ފީފާ ވޯލްޑް ކަޕް ކޮލިފައިންގައި އަންނަ ބުރާސްފަތި ދުވަހު ޕެރެގުއޭ އާއި ދެކޮޅަށް ކުޅޭ މެޗަށް ދެކުނު އެމެރިކާ އާއި ދުނިޔޭގެ ޗެމްޕިއަން އާޖެންޓީނާ އިން ފަރިތަކުރުންތައް ފަށައިފި އެވެ.
އާޖެންޓީނާގައި އެ ޓީމުގެ ފަރިތަކުރުންތައް ފަށާފައިވާއިރު ޕެރަގުއޭ މިވަގުތު އޮތީ ވަރަށް ރަގަޅު ފޯމެއްގައެވެ. އެގޮތުން އެ ޓީމު އެންމެ ފަހުން ކުޅުނު ހަތަރު މެޗުންވެސް ވަނީ މޮޅުވެފަ އެވެ. އަދި މިވަގުތު ދެކުނު އެމެރިކާގެ ކޮލިފައިންގެ ހަވަނައިގައި މިވަގުތު ޕެރަގުއޭ އޮތްއިރު މި މެޗުން އާޖެންޓީނާ އަށް ތިން ޕޮއިންޓް ލިބިއްޖެނަމަ ތާވަލުގެ އެއްވަނައިގައި ހަމަޖެހިލެވޭނެ އެވެ.
އެމެރިކާ އާއި މެކްސިކޯގެ އިތުރުން ކެނެޑާގައި ބޭއްވުމަށް ހަމަޖެހިފައިވާ ވޯލްޑްކަޕްގެ ކޮލިފައިންގައި އާޖެންޓީނާ މިހާތަނަށް 10 މެޗު ކުޅެފައިވާއިރު އެ ގައުމުން ވަނީ 22 ޕޮއިންޓާއެކު ތާވަލުގެ އެއްވަނަ މަގާމް ހޯދާފަ އެވެ. ޖުމްލަ 10 ޓީމު ވާދަކުރާ ދެކުނު އެމެރިކާގެ ކޮލިފައިންގެ ދެވަނައިގައި އޮތީ 19 ޕޮއިންޓް ހޯދައިގެން ކޮލަމްބިއާ އެވެ.
ކޮލިފައިންގ ހަމަޖެހިފައިވާ ގޮތުން ދިހަ ޓީމުގެ ތެރެއިން ގަދަ ހަ ޓީމަށް 2026 ވަނަ އަހަރުގެ ވޯލްޑްކަޕްގެ ޖާގައެއް ލިބިގެންދާއިރު ހަތް ވަނައަށް ދާ ޓީމެއް ޖެހޭނީ އިންޓަރ ކޮންފެޑަރޭޝަންގެ ޕްލޭ އޮފް ދެ މެޗު ކުޅުމަށެވެ.
ދެކުނު އެމެރިކާ ބައްރުގެ ކޮލިފައިންގައި މިހާތަނަށް ކުޅުނު މެޗުތަކުގައި އާޖެންޓީނާގެ ކެޕްޓަން ލިއޮނެލް މެސީ ވަނީ 6 ގޯލު ޖަހާފަ އެވެ.
ޕެރަގުއޭ އާއި ދެކޮޅަށް ބުރާސްފަތި ދުވަހު ކުޅުމަށްފަހު އޭގެ ފަސް ދުވަސް ފަހުން އާޖެންޓީނާ ނިކުންނާނީ ޕެރޫ އާއި ދެކޮޅަށެވެ.