮޅަށް ކުރަމުންދާ ޕްރޮކްސީ ހަނގުރާމައެކެވެ. 2022ވަނަ އަހަރު ރަޝިޔާއިން ހަނގުރާމަ ފަށާފައި ވަނީ، ނޭޓޯއާއި ވިލާތުގެ އިއްތިހާދު (އީޔޫ)ގެ މެންބަރު ކަން ހޯދުމަށް ޔޫކްރެއިނުން މަސައްކަތް ފެށުމުންނެވެ. އެ މަސައްކަތްތައް ހުއްޓައިލުމަކީ ރަޝިޔާއިން ހަނގުރާމަ ނިމުމަކަށް ގެނައުމަށް ހުށަހަޅާފައިވާ މުހިންމު ޝަރުޠެކެވެ.
ގަތިލޮފް ވިދާޅުވީ، އެމެރިކާގެ ރައީސް ކަމުގެ މަޤާމާ ޓްރަމްޕް ހަވާލުވެ ވަޑައިގަތުމަކީ، ރަޝިޔާއާއި އެމެރިކާއާ ދެމެދު ހީނަރުވެފައި އޮތް ގުޅުންތައް އަލުން އިޔާދަ ކުރުމުގެ މަޝްވަރާތައް ފެށުމަށް ލިބުނު އައު ފުރުޞަތެއް ކަމުގައެވެ. ނަމަވެސް، ގުޅުންތައް މުޅިން ރަނގަޅު ކުރުމަކީ ކުރެވިދާނެ ކަމެއް ކަމުގައި ޤަބޫލު ނުކުރައްވާ ކަން ވެސް އޭނާ ފާހަގަ ކުރެއްވިއެވެ.
"އެމެރިކާގެ ސިޔާސީ ވެރިން، ދާޚިލީ ސިޔާސީ ކަންކަން ބަދަލުވި ނަމަވެސް، މޮސްކޯ އޮބިއަޅުވާފައި ބާއްވަން [ވޮޝިންގޓަނުން] އަބަދު ވެސް މަސައްކަތް ކުރާނެ، އެއީ މޫލާފައިވާ ވިސްނުމެއް، ސަރުކާރު ބަދަލުވި ނަމަވެސް އެ ވިސްނުން ބަދަލެއް ނުވާނެ،" ގަތިލޮފް ވިދާޅުވިއެވެ. ނަމަވެސް، އެމެރިކާގެ އިންތިޚާބުގެ ނަތީޖާއާ އެކު ދެ ޤައުމުގެ ދެމެދުގައި މަޝްވަރާތައް ފެށުމުގެ އުންމީދު އައުވެފައިވާ ކަން އޭނާ ފާހަގަ ކުރެއްވިއެވެ.
ރަޝިޔާއާއި ޔޫކްރެއިނާ ދެމެދު މިހާރު ވެސް ދަނީ މެދުކެނޑުމެއް ނެތި ޙަމަލާތައް ބަދަލު ކުރަމުންނެވެ. ޔޫކްރެއިނުން ބުނީ، ފާއިތުވި 24 ވަރަކަށް ގަޑިއިރުގެ ތެރޭގައި ރަޝިޔާއިން ދީފައިވާ ޑްރޯން ޙަމަލާތަކެއްގައި ޢާންމުންގެ އެކަކު މަރުވެ، ޢުމްރާނީ ވަސީލަތްތަކަށް ބޮޑެތި ގެއްލުންތަކެއް ލިބިފައިވާ ކަމުގައެވެ. ޑްރޯން ޙަމަލާތައް އަމާޒު ކޮށްފައި ވަނީ ޔޫކްރެއިންގެ ބަނދަރުމަތީ ރަށް، އޮދެއްސާގައި ހުންނަ ޢާންމުން ދިރިއުޅޭ އިމާރާތަކާއި ހަކަތައިގެ ވިއުގައަށް ކަމުގައި ޔޫކްރެއިނުން ބުންޏެވެ.