ޙަރަދުކުރަންވީ މޫސުމީ ބަދަލުތަކަށް ހޭނުމަށް ކުރާ މަސައްކަތަށް، ހަނގުރާމަތަކަކަށް ނޫން: ރައީސް

ހަނގުރާމަތަކަށް ޙަރަދުކުރުމުގެ ބަދަލުގައި، މޫސުމީ ބަދަލުތަކަށް ހޭނުމަށް ކުރާ މަސައްކަތަށް ޚަރަދުކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފިއެވެ.

ރައީސުލްޖުމްހޫރިއްޔާ މިކަމަށް ގޮވާލެއްވީ ކޮޕް ސަމިޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ މީގެ 35 އަހަރު ކުރިން ބޭއްވި ސްމޯލް އައިލެންޑް ސްޓޭޓްސް ކޮންފަރެންސާއި ހަމައިން ފެށިގެން ރާއްޖެއިން ދަނީ ތިމާވެށީގެ މައްސަލަތަކުގައި އަޑު އުފުލަމުންކަމަށެވެ. އަދި މިއަދުވެސް އެކަން އޮތީ އެގޮތަށްކަން ރައީސުލްޖުމްހޫރިއްޔާ ތަކުރާރުކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ ވަށައިގެންވާ ތިމާވެއްޓަކީ ހަމައެކަނި ވަސީލަތްތަކެއް ނޫންކަމަށާއި، އެއީ އަޅުގަނޑުމެންގެ ސާގާފަތުގެ ރަމްޒެއްކަމަށެވެ. އަދި ތިމާވެށި ހިމާޔަތްކުރުމަކީ އަޅުގަނޑުމެންގެ މައްޗަށް އޮތް ވާޖިބެއްކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މޫސުމީ ބަދަލުތަކަށް ވިލުންވެރިވެފައިވާ ރާއްޖެއެއްގެ ތަސައްވުރު އެމަނިކުފާނު ހާމަކުރައްވާފައިވާކަމަށާއި، ގޮންޖެހުންތަކާއެކު ނަމަވެސް އެ އަމާޒަަށް ވާސިލުވުމުގައި ކާމިޔާބީތަކެއް ލިބެމުންދާކަމަށެވެ. އެގޮތުން އެނަރޖީ ޕޮލިސީ އެންޑް ރޯޑްމެޕް އިފްތިތާހުކުރެވިފައިވާކަމަށާއި އަދި ކާބޯތަކެތީގެ ޔަގީންކަން ކަށަވަރުކުރުމަށާއި، އަގުހެޔޮ ބޯހިޔާވަހިކަމެއް ފޯރުކޮށްދިނުމަށް ތިމާވެއްޓާއި ރަށްޓެހި މަޝްރޫޢުތަކެއް ފަށާފައިވާކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ. މީގެއިތުރުން ރާއްޖޭގެ އިޤްތިޞާދު ސިންދަފާތުކުރުމަށް ޕޯޓްގެ ހިދުމަތްތައް ފުޅާކޮށް، ސްޕެޝަލް އިކޮނޮމިކް ޒޯންތައް ތަރައްޤީކޮށް، އިންވެސްޓްމަންޓްތަކުގެ ފުރުސަތުތައް ފަހިކޮށްދިނުމަށް ޑިވެލެޕްމަންޓް ބޭންކެއް ޤާއިމްކުރެވިފައިވާކަންވެސް އެމަނިކުފާނު ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ ތިމާވެށީގެ ރޮނގުން ރާއްޖެއިން ކުރަމުންދާ މަސައްކަތަށް އޮތް އެންމެ ބޮޑު ދައްޗަކީ މާލީ އެހީތެރިކަން ލިބުމުގައި ހުރި ދަތިތައްކަމަށެވެ. އަދި ކްލައިމެޓް ފައިނޭންސްއަށް ބޭނުންވަނީ ބިލިއަނުން ނޫންކަމަށާއި، އެކަމަށް މިއަދު ޓްރިލިއަނުން ފައިސާ ބޭނުންވާކަމަށާއި، އެ އަމާޒަށް މަސައްކަތްކުރަންޖެހޭކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. އެކަމުގައި ތަރައްޤީވެފައިވާ ބޮޑެތި ޤައުމުތަކުން ބޮޑު މަސައްކަތެއް ކޮށްދޭންޖެހޭކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ.

ރައީސުލްޖުމްހޫރިއްޔާ ވިދާޅުވީ މިއަދު ދުނިޔޭގެ އެކި ކަންކޮޅުތަކަށް ބަލާލުމުން ފެންނަނީ އެއްވެސް ހިފެހެއްޓުމެއް ނެތި ހަނގުރާމަތަކަށް ޙަރަދުކުރާ މަންޒަރުކަމަށެވެ. ނަމަވެސް ތިމާވެށީގެ ކަންކަމަށް ހަރަދުކުރަން ޖެހުމުން އެ މަންޒަރު ނުފެންނަކަމަށް ރައީސުލްޖުމްހޫރިއްޔާ ވިދާޅުވިއެވެ. އެހެންކަމުން ބައިނަލްއަޤްވާމީ މާލީ ނިޒާމަށް ބަދަލުތަކެއް ގެނެސް، ޚަރަދުކުރުމުގައި އިސްކަންދޭ ކަންކަން އަލުން ތަރުތީބުކުރަންޖެހޭކަންވެސް ރައީސުލްޖުމްހޫރިއްޔާ ފާހަގަކުރެއްވިއެވެ. އަދި މިފަހަރުގެ ކޮޕް ސަމިޓަކީ ތަފާތު ދައްކާނެ، ނަތީޖާ ނެރޭނެ ސަމިޓަކަށް ހެދުމަށް ރައީސުލްޖުމްހޫރިއްޔާގެ ވާހަކަފުޅުގައި ގޮވާލެއްވިއެވެ.