ޖަރުމަނުވިލާތުގެ އެއަރލައިން، ލުފްތަންޒާގެ މަތިންދާބޯޓަކަށް ބާރުގަދަ ލޮޅުންތަކެއް އަރައި، އޭގައި ދަތުރު ކުރަމުން ދިޔަ 11 ފަސިންޖަރަކަށް އަނިޔާވެއްޖެއެވެ. ލުފްތަންޒާގެ މަތިންދާބޯޓެއް ބާރުގަދަ ލޮޅުންތަކެއްގައި ޖެހިފައި ވަނީ އާޖެންޓީނާގެ ބޮއެނޯސް އައިރިސުން ފުރައިގެން ފްރަންކްފުރްތަށް ދަތުރު ކުރަމުން ދަނިކޮށް އެޓްލާންޓިކް ކަނޑުގެ މަތިންނެވެ.
ލުފްތަންޒާއިން ބުނީ، މި ހާދިސާގައި އަނިޔާވި މީހުންގެ ތެރޭގައި ފަސް ފަސިންޖަރުންނާއި ހަ ފަޅުވެރިން ހިމެނޭ ކަމުގައެވެ. ނަމަވެސް، އެ މީހުންނަށް ބޮޑެތި އަނިޔާތަކެއް ލިބިފައި ނުވާ ކަމުގައި އެ އެއަރލައިނުން ބުންޏެވެ. "މި ހާދިސާގައި ބޯޓަށް އެއްވެސް ވަރެއްގެ ގެއްލުމެއް، ނުރައްކަލެއް ކުރިމަތިވެފައެއް ނުވޭ،" އެ އެއަރލައިންގެ ތަރުޖަމާނު ބުންޏެވެ.
އެއްވެސް ނުރައްކަލެއް ކުރިމަތިނުވެ، މަތިންދާބޯޓު ފްރަންކްފުރްތަށް ދަތުރު ކޮށްފައިވާ ކަމަށާއި، އެ ރަށުގެ ވައިގެ ބަނދަރުގައި ޖެއްސުމާ އެކު، އަނިޔާވި މީހުންނަށް ފަރުވާ ދީފައިވާ ކަމުގައި ވެސް ލުންތަންޒާއިން ބުންޏެވެ. ޓަރބިޔުލެންސް ނުވަތަ ވައިގެ ތެރޭގައި ލޮޅުންގަނޑުގައި ޖެހިފައި ވަނީ ބޯއިންގ 8-747 މަރުކާގެ މަތިންދާބޯޓެކެވެ. މި ހާދިސާ ހިނގި ވަގުތު ބޯޓުގައި 329 ފަސިންޖަރުންނާއި 19 ފަޅުވެރިން ތިއްބެވެ.
މޭ މަހުގެ ތެރޭގައި ހިނގި މި ފަދަ އެހެން ހާދިސާއެއްގައި ފަސިންޖަރެއްގެ ފުރާނަ ގެއްލިފައިވެއެވެ. ސިންގަޕޯރ އެއަރލައިންސްގެ މަތިންދާބޯޓެއް ލޮޅުންގަނޑެއްގައި ޖެހިގެން ހިނގި ހާދިސާގައި ފަސިންޖަރަކު މަރުވެފައި ވަނީ ހާޓްއެޓޭކެއް ޖެހިގެން ކަމަށް ބެލެވެއެވެ. އެ ހާދިސާގައި 30 މީހުންނަށް އަނިޔާވިއެވެ. އެ ހާދިސާ ހިނގާފައި ވަނީ މިޔަންމާގެ އީޔާވަދީ ބޭސިންގެ މަތިން ދަތުރު ކުރަމުން ދަނިކޮށެވެ.