ބ. އަތޮޅުގައި ފޯރިއާއެކު ކުރިޔަށްދިޔަ ބެޓަރ އިން ބާ ފުޓްސަލް ފިއެސްޓާގެ ފިރިހެން ޑިވިޝަނުގެ ޗެމްޕިއަންކަން އޭދަފުށި އަދި އަންހެން ޑިވިޝަނުގެ ޗެމްޕިއަންކަން ގޮއިދޫން ޖެހިޖެހިގެން ދެވަނަ ފަހަރަށް ހޯދައިފިއެވެ.
މުބާރާތުގެ އަންހެން އަދި ފިރިހެން ޑިވިޝަނުގެ ފައިނަލް މެޗު ޝަރަފްވެރިކޮށްދެއްވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލެވެ.
މުބާރާތުގެ ފިރިހެން ޑިވިޝަންގެ ޗެމްޕިއަންކަން މުބާރާތް ބޭއްވި އޭދަފުށިން ހޯދީ ރޭ ކުޅުނު ފައިނަލްގައި ކިހާދޫ 6-0 ގެ ނަތީޖާއަކުން ބަލިކޮށްގެންނެވެ. މި މެޗުގައި އެއް ލަނޑު ފިޔަވާ އެހެން ހުރިހާ ލަނޑެއް ފެނުނީ ދެވަނަ ހާފުގައެވެ.
ފުރަތަމަ ހާފުގައި އޭދަފުށީގެ ލަނޑު ކާމިޔާބުކޮށްދިނީ އަލީ ނަސީމެވެ. ދެވަނަ ހާފްގައި އޭދަފުށިން ވަނީ އިތުރު ފަސް ލަނޑު ޖަހާފައެވެ. މި ލަނޑުތަކުގެ ތެރެއިން ދެ ލަނޑު މުހައްމަދު ފާސިރު ޖެހިއިރު ހުސެއިން ޝަރީފްވެސް ވަނީ ދެ ލަނޑު ޖަހާފައެވެ. ދެވަނަ ހާފުގައި އެ ޓީމަށް ދެން ލަނޑު ކާމިޔާބުކޮށްދިނީ ފުރަތަމަ ހާފުގައި ލަނޑު ޖެހި އަލީ ނަސީމެވެ.
ފިރިހެން ޑިވިޝަންގެ މޮޅު ކުޅުންތެރިއަކަށް ހޮވުނީ އޭދަފުށީގެ ކެޕްޓަން އިޝާން އިބްރާހީމް (ސައްޓު) އެވެ. މުބާރާތުގެ ފިރިހެން ޑިވިޝަންގެ ރަންބޫޓު ހާސިލުކޮށްފައިވަނީ މުޙައްމަދު ފާސިރެވެ. 18 އަހަރުން ދަށުގެ އެންމެ އުއްމީދީ ކުޅުންތެރިއަކަށް ގޮއިދޫ ޓީމްގެ މުހައްމަދު ޝުއާއު ހޮވުނުއިރު، މުޅި މުބާރާތުގެ އެންމެ މޮޅު ފަސް ކުޅުންތެރިންވެސް ވަނީ ހޮވާފައެވެ. އެއީ އޭދަފުށީގެ އިޝާން އިބްރާހީމް, މުޙައްމަދު ފާސިރު, ކީޕަރު އަބްދުالله ނާސިހު, ކިހާދޫގެ ހުސެެއިން ހަނާން އަދި ދަރަވަންދޫގެ މުޙައްމަދު ސިމާން އެވެ.
އަންހެން ޑިވިޝަނުގެ ޗެމްޕިއަންކަން ގޮއިދޫން ހޯދީ ފައިނަލުގައި 3-0 ގެ ނަތީޖާއަކުން ދޮންފަނު ބަލިކޮށްގެންނެވެ. މެޗުގައި ގޮއިދޫގެ ތިން ލަނޑުވެސް ޖެހީ ފައިނަލް މެޗުގެ މޮޅު ކުޅުންތެރިޔާ އަދި މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދި އެ ޓީމުގެ ކެޕްޓަން މައީޝާ އަބްދުލް ހަންނާނެވެ.
އަންހެން ޑިވިޝަންގެ 18 އަހަރުން ދަށުގެ އެންމެ އުންމީދީ ކުޅުންތެރިއަކީ ގޮއިދޫގެ ފާތިމަތު ޔޫހާ އަހުމަދު ރިޔާޒު އެވެ. އަންހެން ޑިވިޝަންގެ އެންމެ މޮޅު ފަސް ކުޅުންތެރިން ނަކީ ގޮއިދޫގެ މައީޝާ އާއި ފިރުޝާނާ ނަސީރު އާއި ދޮންފަނު ޓީމްގެ އާމިނަތު ފަޒްލާ އާއި ދޮންފަނު ކީޕަރު އާމިނަތު ލީޒާ އާއި ދަރަވަންދޫ ކެޕްޓަން ފާތިމަތު މާޒިނާ އެވެ.