ބާސެލޯނާގެ ސްޕެއިން ވިންގް އަންސޫ ފަޓީއަށް އަނިޔާވެ، ކުރިއަށް އޮތް ހަތަރު ހަފްތާއަށް ކުޅުމާ ދުރުގައި ހުންނަން ޖެހިދާނެކަމަށް އެ ކްލަބުން ބުނެފިއެވެ.
އުމުރުން 22 އަހަރުގެ ފަޓީގެ ފައިގެ ފަލަމަސްގަނޑަށް އަނިޔާވީ، ބުދަ ދުވަހު ބޭއްވި ފަރިތަކުރުންތަކުގައެވެ.
ފަޓީއަށް އަނިޔާވެފައިވާކަން ބާސެލޯނާ އިން ކަށަވަރުކޮށްދީފައިވާއިރު، އެ ކްލަބުން ވަނީ އޭނާގެ ކަނާތު ފައިގެ ފަލަމަސްގަނޑުގެ ތަންކޮޅަކަށް ލިބިފައިވާ މި އަނިޔާގެ ސަބަބުން އުނދަގުލާ ކުރިމަތިލާންޖެހިފައިވާ ކަމަށް ބުނެފައެވެ. އަދި މި އަނިޔާގެ ސަބަބުން ގާތްގަނޑަކަށް މަހެއްހާ ދުވަހަށް ފަޓީއަށް ކުޅުމާ ދުރުގައި ހުންނަން ޖެހިދާނެ ކަމަށް ވެސް ބުނެފައެވެ.
ޒުވާން އުމުރުގައި ބާސެލޯނާ އާއި ސްޕެއިނުގެ އެކި އުމުރު ފުރައިގެ ޓީމުތަކުން ވިދާލި ފަޓީ އަކީ ފަހަކަށް އައިސް އަނިޔާގެ ގިނަ މައްސަލަތަކެއް ކުރިމަތިވަމުން އަންނަ ކުޅުންތެރިއެކެވެ.
ފަޓީ އަށް އެންމެ ފުރަތަމަ ސަމާލުކަން ހުއްޓުނީ 2019 ގައި، އުމުރުން އެންމެ 17 އަހަރުގައެވެ. އޭގެ ދެ އަހަރުފަހުން، ބާސެލޯނާގެ ލިއޮނަލް މެސީ ބޭނުންކުރި 10 ނަންބަރު ޖާޒީ އޭނާ އަށް ވަނީ ދީފައެވެ.
ނަމަވެސް، 2020 ވަނަ އަހަރުގެ ނޮވެންބަރު މަހުގެ ތެރޭގައި ކުރިމަތިވީ ކަކުލުހުޅުގެ ސީރިއަސް އަނިޔާއަކަށްފަހު، ފަޓީއަށް ވަނީ ފަހަކަށްއައިސް އަނިޔާގެ އެކިއެކި މައްސަލަތަކާ ކުރިމަތިލާންޖެހުމުގެ ސަބަބުން ފިޓްނަސް ހިފެހެއްޓުމުގައި ދަތިތައް ކުރިމަތިވެފައެވެ. އެގޮތުން 2023/2024 ވަނަ އަހަރުގެ ސީޒަނުގައި ލޯން އުސޫލުން ބްރައިޓަން އަށް ކުޅުނުއިރު އަނިޔާގެ ސަބަބުން 14 ވަރަކަށް މެޗު ގެއްލިފައިވެއެވެ.
ނިމިދިޔަ ސީޒަންގައި ލޯން އެއްބަސްވުމެއްގައި އިނގިރޭސި ލީގުގައި ކުޅުމަށްފަހު، އެނބުރިއައިސް ބާސެލޯނާ އާއެކު މި ފަހަރުގެ ސީޒަނުގައި ފަޓީ ވަނީ ހުރިހާ މުބާރާތެއްގައި އެ ޓީމަށް ހަތް މެޗު ކުޅެދީފައެވެ. އޭގެތެރެއިން، ފުރަތަމަ އެގާރައިގައި ހިމެނިގެން އޭނާ ކުޅެފައިވަނީ އެންމެ މެޗެކެވެ.